!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Брисел воведе економски санкции за Венецуела


Брисел, 14 ноември, 2017 - 15:00 (META) 

Министрите за надворешни работи на ЕУ денеска одобрија економски санкции, вклучувајќи и ембарго на оружје за Венецуела.

– Се што правиме е за дијалог меѓу владата и опозицијата да се најде демократско и мирно решение – рече шефот на шпанската дипломатија Алфонсо Дастис.

Во заедничкото соопштение на земјите-членки на ЕУ се наведува дека мерките за забрана за патување во Унијата и замрзнувањето на средствата „ќе бидат искористени постепено и флексибилно“, а може и да бидат продолжени.

Во соопштението се наведува дека регионалните избори во Венецуела, одржани на 15 октомври биле со бројни неправилности и оти тоа влијаело врз ставот на ЕУ.

Министрите на ЕУ подоцна ќе одлучат кои лица ќе бидат ставени на црна листа, но засега фокусот е на силите за безбедност, министрите во владата, институциите обвинети за кршење на човековите права и непочитување на демократските принципи на владеење на правото.


САД воведуваат нов пакет санкции кон Венецуела


Вашингтон, 9 ноември, 2017 - 21:06 (META) 

Властите на САД денеска соопштија дека ќе воведат нов пакет санкции кон Венецуела, против десет високи функционери кои Вашингтон ги обвинува за поткопување на изборниот процес во земјата, цензура на медиумите и корупција, јавуваат светските агенции.

„САД не можат а да не реагираат додека режимот на претседателот (Николас) Мадуро продолжува да го уништува демократскиот поредок и просперитетот на Венецуела“, изјавил министерот за финансии на САД, Стивен Мнучин.

На списокот на новите санкции, меѓу останатите, се наоѓаат потпретседателката на земјата, Сандра Облитас Руза, амбасадорот во Италија, Хулијан Изајас Родригес Дијас и министерот за култура, Ернесто Емилио Виљегас Полхак.

САД првите санкции кон Венецуела ги воведоа на 31 јули, оваа година, додека на 25 август Белата куќа соопшти дека воведува дополнителни финансиски санкции, меѓу кои и забрана за купување на новите обврзници кои ги издава владата на Венецуела или нејзината национална нафтена компанија – ПДВСА.

Длабоката политичка и економска криза со месеци ја тресе Венецуела, која е поделена помеѓу приврзаниците на претседателот Мадуро и либералната опозиција која бара вонредни претседателски избори.


ОН: Можен е пораст на злосторствата против човештвото во Венецуела


Њујорк, 11 септември, 2017 - 12:36 (META) 

Претседателот на Венецуела, Никола Мадуро, би можел да продолжи да ги урива демократските институции, а злосторствата против човештвото би можеле да се зголемат, изјави високиот претставник за човекови права на Обединетите нации, Зеид Рад ал Хусеин.

Тој рече дека постои можност да бидат извршени злосторства против човештвото, кои би можело да се докажат со понатамошна казнена истрага.

Од канцеларијата на високиот претставник на ОН за човекови права, минатиот месец соопштија дека припадници на венецуелските сили за безбедност извршиле големо кршење на човековите права при разбивање на демонстрациите против власта во земјата и дека демократијата во Венецуела е „одвај жива“.


Мадуро нема да присуствува на седницата на ОН за човекови права


Њујорк, 5 септември, 2017 - 12:41 (META) 

Претседателот на Венецуела, Николас Мадуро, го откажа учеството на отворањето на 36. заседание на Советот за човекови права на Обединетите нации во Женева в понеделник.

„Претседателот Мадуро нема да се обрати на Советот за човекови права“, се наведува во соопштението на ОН, иако претходно беше најавено дека тој на 11 септември ќе има свое обраќање.

Венецуела во изминатите неколку месеци ја тресе длабока политичка и економска криза. Либералната опозиција бара вонредни претседателски избори и организира протести кои силите за безбедност ги прекинуваат употребувајќи сила.

Во судири на демонстрациите кои од 1 април се секојдневни, досега загинаа најмалку 120 луѓе.


Убиени 37 затвореници во затвор во Венецуела


Каракас, 17 август, 2017 - 10:50 (META) 

За време на упадот на владините безбедносни сили во затворот во венецуелскиот град Пуерто Ордас се убиени 37 затвореници.

Активистите за човекови права веќе подолго време предупредуваат дека насилните банди вежбаат „одржување контрола“ на повеќето хаотични затвори во оваа земја, како и дека имаат пристап до автоматско оружје и рачни гранати.

Владата се обидува повторно да воспостави контрола над затворите со мал број на вработени, испраќајќи специјални единици од време на време, но конфронтациите со смртоносен исход се чести.


САД ќе ја искористат својата моќ за да ја вратат демократијата во Венецуела, порача Пенс


Вашингтон, 14 август, 2017 - 20:23 (META) 

Американскиот потпретседател Мајк Пенс порача дека САД ќе ја искористат својата економска и демократска моќ за да дојде до обновување на демократијата во Венецуела.

– Претседателот (Доналд) Трамп многу јасно стави до знаење дека нема да стоиме настрана додека Венецуела тоне во диктатура. Состојбата во Венецуела е лоша и се заканува да ја загрози безбедноста и просперитетот на целокупната хемисфера и на народот на САД – рече Пенс.

Тој истакна дека САД имаат многу опции за Венецуела, но оти претседателот Трамп останува уверен дека соработувајќи со нивните сојузници ширум Латинска Америка може да се постигне мирно решение.

Трамп во петокот се закани со воена интервенција во Венецуела, што предизвика осуда ирум Латинска Америка.


Синот на Мадуро се закани дека со пушки ќе ја заземе Белата куќа


Каракас, 14 август, 2017 - 16:17 (META) 

Гуерa Мадуро, синот на претседателот на Венецуела Никола Мадуро, се закани дека ќе ја заземе Белата куќа со оружје доколку претседателот на САД, Доналд Трамп испрати војска во неговата земја.

Белата куќа го осуди режимот во Венецуела поради кршењето на човековите права, а минатата недела Трамп рече дека не ја исклучува можноста за воена интервенција во оваа земја.

Синот на Мадуро му одговори на Трамп, но погрешно ја одредил локацијата на седиштето на американскиот претседател, па наместо Вашингтон, го споменува Њујорк, пренесува „Си-ен-ен“.

– Ако се оствари тој неверојатен чин на напад на нашата татковина, пушките ќе стигнат во Њујорк. Господине Трамп, ние ќе дојдеме да ја заземеме Белата куќа – изјави Гуерa Мадуро.


Трамп не ја исклучува можноста за воена акција во Венецуела


Вашингтон, 12 август, 2017 - 10:41 (META) 

Американскиот претседател Доналд Трамп изрази загриженост поради хуманитарната криза во Венецуела, додавајќи дека не ја отфрла можноста за воена акција како одговор на политичката ситуација во оваа земја, јавуваат светските агенции.

Трамп изјавил дека сите опции се на маса поради антидемократските случувања во Венецуела, вклучувајќи и воена интервенција.

Министерот за одбрана на Венецуела, Владимир Падрино, пак изјавил дека заканите на Трамп се „акт на лудост и краен екстремизам“.

Белата куќа соопшти дека Трамп ќе разговара со претседателот на Венецуела, Николас Мадуро тогаш кога во земјата повторно ќе биде воспоставена демократија.


САД воведоа санкции против осум државјани на Венецуела


Вашингтон, 10 август, 2017 - 10:27 (META) 

САД денеска воведоа санкции против осум лица од Венецуела, вклучувајќи го и братот на покојниот претседател Хуго Чавез, поради поткопување на демократијата во земјата.

Американското Министерство за финансии соопшти дека лицата кон кои се воведени санкциите се сегашни или поранешни владини претставници кои Вашингтон ги обвинува за основање на Уставотворното собрание.

Телото, кое има задача да го измени Уставот, денеска се самопрогласи за претпоставено над сите други државни институции, вклучувајќи го и парламентот.

САД претходно воведоа санкции за претседателот Николас Мадуро.


Напад на шпанската амбасада во Каракас


Каракас, 4 август, 2017 - 11:12 (META) 

Шпанската амбасада во Каракас е погодена со повеќе рачно изработени експлозивни направи, соопштија венецуелските власти.

Обвинителството наведе дека две лица на мотор вчера кон амбасадата фрлиле повеќе молотови коктели. Нема информации за повредени или материјална штета, а полицијата и обвинителството го истражуваат случајот.

Венецуела се соочува со повеќемесечни протести и со политичка нестабилност поради желбата на претседателот Николас Мадуро да го измени уставот.

Денеска се очекува да се одржи конститутивната седница на Уставотворното собрание, избрано во неделата.