!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Анѓушев: Секој инвеститор ќе може да добие помош во висина до 50 отсто од инвестицијата


Ерусалим, 4 септември, 2017 - 16:38 (META) 

Владата подготвува нов концепт за привлекување инвеститори, кој се очекува да биде презентиран во средината на септември, истакнал вицепремиерот за економски прашања, Кочо Анѓушев, на бизнис-форумот во Ерусалим.

Тој концепт, како што истакнал, ќе обезбеди транспарентност и еднаков третман на странските и на домашни инвеститори со што позитивно ќе влијае на економскиот развој на земјата.

„Освен основната поддршка, која подразбира ослободување на инвеститорите од даночни и од царински давачки за определен период, креираме и мерки за директна државна помош на инвеститорите, кои ќе бидат транспарентно објавени и подеднакво ќе важат и за домашните и за странските компании. Секој инвеститор ќе може да добие државна помош во висина до 50 отсто од инвестицијата, а ќе се стимулира отворање на работни места, особено работни места за високообразованиот кадар, кој сакаме да го задржиме во Македонија. Како особено важна ќе се земе предвид и соработката на странските со домашни компании“, изјавил Анѓушев.

Тој нагласил дека паралелно со процесот на привлекување на нови инвеститори, Владата посветено ќе работи и на изградба на современа инфраструктура, со која Македонија подобро ќе се поврзе со соседите, а компаниите ќе го подигнат нивото на конкурентност.


Таксистите бараат законите да се прилагодат на реалните состојби со такси-превозот


Скопје, 9 август, 2017 - 20:10 (META) 

Премиерот Зоран Заев, министерот за внатрешни работи, Оливер Спасовски, и министерот за транспорт и врски, Горан Сугарески, денеска се сретнале со претставници на Асоцијацијата на такси-превозници.

Претставниците на асоцијацијата, во името на 53 такси-компании од Македонија, ги кажале проблемите со кои се соочуваат во својата работа и побарале измени во постојната законска регулатива и нејзино прилагодување на реалните состојби во такси-превозот.

Заев ги повикал претставниците на асоцијацијата, преку постојана и интензивна комуникација, со свои предлози да придонесат за изработка на ефикасно и заедничко прифатливо законско решение.


Хелсиншки: Бегалците во кампот „Табановце“ дневно добиваат половина литар вода за пиење


Гевгелија/Куманово, 14 јуни, 2017 - 14:57 (META) 

Состојбата со бегалците во прифатно-транзитните кампови „Винојуг“ и „Табановце“ во текот на минатиот месец останала непроменета и во овие кампови вкупниот број на бегалци изнесувал 29 лица, се наведува во последниот месечен извештај на Хелсиншкиот комитет за човекови права.

Од Хелсиншки информираат дека бројот на бегалци во кампот „Винојуг“ кај Гевгелија е мал, а намалена е и фреквенцијата на движење на бегалци кои се фатени по илегални патишта надвор од кампот.

„Бројот на бегалци во кампот константно изнесува девет лица, меѓу кои со потекло од Авганистан, Ирак и од Сирија. Неколку од бегалците имаат почнато постапки за семејно обединување. Кујната која функционираше во кампот е официјално затворена. Должноста за делење храна е преземена од Црвениот крст. Инфраструктурни промени во кампот не се забележани. Хигиената е на задоволително ниво“, стои во извештајот.

Оттаму додаваат дека продолжува практиката на нелегално „депортирање“ на бегалци кои се фатени по илегални патишта низ Македонија назад во Грција. Во текот на мај 2017 година, вкупно 24 бегалци со потекло од различни земји, во шест одделни случаи биле фатени од полицијата по илегални патишта и „депортирани“ во Грција.

Состојбата во кампот „Табановце“ на северната граница, според извештајот на Хелсиншкиот комитет е полоша, особено во однос на условите за престој на бегалците, кои се вкупно 20 лица.

„Во текот на мај е забележано значително влошување на квалитетот на храната. Поплаките на бегалците се дека храната е недоволна и со лош квалитет. Истовремено, воспоставено е и ограничување на пристапот до вода за пиење, односно бегалците имаат право да добијат едно шише вода од половина литар на ден. Лошиот квалитет и недостигот од храна не се променети и покрај почнувањето на рамазанските пости“, стои во извештајот на Хелсиншкиот комитет, кој апелира да се подобри квалитетот на храна, која ќе ги задоволи сите нутриционистички стандарди, како и да се обезбеди пристап до неограничено количество вода.


Швајцарска стратегија за поддршка, предвидува 76 милиони франци за Македонија


Скопје, 26 мај, 2017 - 13:59 (META) 

Швајцарија е еден од најголемите билатерални партнери на Македонија и со новата стратегија за соработка од 2017 до 2020 година, се предвидени финансиски обврски во висина од 76 милиони швајцарски франци, соопшти амбасадата на Швајцарија во Македонија.

„Целта на новата стратегија е да ја поддржи Македонија во нејзините реформи да ги постигне европските стандарди и вредности и да продолжи со социјално инклузивната демократија и пазарна економија, воедно обезбедувајќи ефикасно управување со природните ресурси. Стратегијата следи еден практичен пристап кој се фокусира на подобрување на условите за живот на граѓаните на Македонија. Деталите од стратегијата ќе бидат откриени на нејзиното официјалното претставување на 31 мај во Скопје,“ велат од Амбасадата на Швајцарија.


Павлопулос бара почитување на грчката историја и на европските принципи


Атина, 11 мај, 2017 - 12:44 (META) 

Грчкиот претседател, Прокопис Павлопулос, одново побара Македонија да ја почитува грчката историја ако сака да стане дел од Европската Унија. Во говор на 11. Балканска конференција на началници на Генералштабови од државите од Балканот, Павлопулос забележа дека Грција ја поддржува европската перспектива на државите од Балканот и смета дека нивното место е во ЕУ, но за да станат дел од Унијата, тие мора да почитуваат одредени услови.

-Државите што не се членки на ЕУ, треба да напредуваат по нивниот европски пат, тоа е нивната насока. Грција ја посакува европската перспектива на балканските држави. Но, за да се заврши оваа европска перспектива со интеграција во Европската Унија, има одредени услови, кои не ги поставува еднострано Грција, туку ЕУ и европското право. Услов е почитување на историјата и на историската вистина. Оваа почит е услов за мирен соживот. Услов е и искреното почитување на меѓународното право во целост и на основните принципи на европското право – изјави Павлопулос.

Грчкиот претседател нагласи дека е потребна соработка на сите присутни држави за да се обезбеди мирот и стабилноста на регионот и тој да се заштити од различни предизвици и закани. Грција, како што посочи, пружа пријателска рака и добрососедство кон сите балкански држави.

На конференцијата која се одржа вчера во Атина, се разговараше за одржување на мирот и на стабилноста во регионот на Југоисточна Европа и за стратегии за подобрување на воената соработка.


ОБСЕ/ОДИХР оцени дека референдумот во Турција се одржал во нефер услови


Анкара, 17 април, 2017 - 17:29 (META) 

Мисијата на ОБСЕ/ОДИХР оцени дека референдумот во Турција се одржал во нефер услови и двете страни во кампањата немале еднакви можности.

Во заедничкото соопштение на ОБСЕ/ОДИХР и на Парламентарното собрание на Советот на Европа (ПССЕ) се вели дека референдумот се одржал во политички амбиент во кој основните слободи кои се од суштинско значење за вистински демократски процес се прекинати во рамките на вонредна состојба во државата.

Надзорот на набљудувачката емисија покажал дека кампањата која ги поддржувала уставните промени доминирала во медиумите. Тоа, заедно со притисоците и со затворањето на медиумите, како и со апсењето на новинарите, придонело гласачите да не можат да ја видат пошироката слика.


Привремен сообраќаен режим на дел од улицата Никола Карев


Скопје, 13 април, 2017 - 15:09 (META) 

Градот Скопје ги информира граѓаните дека во деновите од претстојниот викенд (15 и 16 април), на дел од улицата Никола Карев, на крстосницата со булеварот Трета македонска бригада, ќе се изведува прекоп за поставување подземни инсталации.

„Поради тоа, во деновите од викендот, на оваа делница ќе се воведе привремен сообраќаен режим, во времетраење од 8 до 18 часот, а на коловозот ќе се постави соодветна сообраќајна сигнализација“, велат од Град Скопје.

Оттаму апелираат до сите учесници во сообраќајот да ги почитуваат поставените сообраќајни знаци и да ја приспособат брзината на движење на условите на патот.


Владата на Србија бара концесионер за белградскиот аеродром „Никола Тесла“


Белград, 12 февруари, 2017 - 17:13 (META) 

Владата на Србија и белградскиот аеродром „Никола Тесла“ објавија јавен повик за давање под концесија на аеродромот на 25 години, јавува дописникот на „Мета“ од Белград.

Концесијата се дава за финансирање, развој преку изградба и реконструкција, одржување и управување со инфраструктурата на аеродромот, како и извршување на дејноста оператор, се наведува во повикот објавен на интернет-страницата на белградскиот аеродром.

На огласот не можат да се пријават, односно концесија на можат да добијат компании кои управуваат со аеродроми во радиус од 450 километри од Белград.

Владата на Србија верува дека годишниот приход од концесијата за аеродромот „Никола Тесла“ би можел да изнесува 10-11 милиони евра, плус надоместокот за концесија од околу 350 милиони евра.


Американска амбасада во Софија: Бугарија сè уште не е подготвена за безвизен режим со САД


Софија, 10 февруари, 2017 - 16:05 (META) 

Бугарија сè уште не ги исполнува условите за безвизен режим со Соединетите Американски Држави. Бројот на одбиени барања за визи минатата година бил 15 отсто од вкупниот број на барања, а условот за добивање безвизен режим е одбиените барања да бидат под три отсто. Ова денеска го објасни генералната конзулка на САД во Бугарија, Кејт Мекгур, но увери дека миграциската политика на новиот американски претседател Доналд Трамп на ниту еден начин нема да влијае на бугарските граѓани.

Републиканското мнозинство во Конгресот на САД пред неколку дена предложи бројот на издадени зелени карти да се намали за половина, а популарната годишна лотарија да запре.

Инаку од 2000 година наваму биле издадени повеќе од 100.000 американски визи на млади граѓани на Бугарија за студентски претстој во САД.

Американската амбасада во Софија, инаку, објави конкурс за најдобра видеоснимка од доживувањата на студентите кои претстојново лето ќе одат во САД, во рамките на програмата за работа и за престој во земјата. Годинешниот конкурс на американската амбасада е на тема „Доживеј го својот сон“.

„Интервјуто е лесно. Неопходно е добро познавање на англискиот јазик, што ќе им овозможи на студентите да се справат со секојдневните задолженија, да се редовни студенти на акредитиран универзитет, да имаат валидна понуда за работа, како и да понудат гаранција дека ќе се вратат во Бугарија по завршувањето на програмата“, рече Мекгур.

Амбасадорот на САД во Бугарија, Ерик Рубин, денеска им ги врачи визите на првите четворица учесници во годинешната програма за работа и за патување во САД.


Иванов: Тврдењата на СДСМ се небулозен и груб обид за манипулација


Скопје, 3 февруари, 2017 - 16:34 (META) 

Тврдењата на СДСМ дека претседателот Иванов лаже дека постапил како претседателот Глигоров и дека го крши Уставот претставуваат груба лага и груба манипулација со јавноста, се вели во реакцијата на кабинетот на Иванов на соопштението на СДСМ.

„Наводите на СДСМ дека претседателот Глигоров го доделил мандатот на второпласираната партија на тогашните избори, повикувајќи се на објавено соопштение од 14 јули 1992 година, претставуваат груба лага, бидејќи информациите изнесени во соопштението од 14 јули 1992 година се однесуваат на консултации што претседателот Глигоров ги извршил со СДСМ. Факт е дека во соопштението од 14 јули 1992 година, на кое се повикува СДСМ, претседателот Глигоров не го доверува мандатот на СДСМ за состав на влада, туку од нив бара да посочат кандидат за мандатар. Три дена подоцна, на 17 јули 1992 година, СДСМ во присуство на сите партии што го сочинувале парламентарното мнозинство, го информираат претседателот Глигоров дека успеале да обезбедат парламентарно мнозинство и го определуваат Петар Гошев за мандатар“, се наведува во соопштението.

Кабинетот на Иванов оценува дека тврдењата на СДСМ дека претседателот Иванов, наводно, поставува дополнителни услови за доделување на мандатот за состав на владата, се „небулозен и груб обид за манипулација“.

„Барањата што претседателот Иванов ги истакна не претставуваат услови, туку политички ставови на претседателот Иванов за идните приоритети на новата влада, кои се конзистентни и се однесуваат на сите политички структури во земјата. Претседателот Иванов има целосно легитимно право да изнесува политички ставови и барања поврзани со државните интереси и од тоа нема да отстапи и во иднина“, додаваат од кабинетот на Иванов.