Народна банка и ЕЦБ склучија меморандум за соработка во сферата на супервизијата


Скопје, 4 декември, 2018 - 9:55 (META) 

Народната банка на Република Македонија (НБРМ) и Европската централна банка (ЕЦБ) склучија меморандум за соработка во сферата на супервизијата.

Од Народна банка велат дека соработката дефинирана со овој меморандум е од суштинско значење за натамошното унапредување на интегритетот, стабилноста и ефикасноста во работењето на банките.

„Согласно со неговите одредби, соработката меѓу двете институции ќе биде насочена кон обезбедување ефективна размена на супервизорски информации, имајќи ја предвид домашната и меѓународната регулатива, вклучително и Основните принципи за ефикасна банкарска супервизија донесени од Базелскиот комитет. Спроведувањето на неговите одредби ќе биде многу значајно и за остварувањето на определбата на НБРМ за постојано развивање на супервизијата во Република Македонија според најновите европски и меѓународни стандарди и препораки“, се вели во соопштението на НБРМ.

Во него се додава дека со иницирањето на овој многу значаен стратегиски документ, ЕЦБ ја вброи НБРМ меѓу централнобанкарските институции кои што ги смета за свои стратешки партнери во процесот на унапредување на супервизијата, а со тоа и во јакнењето на банкарските системи во Европа.


Утре се отвора лизгалиштето во СЦ „Борис Трајковски“


Скопје, 22 ноември, 2018 - 11:10 (META) 

Утре се отвора лизгалиштето во спортскиот центар „Борис Трајковски“ каде што посетителите ќе може да уживаат во рекреативно, уметничко лизгање и хокеј.

„Условите се најдобри досега и со најдобро подготвен мраз по светски стандарди. Не очекуваат многу натпревари во хокеј и уметничко лизгање, за кое годинава ќе има двајца професионални тренери. Ќе има и повеќе термини за рекреација, а цените остануваат исти 150 денари со изнајмени лизгалки и 100 денари со сопствени. Наутро ќе се одржуваат тренинзи по уметничко лизгање, а рекреативно ќе може да се лизга од 10 до 22 часот, со мали паузи од 16 до 19 часот кога ќе има хокеј тренинзи. За викенд целодневно ќе може да уживате во рекреативното лизгање“, се вели во соопштението од СЦ „Борис Трајковски“.


Спасовски: Следниот период ќе се избере моделот по кој ќе се реформира УБК


Скопје, 2 октомври, 2018 - 12:59 (META) 

Министерот за внатрешни работи Оливер Спасовски денеска на прес-конференција најави дека во следниот период ќе се избере моделот, по кој ќе се одвива реформата на УБК.

– На седница на Влада денеска ќе поднесам информација, со која ќе ги образложам причините за ваквата реформа. Предвидено е МВР да одржи повеќе консултации и дебати со релеванти чинители, по што ќе биде избран најсоодветниот модел. Овој процес ќе го води работна група, која ќе се формира од надлежните државни институции, но и со претставници од академската област и граѓанското општество – појасни Спасовски.

По завршувањето на консултациите заклучоците ќе бидат проследени до Владата со соодветен акционен план.

– Целта е добиеме служба која ќе се темели на високи професионални стандарди, почитување на етички кодекс и современи методи на работа и дејствување, служба која ќе биде заштитена од негативни политички влијанија и нејзина единствена задача и должност ќе биде да ги штити безбедноста и сигурноста на граѓаните – истакна Спасовски.

Тој потсети дека злоупотребата на безбедносно-разузнавачките служби, особено на УБК предизвика сериозна политичка криза во земјава и го наруши угледот на демократијата. Во рамки на проектот изработен со ДИКАФ направена е анализа на оваа реформа, за која, како што истакна, постојат три модели.

– Ќе ги разгледаме во периодот на консултации, ќе разговараме со новинарите, дипломатскиот кор, академскиот сектор и на крај ќе одлучиме. Сакаме да ги видиме предностите и слабостите на секој од нив – додаде тој.

Директорот на УБК, Горан Николовски изрази уверување дека на крајот од консултативниот процес ќе се постигне успех и ќе се одбере модел, кој ќе гарантира професионална и департизирана служба, кој ќе гарантира трансапрентност и ќе успее да ги заштити интересите на државата и ќе работи во интерес на граѓаните.

Спасовски посети дека реформите на системот на следење на комуникации од кои произлезе формирањето на ОТА, како дел од посеопфатната задача за реформирање на безбедносно-раузнавачкиот систем успешно се спроведуваат. Додаде дека се преземаат сите оперативни и логистички активности и согласно Законот за следење на комуникации ќе почне со работа не подоцна од 1 ноември оваа година.


Веб-страницата на МИОА пристапна и за лицата со посебни потреби


Скопје, 7 јуни, 2018 - 11:22 (META) 

Министерството за информатичко општество и администрација од денеска e со нова веб-страница, која исполнува дел од стандардите за пристап до информации на лицата со попреченост.

„На овој начин го подобруваме пристапот на граѓаните до сите информации поврзани со работата на министерството. Покрај подобрување на визуелниот изглед и лесниот пристап до податоци, тоа што е ново на оваа веб-страницата и е исполнување на дел од стандардите за пристап до информации на лицата со попреченост. За целосен пристап до сите информации објавени на веб-страницата за лицата со посебни потреби, во тек е имплементација и на останатите меѓународно прифатени стандарди за пристап за лица со попреченост. Содржините на новата веб страна на МИОА се преведени и на албански јазик, и паралелно сите содржини ќе се објавуваат и на македонски и на албански јазик“, информираат од таму.


Архитектите ја поздравија одлуката новиот Клинички центар да се гради во Злокуќани


Скопје, 9 март, 2018 - 15:44 (META) 

Асоцијацијата на архитекти на Македонија ја поздрави одлуката на Владата и Министреството за здравство, со која се разреши дилемата околу изградбата на новиот Клинички центар, кој треба да се гради во Злокуќани.

„Истовремено изразуваме целосна поддршка за определбата на Владата новиот Клинички центар да се гради на друга локација, надвор од центарот на Скопје, што беше заложба на Асоцијацијата на архитекти на Македонија, како и на неколку генерации врвни архитекти пред нас, кои се залагале за изградба на еден, нов модерен клинички центар по сите светски стандарди“, се вели во соопштението на Асоцијацијата на архитекти на Македонија.

Од таму додаваат дека се задоволни што при донесувањето на ваквата одлука на Владата биле земени предвид и мислењата и сугестиите на стручната јавност.

„Се надеваме дека оваа соработка при носењето на важни одлуки за унапредување на урбаниот простор на Македонија ќе продолжи и во иднина“, велат од Асоцијацијата.

Одлуката ја поздравија и Лекарската, Стоматолошката и Фармацевтската комора на Македонија.


Шефовите на мисијата на ЕУ на Косово ги повикаа партиите да обезбедат фер и коректни избори


Приштина, 19 мај, 2017 - 19:47 (META) 

Шефовите на мисијата на Европската Унија на Косово ги повикаа сите политички партии и учесници на предвремените парламентарни избори, закажани за 11 јуни, оваа година, да обезбедат фер и демократски избори во склад со меѓународните стандарди.

Од мисијата нагласуваат дека предизборните кампањи треба да и им пружат информации на гласачите во атмосфера на мир, толеранција и почитување, за да може конечниот резултат да биде прифатлив за сите.

„Ги повикуваме сите партии да предложат кандидати кои се соодветни за високите позиции кои ќе ги заземат. Косово заслужува претставници со високи морални норми и со авторитет. Во голем дел од нашите земји, поединци кои се осудени за тешки злосторства по автоматизам се исклучени од изборната трка. Косово заслужува кандидати кои ги исполнуваат највисоките стандарди за јавни службеници“, се вели во заедничката порака на шефовите на мисијата на ЕУ на Косово.


Скопје и Тетово се загадени поради големиот и брз урбан развој без еколошки стандарди


Тетово, 19 мај, 2017 - 16:10 (META) 

Аерозагадувањето во Скопје и во Тетово е резултат на нивниот голем и брз урбан развој, кој се одвива без да се запазат основните урбанистички и сообраќајни стандарди. Ова е ставот на дел од учесниците на Меѓународната конференција на применети науки, која се одржа на Државниот универзитет – Тетово.

Професорот Вулнет Палоши смета дека градот треба да се развива на основа на генерален урбанистички план. Но, наместо тоа, во градот се носат урбанистички планови за неколку објекти, без да се утврди дали тој план содејствува со другиот дел од градот, вели Палоши.

– Добро е што Тетово се развива, има студенти, има трговија, за сето ова се потребни градби. Тие градби се градат, но не се градат планирано, во содејство со другиот дел од градот, туку парцијално. Ние во Тетово не можеме да се потпреме на генералниот урбанистички план, затоа што е стар и затоа се носат парцијални урбанистички решенија за градби, кои кога се градат, не се внимава дали ќе му пречат некому или ќе ја запрат ружата на ветрови. Затоа потоа воздухот се загадува, во градот се намалува провевот – рече професор Палоши.

Професорот Миле Димитриевски, кој учествуваше на конференцијата, вели дека за прочистување на воздухот, ќе треба сите макотрпно да работиме и дека проблемот не се решава наеднаш.

– Ние сите работевме повеќе од една деценија да го загадиме воздухот, сега ќе треба толку да работиме да го прочистиме воздухот. Треба да работиме да го дислоцираме поголемиот дел од сообраќајот од градот, преку изградба на обиколница за град Тетово, треба да ја дислоцираме и дивата депонија, каде повеќе од една деценија се таложи ѓубрето. Како што сме работеле на уништување на зеленилото, така треба сега да работиме на негово засадување. Треба да ги намалиме возилата кои циркулираат на квадратен метар. За сето ова е потребно време и затоа овие чекори треба да ги почнеме да ги реализираме, затоа што доцниме – рече Димитриевски.

На Меѓународната конференција за применети науки беа презентирани 120 научни трудови од областа на архитектурата, геодезијата, сообраќајот и на инженерството.


ОЈО Скопје ѝ пиша на Јанева: Лажете и работите непрофесионално и неодговорно


Скопје, 25 октомври, 2016 - 13:28 (META) 

Обвинителите од Основното јавно обвинителство Скопје денеска ѝ испратија отворено писмо на специјалната јавна обвинителка, Катица Јанева, со кое, како што велат, сакаат да го изразат своето незадоволство од нејзината работа и од „срамната непрофесионалност“ со која обвинителката ѝнаштетила на јавно-обвинителската професија.

Тие во писмото велат дека Јанева, во последното појавување во јавноста, лажела во врска со начинот на кој биле заведувани предметите од прислушуваните разговори во ОЈО Скопје и дека не било преземено ништо во врска со нив.

„Заведувањето на предметите во деловодните книги во јавното обвинителство со децении е непроменето. Секој деловоден број укажува на начинот на влезот на предметот во обвинителството (настан, од непознат сторител, малолетник и слично). Но, кон сите предмети се постапува во согласност со законот. Предметите се работат и им се дава друг деловоден број, во согласност со првичните сознанија и индиции до кои е дојдено и во согласност со насочувањето за понатамошно постапување. И Вие имате предмети кои се заведени под РО број. Посочивте дека во предметите ништо не било сработено. Тоа е лага. Јавното обвинителство, во согласност со законот, Ви предаде 35 оформени предмети кои беа работени од страна на 23 различни јавни обвинители. Дел од нив беа јавните обвинители што сега работат кај Вас. Во секој од предметите беа преземени дејства, издадени наредби, сослушани сведоци, оштетени, осомничени, прибавени податоци и документација. Дел од предметите дури беа и пред правна одлука. И ние ги работевме и сето тоа го презедовме, иако кај нас не беа доставени снимките кои Вие, еве, веќе една година, ги имате, а сработивте само неколку“, стои во отвореното писмо од ОЈО Скопје до Јанева.

Во писмото обвинителите од ОЈО Скопје ја обвинуваат Јанева дека не ги почитува правните стандарди и не го почитува јавно-обвинителскиот кодекс.

„Ве прашуваме, кој правен стандард е незаконското лишување од слобода на лице, за кое Вие јавно признавте дека било незаконско, на само час и половина? Малку незаконско дејствување, час и половина (во врска со апсењето на Едмонд Темелко, осомничен во „Титаник“, н.з.). Кажете ни, кој временски период на незаконско дејствување не се смета за незаконски? Ве прашуваме, според кои стандарди и закони, Вие давате наредба на Ваш истражител да следи и да снима лице осомничено во Ваш предмет? Дали имавте за тоа судска наредба за посебна истражна мерка? Дали Вие и Вашите „повисоки стандарди“, всушност, во правниот промет вметнуваат и правна несигурност. Би сакале да знаеме, бидејќи за нас е незамисливо да се следи и да се снима објект (сопственост на поранешниот директор на Управата за безбедност и контраразузнавање Сашо Мијалков, н.з.) или лице кое е осомничено од страна на кој било без постоење на изричита судска наредба.
Уште повеќе, дали со усна наредба од Ваша страна беше испратен и приватниот детектив, кој, исто така, вршеше следење и снимање на осомничено лице во Ваш предмет? Цените ли дека сè што од Ваша страна е направено од крајно непознавање на законите и на постапката, треба од денес да биде „повисок стандард“ по кој сите ние ќе работиме, па ќе можеме директно да испраќаме истражители за следење, снимање, заедно со приватни детективи, кај ќе стигнеме. Жално е што Вие сакате да го намалите угледот на работењето на јавното обвинителство за Вие да се истакнете како професионалец“, стои во писмото.

На крајот од писмото, обвинителите велат дека нивна и обврска на Јанева е да гонат криминал според законите и правните професионални стандарди.

„За тоа имавте можност, кога требаше, а не направивте записник од предавање на снимките. Кога требаше, а не поднесовте отчет за финансиското работење на институцијата со која раководите. Кога не смеевте, но сепак дозволивте непотизам. Кога имавте обврска, но ја заборавивте, па нарушивте права на презумија на невиност на прес-конференциите. Почитувана г-ѓа Јанева, на крајот Ве потсетуваме. Ваша обврска, како и наша обврска е да гониме криминал. Да го познаваме правото, оти во раце ни се човечки судбини. Да работиме според законите и правните професионални стандарди. А не да создаваме клима на непочитување на законите и на институциите, да водиме јавни обвинителски политички кампањи, јавно да осудуваме лица и да пресудуваме без судски процес. Ние сите сме дел од правосудниот систем, кој, меѓу другото, не спие. Само не чувствува потреба јавно да се експонира. Да ве потсетиме! Honeste vivere, alterum non laedere, suum quique tribuere !!! (Чесно живеј, не повредувај други, секому дај му што му припаѓа)“, нагласуваат обвинителите на Основното јавно обвинителство Скопје во отвореното писмо до специјалната јавна обвинителка.


ААВМУ: „Алфа“, „Канал 5“, „Канал 5 плус“, „Нова“ и „Сител“ известуваат необјективно


Скопје, 28 април, 2016 - 22:24 (META) 

Дел од телевизиите со национална концесија не ги почитуваат начелата од член 61 од Законот за аудио и аудиовизуелни медиумски услуги, особено оние каде се бара објективно и непристрасно прикажување на настаните со еднаков третман на различните гледишта и мислења, пишува во првиот извештај на Агенцијата за аудио и аудиовизуелни медиумски услуги (AAВМУ) од следењето на медиумското претставување во вестите, во периодот од распишување на изборите до почетокот на изборната кампања, односно од 15 до 24 април 2016 година.

Следењето покажало дека во првите десет дена од распишувањето на изборите, најмногу се известувало за „активностите и за ставовите на четирите најголеми партии, меѓународниот фактор и претседателот на државата во врска со политичката криза и за граѓанските протести“, а радиодифузерите покажале „различен однос кон професионалните стандарди и програмски начела за вршење на дејноста“.

„Програмските сервиси на Јавниот радиодифузен сервис настојуваат да ги почитуваат програмските принципи и стандарди и сопствените правила за покривање изборни процеси, со неколку исклучоци. Пет телевизиски програмски сервиси не ги почитуваат начелата од член 61 од Законот за аудио и аудиовизуелни медиумски услуги, особено она со кое се бара објективно и непристрасно прикажување на настаните со еднаков третман на различните гледишта и мислења и овозможување публиката слободно да оформи мислење за одделни настани и прашања (алинеја 9). Кај „ТВ Алфа“, „ТВ Канал 5“, „ТВ Канал 5 плус“ и „ТВ Сител“ се забележуваат прилози поврзани со политичката криза, со активностите на државните органи и со промовирањето на мерките од изборната програма на ВМРО-ДПМНЕ во чија обработка и третман медиумите покажуваат ист или исклучително сличен начин на известување, разработуваат, односно акцентираат исти тези и ставови (свои или преземени од домашни или странски медиуми, експерти, претставници на партии), па дури користат и исти (туѓи или странски) снимки како илустративен материјал, што укажува на извесна усогласеност во нивната уредувачка политика“, стои во извештајот.

Кај овие телевизии, се додава во извештајот, „се забележува тенденција која, доколку продолжи во истиот правец, ќе резултира со известување во функција на изборно медиумско претставување на партиите од власта“.

„Станува збор за прилозите во кои активностите за промовирање мерки за унапредување на земјоделството од изборната програма на ВМРО-ДПМНЕ се претставуваат како политика на државата во оваа сфера, како и за прилози за активности на државните органи на централно и на локално ниво кои се креирани за да се привлече медиумско покривање“, се наведува во извештајот на Агенцијата за аудио и аудиовизуелни медиумски услуги.