!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Предлог-измени на два закони поминаа на прво читање, опозицијата гласаше „за“


Скопје, 7 септември, 2017 - 18:18 (META) 

На продолжението на 12. седница, пратениците од власта и од опозицијата гласаа „за“ предлог-законот за изменување и за дополнување на Законот за сметководството за буџетите и буџетските корисници, како и за предлог-законот за изменување на Законот за издавање обврзници на Република Македонија за денационализација, и со тоа, овие закони поминаа на прво читање.

Координаторот на пратеничката група на ВМРО-ДПМНЕ, Илија Димовски, во однос на двата закони рече дека се добри за граѓаните и затоа, наспроти досегашната практика на опозицијата, ВМРО-ДПМНЕ и Коалицијата ќе ги поддржат законите предложени од власта.

– Законот за издавање обврзници на Република Македонија за денационализација е значаен закон. Станува збор за продолжување на политиката почната од 2000 година и треба да се заврши процесот на денационализација. ВМРО-ДПМНЕ и Коалицијата се горди на овој закон, бидејќи со денационализацијата се исправија големи неправди спрема илјадници семејства, на кои, на неправеден политички начин, им се оневозможи нормална егзистенција. Овој закон од 2002 до 2006 година се спроведуваше со забавено темпо, и по 2006 година неколку илјади предмети останаа незавршени. Доколку оваа власт одлучи постапката по нив да ја тера докрај, ние како опозиција нема да правиме опструкции – рече Димовски.

Тој очекува следната недела пратениците на СДСМ да ги поддржат законите на опозицијата за зголемување на платата во јавниот сектор, за обезбедување ваучери за набавка на компјутери и компјутерска опрема за студентите, како и за намалување на трошоците и каматите во постапките за извршување преку извршителите и нотарите.

Претходно, пред паузата на седницата, пратениците во Собранието со 61 глас „за“ го изгласаа предлогот за распишување оглас за именување нов државен јавен обвинител. За време на гласањето, пратениците на ВМРО-ДПМНЕ ја напуштија салата.

По гласањето за точките 19 и 20, односно за овие два предлог-закони, претседателот на Собранието, Талат Џафери, рече дека за продолжението на 12. седницата ќе информира дополнително.

Џафери, на крајот на денешното продолжение на 12. седница, на граѓаните им го честиташе утрешниот празник, Денот на независноста на Македонија.


Министерството за финансии реагира на поскапувањето на сметководствените услуги


Скопје, 4 јули, 2017 - 15:16 (META) 

Министерството за финансии реагира на одлуката на Институтот за сметководители и овластени сметководители на Република Македонија (ИСОС), со која значително се зголемува висината на минимални трошоци за вршење книговодствени работи и на надоместокот за сметководствени услуги. Одлуката е донесена на 19 мај годинава.

Од министерството реагираат дека институтот има право да ги утврди само критериумите за утврдување на цената, но не и нејзиниот износ.

„Во согласност со Законот за вршење сметководствени работи и статутот на Институтот, нема основа за донесување на оваа одлука. Истовремено, Министерството за финансии појаснува дека оваа одлука е надвор од рамките на законот со оглед на фактот што управниот одбор на Институтот има надлежност да ги утврди само критериумите за утврдување на цената на сметководствените услуги, но не и висината на надоместокот за тие услуги“, се вели во реакцијата.