Брегу: Проширувањето на ЕУ и поврзувањето на Балканот се зависни процеси


Брисел, 4 декември, 2018 - 16:46 (META) 

Мајлинда Брегу, новата генерална секретарка на Регионалниот совет за соработка (РСС), која стапува на должност од идната година, укажа денеска на неопходноста од синхронизација на проширувањето на ЕУ со поврзувањето на Западен Балкан.

– Трансформацијата на Западен Балкан значи поврзување, односно интеграција на нашите економии во единствен пазар, поврзување на луѓето и заедничките вредности, поврзување на нашите заеднички политички, безбедносни и економски интереси. Мораме да се погрижиме нашите општества да станат поинклузивни. Сите заедно без исклучок треба да имаат полза од растот – додаде Брегу.

Брегу зборуваше на панел во рамките на 19. Самит што го организираат „Пријателите на Европа“, со помош на Европската комисија, на „Конрад Аденауер“, на РСС, на УНДП и на Командата на американските сили во Европа.

Самитот е всушност платформа на која се собираат креаторите на политиките од регионот и претставници на Европската Унија, земјите членки и други влијателни институции, а на кои се разговара за политички и економски прашања што се значајни за Западен Балкан.

Мајлинда Брегу е поранешна шефица на албанската дипломатија, а ќе ја преземе должноста генерален секретар на Регионалниот совет за соработка (РСС) од досегашниот Горан Свилановиќ, на 1 јануари 2019 година.


РСС организира обука за медиумско известување за тероризам и екстремизам


Будва, 25 октомври, 2018 - 14:33 (META) 

Медиумско известување за терористички акти или акти на насилен екстремизам, е тема на работилница што започна денеска во Будва, Црна Гора, соопшти Регионалниот совет за соработка (РСС).

Повеќе новинари од медиуми од регионот на Западен Балкан, меѓу кои и од Македонија, учествуваат на работилницата што ја изведуваат регионални и меѓународни експерти од оваа област, вклучувајќи го и феноменот на социјалните медиуми и радикализацијата преку интернет.

– Тероризмот, според статистичките податоци претставува најсмртоносна закана во 21-от век, а медиумите често се во средиштето на ова прашање и често се споменуваат како „врзно ткиво“ за сензација и паника, бидејќи терористичките напади често се внимателно осмислени за да предизвикаат внимание на електронските медиуми и на светскиот печат – изјави Амер Капетановиќ, шеф на Политичкиот оддел на РСС, на отворањето на настанот.

Новинарите кои учествуваат на работилницата имаат сесии  „Улогата на медиумите во известување за тероризам“, „Социјалните медиуми и тероризмот, вклучувајќи ја и  радикализацијата на интернет: ново виртуелно бојно поле“, како и „Улогата на пристапот со кој е опфатено целото општество – (и) како да се изградат делотворни контрааргументи на радикализацијата и насилниот екстремизам“.

Настанот е во организација на Регионалниот совет за соработка (РСС), а домаќин е Министерството за внатрешни работи на Црна Гора.

РСС е оперативно тело на земјите членки на Процесот за соработка во Југоисточна Европа, чиј полноправен член и основач е и Република Македонија.


Регионален собир за сузбивање на насилен екстремизам започна во Скопје


Скопје, 3 октомври, 2018 - 12:38 (META) 

Семинар за спречување и сузбивање на насилниот екстремизам на Западен Балкан започна денеска во Скопје, на кој учествуваат практичари од областа на безбедноста во регионот.

Министерот за внатрешни работи Оливер Спасовски и Генералниот секретар на Регионалниот совет за соработка (РСС) Горан Свилановиќ, на отворањето на семинарот ги нагласија важноста на регионалниот пристап кон растечките безбедносни предизвици, оценувајќи дека терористичките групи постојано го менуваат начинот на работа на терен и на интернет, што бара нови одговори на национално и на регионално ниво.

„Тероризмот и насилниот екстремизам ги сметаме не само глобална закана, туку и огромен ризик за Балканот. Во таа насока нашето министерство активно соработува со сите релевантни актери во сите аспекти на спречување и сузбивање на насилниот екстремизам“, изјави Спасовски.

Свилановиќ во своето обраќање потенцираше дека во променливо безбедносно опкружување активности се насочени кон решавање на прашањето на повратнците, нивната дерадикализација и реинтеграција, дијалог на заедницата со младите, сузбивање на насилниот екстремизам и пропагандата на интернет и поддршка на агенциите задолжени за овие прашања за спроведување на законските овластувања.

На семинарот, како што соопшти РСС, воедно се разговара и за моменталната состојба во Македонија на полето на дерадикализацијата, потоа за важноста од интегративното безбедносно управување и за Иницијативата за контра-тероризам на Западен Балкан.

Вториот дел од семинарот ќе биде посветен на повеќе сесии на кои ќе се презентираат практични искуства во справување со радикални наративи, пред се преку поделба на улогите на чинителите во тој процес, на важноста на спречувањето на радикализмот во затворите, значењето на радикализацијата преку он-лајн мрежите и како таа може да биде контекстуализирана во стратегиите за сајбер-безбедноста.

Семинарото го организраат Регионалниот совет за соработка и Министерството за внатрешни работи. Регионалниот совет за соработка е оперативно тело на земјите членки на Процесосот за сорабока во Југоисточна Европа, чиј полноправен челн е и Република Македонија.


РСС објави повик за грантови за развој на туризмот во земјите од Западен Балкан


Сараево, 16 јули, 2018 - 13:47 (META) 

Регионалниот совет за соработка (РСС) објави програма за доделување на грантови во вкупна вредност од 1,62 милиони евра за развој на туризмот во земјите од Западен Балкан.Парите се наменети за унапредување на инфраструктурата и квалитетот на услугите на културните и авантуристичките рути во регионот.

Со повикот кој ќе трае до 16 август годинава, се очекуваат понуди на субјекти од јавен и од приватен сектор во шест земји на Западен Балкан, по што ќе се доделат грантови за околу 30 или повеќе субјекти или проекти во поединечна вредност до 54 илјади евра, соопштено е од РСС.

На повикот се очекува да конкурираат локални и регионални организации што се занимаваат со туризам, туристички кластери, организации за образование и развој на туризмот, како и национални или паркови на природата.

Програмата за бесповратни финансиски средстав е составен дел од Проектот за развој и промоција на туризмот во вредност од пет милиони евра што го финансира ЕУ, а го спроведува РСС.

Регионалниот совет за соработка е интервладино оперативно тело на земјите членки на Процесот за соработка во Југоисточна Европа, чиј основач и полноправен член е и Македонија.


Пет милиони евра за заеднички туристички понуди на Западен Балкан


Сараево, 28 јуни, 2018 - 14:17 (META) 

Тригодишен проект за унапредување на туризмот преку заеднички туристички понуди во земјите од Западен Балкан, вреден пет милиони евра, беше промовиран денеска во Сараево.

Проектот, како што соопшти Регионалниот совет за соработка (РСС), треба да им помогне на земјите од Балканот да ги прошират и соединат туристичките производи од културниот и авантуристичкиот туризам.

„Во следните три години преку овој проект на РСС, ќе се доделат до 30 мали грантови во вредност од околу 50 илјади евра со цел на унапредување на инфраструктурата поврзана со културниот и авантуристичкиот туризам, при што првите јавни повици за грантови ќе бидат објавени веќе во средината на јули годинава – изјави Горан Свилановиќ, генерален секретар на РСС.

Активностите ќе бидат спроведувани со помош на владите, приватниот и невладиниот сектор, а крајната цел е привлекување што поголем број странски туристи.

Проектот ќе го спроведува РСС, а го финансира Европската унија. РСС е оперативно меѓувладино тело на Процесот за соработка во Југоисточна Европа, чиј основач и полноправен член е и Република Македонија.


Автоматско признавање на дипломите во Западен Балкан е се поблиску


Брисел, 26 јуни, 2018 - 17:19 (META) 

Министрите за образование од земјите на Западен Балкан, меѓу кои и од Македонија, ги поддржаа клучните принципи за автоматско признавање на академските квалификации во регионот, соопшти Регионалниот совет за соработка (РСС).

Овој напредок е направен на 7. министерски состанок на Платформата за образование и обука, за истражување и иновации, што беше организиран денеска во Брисел под покровителство на Европската комисија.

Станува збор за принципи кои се надградени врз основа на она што претходно го сработија Работната група на РСС и Иницијативата за реформи во образованието на Југоисточна Европа – ERI SEE, за признавање на квалификациите на Западен Балкан, што беше потенцирано и од генералниот секретар на РСС Горан Свилановиќ.

Принципите што беа поддржани од министрите, меѓу кои и од министерот за образование на Република Македонија Арбер Адеми, сочинуваат модел на автоматско признавање на академските квалификации, вклучувајќи транспарентни и фер процедури согласно со Лисабонската конвенција за признавање.


РСС: Само осум отсто од граѓаните во земјите во регионот учествувале на јавни протести лани


Виена, 11 јуни, 2018 - 11:31 (META) 

Учеството на јавноста во креирањето на политиките на земјите од Западен Балкан е тема на конференција која се одржува од денеска во Виена, на која учествуваат раководители на одели од министерствата за правда, министерствата за администрација и јавна управа и министерствата за европски интеграции на земјите од регионот.

Конференцијата ја организираат Регионалниот совет за соработка (РСС) заедно со Регионалната школа за јавна управа и Центарот за истржување на јавната управа од Австрија.

Целта на Конференцијата е да се подигне свеста кај властите во земјите од Западен Балкан (ЗБ) за зголемување на стандардите за вклучување на јавното мислење при креирањето на политиките што ги спроведуваат владите и нивните министерства. Притоа ќе биде дискуирано и околу неодамна усвоената Препорака за учество на јавноста во креирањето политики на ЗБ, донесена од министри на шесте земји од регионот.

На Конференцијата, како што соопшти РСС, ќе се претстави и дистрибуира цел сет на повеќејазични материјали за информирање на јавноста и подигање на свеста – леток со Препораката, видео материјал и брошура, со цел анимирање на јавноста околу оваа проблематика.

Според истражувањето на јавното мислење што го спроведува РСС секоја година – Балкански барометар 2017, само осум отсто од граѓаните во земјите во регионот учествувале на јавни протести, пет отсто јавно ги коментирале владините одлуки на социјалните мрежи, а само 3 отсто учествувале во јавни расправи.


Свилановиќ: Повеќе од 70 лица во Западен Балкан се осудени за тероризам


Тирана, 30 мај, 2018 - 13:29 (META) 

Од 2016 година до денес судовите во регионот на Западен Балкан осудија и затворија повеќе од 70 лица за тероризам и за учество во странски боишта, со вкупни пресуди од над 380 години – изјави денеска во Тирана генералниот секретар на Регионалниот совет засоработка (РСС), Горан Свилановиќ.

Зборувајќи на работен состанок на претставници на полициски и правосудни органи од земјите на Западен Балкан и други меѓународни претставници, Свилановиќ предупреди дека се регистрирани и се формираат нови видови терористички активности, особено во кибернетичкиот простор и има радикализација преку интернет, со што се наметнува потреба за проширување на регионалната соработка.

Претставниците од регионот расправаат за правните и полициските практики во слуачите на тероризам и насилен екстремизам, за процедурите на класификација и декласификација на документите во судовите за ваквите случаи, како и за унапредување на соработката помеѓу полициските органи и правосудството, во прекуграничната борба против тероризмот.

Ден претходно, како што соопшти РСС, во Тирана се одржа 10-тиот состанок на експертскиот Форум на кој учествуваат шефовите на воено-разузнавачаките агенеции од Југоисточна Европа. Тие разговарале за безбедносната состојба во регионот и направиле проценка на податоците од отворени извори, собрани во документот наречен „Предизвиците во кибернетичката безбедност –критична инфраструктура во Југоисточна Европа“.

Денешниот собир во Тирана го организираат албанската влада и Регионалниот совет за соработка – интервладино тело на земјите членки на Процесот за соработка во ЈИЕ, чиј основач и полноправен член е и Република Македонија.


Свилановиќ: РСС ја продлабочи регионалната соработка во сите сектори


Софија, 17 мај, 2018 - 15:22 (META) 

Регионалниот совет за соработка  (РСС) успеа со своите активности и со напорите на земјите од Западен Балкан да ја продлабочи регионалната соработка во речиси сите сектори, изјави денеска генералниот секретар на РСС, Горан Свилановиќ во Софија.

Говорејќи на Самитот на Европската унија и Западен Балкан во име на Советот, која што е единствена меѓувладина организација на земјите членки на Процесот за соработка во ЈиЕ (ПСЈИЕ), Свилановиќ подвлече дека резултатите се особено видливи во соработката за движењето на работната сила и економската и дигиталната поврзаност на регионот, како делови од Повеќегодишниот акциски план (ПАП), усвоен лани во Трст.

Резимирајќи ги извештаите добиени од шесте земји од регионот Свилановиќ, како што соопшти РСС, ги претстави главните резултати содржани во нацрт извештајот за спроведување на планот за заеднички економски простор (ПАП – ЗЕП).

Во однос на Инвестиционата агенда се вели дека сите шест економии од Западен Балкан ја поддржаа Регионалната агенда за реформи во областа на инвестициите со соодветна група на политики и го усогласија политичкиот документ за координација на финансиските пазари и диверсификацијата на пристапот кон пазарите на капиталот.

За Дигитална интеграција се вели дека регионот покрена политички дијалог на високо ниво за дигитализацијата на шесте земји од Западен Балкан, по пат на годишни дигитални самити, а првиот беше одржан во Скопје на 18 и 19 април 2018 година.

Советот ги повика тимовите за одговор на компјутерските безбедносни инциденти од шесте економии и нивните претставници ги вклучи во активности за изградба на капацитети, со што се засилуваат капацитетите за кибернетичка сигурност и се унапредува соработката меѓу тимовите од регионот. Освен тоа, РСС постигна спогодба постоечката Регионална спогодба за роамингот да се продолжи и да се воведе принципот во шесте земји „во роаминг, исто како дома“.

Во рамките на Агендата за мобилност, шесте економии од Западен Балкан ја поддржаа препораката за отпочнување преговори за спогодба за заемно признавање на стручните квалификации. РСС посредуваше и при усогласување на клучните принципи на заедничкиот модел за автоматско признавање на академските квалификации на Западен Балкан.

Свилановиќ го поздрави барањето на лидерите на шесте земји од Балканот да се зголемат уште повеќе напорите за спроведување на ПАП, за кој рече во заклучокот дека е одлично интерно усогласен со обврските во сите нивоа и во фаза на реализација, но и дека се потребни уште повеќе проекти и активности за неговото натамошно што поуспешно спроведување.

Регионалниот совет за соработка е меѓувладинот тело на ПСЈИЕ, чиј основач и полноправен челне е Македонија, а од минатиот самит во Трст му е дадена клучна улога да ја координира соработката во регионот.


Балканот ќе преговара за признавање на дипломите на лекарите, инженерите, архитектите…


Сараево, 7 мај, 2018 - 17:34 (META) 

Земјите од Западен Балкан наскоро треба да започнат преговори за заедничко признавање на стручните квалификации на докторите по медицина, стоматолозите, архитектите и инженерите, соопшти денеска Регионалниот совет за соработка (РСС).

Претставници на шест земји од регионот на денешниот состанок во Сараево во седиштето на РСС ја потврдија препораката, која всушност беше барање во Агендата за мобилност во рамките на повеќегодишниот акциски план за изградба на Регионален економски простор, што беше усвоен во Трст минатата година од премиерите на шесте земји од Балканот.

Крајната цел на препорачаните преговори е да се склучи спогодба за меѓусебно признавање на стручните квалификации, а со тоа би се постигнало поедноставување на добивањето дозволи за занимавање со одредена професија во земјите во регионот, изјави претставникот на РСС, Вања Урошевиќ.

Владите на шесте земји сега треба да оформат преговарачки тимови како и главен преговарач и негов заменик, со цел целиот процес да заврши до крајот на 2019 година. Покрај ова, работната група им препорача на владите да направат и заедничка база на податоци за мобилноста на стручните лица која би била компатибилна со базата на податоци на ниво на Европската Унија.