Пратениците ја усвоија одлуката на Владата за прераспределба на 1,6 милијарди денари


Скопје, 18 ноември, 2017 - 15:51 (META) 

Собранието на Република Македонија денеска со 51 глас „за“, 25 воздржани и ниту еден глас „против“ ја усвои одлуката на Владата за прераспределба на 1,657 милијарди денари меѓу буџетските корисници на централната власт и меѓу фондовите.

Со прераспределбата помеѓу буџетските корисници треба да се обезбедат средства за исплата на достасани обврски за сметка на проекти кај кои е забележано позабавено темпо на реализација.

Министерот за финансии, Драган Тевдовски, образложувајќи ја одлуката во Собранието, рече дека со отплата на долговите наследени од претходната власт, ќе се заштедат пари кои би се потрошиле за плаќање камати и за судски трошоци за ненамирени обврски.

Според координаторот на првата пратеничка група на ВМРО-ДПМНЕ, Илија Димовски, прераспределбата во буџетот за 2017 година ги покажува слабостите при планирање и реализација на средствата.

Парите ќе бидат пренаменети за да се исплатат долговите за изградбата на Македонската филхармонија, за албанскиот театар во Скопје, за театарот и за библиотеката во Тетово, објектот на Факултетот за драмски уметности, за опрема за МВР, како и за преводи на книги и за бесплатни учебници.

Пари се земаат од тие наменети за привремени вработувања, за минимална плата, за невладини организации, за реконструкција на згради на владини органи, за министерствата за одбрана, правда, надворешни работи и животна средина, како и од тие за изградба на основни училишта, за спортски сали и за студентски домови.


И Скопје ќе ги донира средствата планирани за дочек на Нова година


Скопје, 22 декември, 2016 - 10:50 (META) 

Градот Скопје се откажува од дочекот на Нова година што требаше да се одржи на плоштадот Македонија. Со оваа одлука, по Велес, Скопје е втор град во земјава што се откажува од прослава на Нова година.

– Средствата што беа планирани за организирање на дочекот и се во износ од околу 2 милиона денари, ќе ги донираме во социјални цели. Одлуката каде ќе бидат донирани средствата ќе ја донесе Советот на Град Скопје. Градот Скопје веќе 10 години наназад троши минимални средства за организирање на дочекот на Новата година затоа што забавата за граѓаните ја финасираа мибилните оператори во земјава, а годинава спонзор на забавата требаше да биде „Македонски телеком“ – се вели во соопштението на Град Скопје.

Иницијативата за откажување на новогодишните прослави на градските плоштади за парите да се пренаменат за хуманитарни цели, почна во Србија.

Под влијание на апелите на македонските твитерџии на социјалните мрежи ваквата практика да се примени и кај нас, општините почнаа да размислуваат да ги пренаменат планираните средства за прослава во хуманитарни цели.

Вчера и Општина Центар информираше дека прават анализа дали воопшто и колку од буџетот може да се заштеди и реално да се пренамени и ќе соопштат дали ќе се откажат од новогодишна прослава.


Ковачевски: Поднесовме амандмани со кои предвидуваме власта да скрати од луксузот


Скопје, 31 август, 2016 - 16:45 (META) 

Со амандманите кои ги поднесовме како опозиција, предвидуваме Владата да намали 10 милиони евра од градежни објекти за кои сметаме дека може да бидат изградени во нареден период затоа што сега е неопходно да се обезбедат овие средства за поплавените подрачја, изјави пратеникот Васко Ковачевски на вториот ден од расправата за ребалансот на буџетот на Комисијата за финансирање и буџет.

Според него, се предвидува да се скратат 300 милиони денари или 5 милиони евра од владата за економска промоција.

– Предвидуваме да се скратат и од министерството за финансии 390 милиони денари или 6,5 милиони евра од разни трансфери и непродуктивни трошоци. Од Агенцијата за странски инвестиции и промоција за економски маркетинг предлагаме да се скратат 80 милиони денари. Од Министерството за транспорт и врски да се намалат 1 милион евра за надградба и за реконструкција на управната зграда. Од Министерството за правда, исто така, за градежните објекти планираме и предлагаме да се намалат 32 милиони денари. Од Дирекцијата за технолошки индустриски зони од ставката други тековни расходи, предлагаме 30 милиони денари – изјави Ковачевски.

Според него, со ваквиот начин на прераспределба на овие средства, ќе можат да се обезбедат 36 милиони евра без дополнителни задолжувања, кредити и камати.


Кредитот предвиден за катна гаража, Општина Центар ќе го пренамени за изградба на новото училиште


Скопје, 12 јануари, 2016 - 10:52 (META) 

Градоначалникот на општина Центар, Андреј Жерновски, достави предлог до Советот на општината за основање ново општинско основно училиште.

– За изградба на училиштето, Општината ќе земе заем во износ од 297.750.000 денари. Ова задолжување нема да биде ново оптоварување на буџетот, туку практично пренамена на средства од веќе планирани задолжувања. Имено, Општината го раскина договорот, потпишан од претходниот градоначалник Тодоровиќ, за кредит за изградба на катна гаража кај „Нова Македонија“, а тоа планирано задолжување го пренаменува за училиштето. Со оваа одлука, новото општинското раководство одлучи приоритет да даде на изградба на ново основно училиште, а не на катната гаража – се вели во соопштението на Општина Центар.

Новото училиште ќе го носи името „Капиштец“, како населбата во која се наоѓа. Ќе има капацитет за 500 ученици и ќе беде лоцирано на улиците Васил Ѓоргов и Адам Мицкијевиќ, а ќе се простира на 10.600 квадратни метри, со планирана површина за градба на објектот од 3.142 квадратни метри. Училиштето ќе ги задоволи сите стандарди за современо образование.

Од Општина Центар додаваат и дека веќе е почнато расчистување на теренот за изградба на првото основно училиште во Капиштец.