!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Во железничка несреќа во Индија загинаа 96, а повредени се 150 патници


Канпур, 20 ноември, 2016 - 14:14 (META) 

Најмалку 96 лица загинаа, а повеќе од 150 патници се повредени во Индија откако од шини излетаа 14 вагони на воз во северната држава Прадеш, соопшти полицијата.

Инцидентот се случил во близина на градот Канпур, низ кој дневно поминуваат по стотина возови.

Индискиот премиер Наренда Моди на својот профил на „Твитер“ напиша дека неговите мисли се со семејствата на настраданите.

Сè уште се утврдуваат причините поради кои се случила несреќата.


Собранието го изгласа ребалансот на буџетот за настраданите во поплавите


Скопје, 19 септември, 2016 - 18:03 (META) 

Пратениците попладнево го изгласаа ребалансот на буџетот за 2016 година. Суштинска ставка во расходите е обештетувањето на жителите од поплавените села Стајковци, Смиљковци, Синѓелиќ, Ченто, Црешево и од другите настрадани села под Скопска Црна Гора.

Приходите во буџетот со ребалансот се непроменети и остануваат на ниво на проекцијата од 174.291 милион денари. Расходите се зголемуваат од 195.472 милиони денари на 197.410 милиони денари, а се зголемува и буџетскиот дефицит од 3,6 на 4 проценти. Дефицитот ќе изнесува 23.119 милиони денари, место 21.181 милион денари.

За ребалансот на буџетот гласаа и пратениците од опозицијата за парите побргу да стигнат до настраданите семејства.


Најмалку 10 загинати и 60 повредени во експлозија на Филипини


Давао, 2 септември, 2016 - 18:28 (META) 

Силна експлозија се случи во градот Давао на Филипини, а официјални лица потврдија дека има и настрадани.

„Најмалку 10 лица загинаа, а 60 се повредени,“ изјави портпаролот на претседателот, Ернесто Абеља.

Сè уште нема информации од што била предизвикана експлозијата.


Собрани 725.853 евра на солидарната сметка на Црвен крст и од телефонските броеви


Скопје, 18 август, 2016 - 15:03 (META) 

На жиро сметката на Фондот за солидарност на Црвен крст до денеска се уплатени 31.570.576 денари или 513.343 евра, а од донирањето на 100 денари со повик на телефоните: 075/070/077 143 400 собрани се 13.069.400 денари или 212.510 евра, или вкупно 725.853 евра.

До сега тимовите на Црвен крст дистрибуирале:

28.250 пакети со храна (еден пакет е наменет за 4 лица)
21.000 дневни оброци
9.700 топли оброци
1.948 конзервирана храна
17.619 литри млеко
15.422 литри јогурт
4.538 пакети со хигиена
683 бебешки пакети
265 тони вода
746 пакети пелени
556 душеци
4.392 ќебиња
600 килограми облека
734 парчиња чизми
332 литри дезинтал
98 градежни колички
126 лопати
1.036 маски

Генералниот секретар на Црвен крст, Саит Саити информираше дека деновиве се спроведуваат проценка и увид на претрпените штети по што ќе се знае кому треба да се поделат средствата. Парите ќе се делат на трансакциска сметка на секој корисник.


Над 350.000 евра собрани донации за настраданите во поплавите


Скопје, 14 август, 2016 - 16:07 (META) 

Над 350.000 евра се собрани на жиро сметката на фондот за солидарност при Црвениот крст за помош на погодените од поплавите.

Парични донации и понатаму се собираат преку телефонскиот број 143 – 400 од сите домашни мобилни оператори, а цената на еден повик е 100 денари.

Донираа многу компании, но и странски држави помогнаа со техничка помош и луѓе за испумпување на вода.


СДММ ќе организира солидарни акции низ градовите за поплавените подрачја


Скопје, 12 август, 2016 - 19:11 (META) 

Социјалдемократската младина на Македонија (СДММ) викендов низ повеќе градови низ државата ќе организира акции на коишто ќе бидат собирани донации.

– Најпотребна е конзервирана и храна која има подолг рок на траење како и вода и средства за хигиена, средства за чистење и дезинфекција – се вели во соопштението на СДММ.

Оттаму информираат дека младите активисти на СДММ од Скопје во меѓувреме продолжуваат со теренска помош и работа во поплавените региони.

Ги повикуваат сите граѓани да се вклучат во хуманитарните акции за собирање донации за граѓаните од настраданите подрачја.


Кубанската поетеса Морехон испрати порака со сочувство до настраданите во поплавите


Струга, 12 август, 2016 - 13:04 (META) 

Кубанската поетеса, Ненси Морехон, добитничка на „Златниот венец“ на Струшките вечери на поезијата во 2006 година, испрати порака со сочувство до настраданите во поплавите што го погодија Скопје и околината.

Пораката, Морехон ја упати преку Струшките вечери на поезијата.

„Драги пријатели, додека слушав вести, чув за природните катастрофи во Македонија, посебно во вашиот главен град Скопје, од каде сè уште в срце носам спомени. За време на моите две посети, посебно во 2006 година кога ми беше доделен „Златниот венец“, таму оставив дел од моите најубави чувства. Би сакала да ви кажам дека најискрено сум многу загрижена за тамошната ситуација. За жал, во моментов ги немам имињата и адресите на моите пријатели кои никогаш нема да ги заборавам. Преку вашата институција би сакала да ја споделам со поетската заедница во Македонија мојата грижа и грижата на многу други кубански поети. Искрено, Нанси Морехон“, стои во пораката од кубанската поетеса.


Деца од поплавените подрачја ќе бидат сместени во Охрид


Охрид, 11 август, 2016 - 13:46 (META) 

Детската градинка „Јасна Ристеска“, од Охрид, организира престој за поголема група деца од подрачјата погодени од саботните поплави. Децата ќе бидат сместени во објектот „Росица“.

Вратите за настраданите во поплавите ги отвори и средношколскиот ученички дом „Ванчо Питошески“ каде ќе бидат сместени воспитните тимови.

Иницијатор на оваа акција е општина Охрид, а се реализира во соработка помеѓу детските градинки „Јасна Ристеска“ од Охрид и „25 Мај“ од Гази Баба.


„Пивара Скопје“ и „Кока Кола“ донираа 100.000 евра за настраданите во поплавите


Скопје, 10 август, 2016 - 13:27 (META) 

„Пивара Скопје“ и компанијата „Кока Кола“ донираа 100.000 евра, вода и волонтерска помош за настраданите во поплавите.

Од компанијата соопштија дека донираат по еден камион пакувана вода дневно од почетокот на поплавата, која се дистрибуира до населението во најпогодените населби.

– Трагичните поседици од оваа катастрофална поплава длабоко не трогнаа сите. Нашата првична реакција беше да се обратиме до нашите долгорочни партнери во Црвен крст и да понудиме помош за оние на кои им е најпотребна во подрачјата најмногу погодени од оваа природна катастрофа – изјави генералниот директор на „Пивара Скопје“, Јован Радосављевиќ при посетата на пунктот на Црвен крст во „Момин поток“.

Исто така и повеќе од 70 вработени од компанијата се ангажирани на волонтерска основа во пунктот на Црвениот крст, каде ги подготвуваат прехранбените пакети за погодените семејства и го поддржуваат Црвениот крст со други активности.


Археолошкиот музеј в четврток организира крводарителска акција


Скопје, 9 август, 2016 - 15:09 (META) 

Археолошки музеј на Македонија во соработка со Црвениот крст на Република Македонија, в четврток од 10 до 14 часот, во просториите на музејот ќе организира акција за дарување на крв, за повредените од поплавите во Скопско и во Тетовско.

„Акцијата е под мотото „Вашата крв спасува животи – придружете ни се! и со неа и со вашата помош се надеваме дека ќе ја поттикнеме совеста и хуманоста кај луѓето на овој ден“, се наведува во соопштението.