Вкупно 150 лица доброволно се пријавиле на јавниот повик на министерот за здравство Беким Сали, кој вчера со објава на Фејсбук ги повика здравствените работници кои би се упатиле кон погодените места од земјотресот во Турција. Тој кажа дека денеска ќе го има прелиминарниот список на доброволци што ќе го понудат во Центарот за управување со кризи, а потоа преку НАТО комуникација со турските власти ќе ги информираат за човечките и материјалните ресурси кои ги има државата на располагање.
„Колеги здравствени работници, ве повикувам сите кои сте подготвени да учествувате во тековните хуманитарни активности во Република Турција по разорниот земјотрес. Вашето знаење и искуство во областа на медицината се непроценливи, а секоја помош во вакви случаи е добредојдена“, беше наведено во повикот на министерот.
Сали информира дека две комбиња, специјализирани за интензивна нега што ги добила како донација Клиниката за педијатрија, комплетирани со два тима од доктор, шофер и медицинска сестра, се подготвени да заминат до погодените места.
„Сепак, мора прво да се испочитуваат сите протоколи за комуникација, односно да го добиеме одговорот од Турција за тоа што конкретно им е потребно. Има и список на лекови кои ги обезбедивме преку компании и донатори кои исто така ги ставаат на располагање“, рече министерот.
Инаку, денеска на Клиниката за неврологија Сали присуствуваше на пуштањето во употреба на нов современ апарат за компјутерска томографија. Со овој апарат ќе се олесни дијагностиката за пациентите со мозочни удари и други заболувања, а во исто време апаратот овозможува и брзо снимање на пациентите, бидејќи снима само неколку секунди. Апаратот е обезбеден во соработка со Светска банка и е дел од опремата која е обезбедена за 14 јавни здравствени установи во земјата.
