!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ЕЛЕМ: Потрошувачката на струја е зголемена за 30 отсто во последните 24 часа


Скопје, 13 јануари, 2017 - 11:56 (META) 

Снабдувањето со електрична енергија за домаќинствата и за помалите компании на регулираниот пазар за електрична енергија се одвива континуирано и во согласност со потребите, велат од „Електрани на Македонија“ (ЕЛЕМ).

Во изминатите 24 часа е регистрирана за повеќе од 30 отсто поголема потрошувачка на електрична енергија во однос на вообичаената за овој период, но и покрај тоа, од ЕЛЕМ велат дека „целосно е одговорено на потребите на потрошувачите со оптимизација на домашните производствени капацитети и преку набавка на електрична енергија“.

„За потрошувачите на регулираниот пазар се испорачани 21.459 мегават-часови електрична енергија, од кои 17.859 мегават-часови, или 83 отсто, се обезбедени од домашните електроенергетски капацитети на ЕЛЕМ, а 3.600 мегават-часови, односно 17 отсто, се набавени од увоз. За првите 11 дена од годинава, домашното производство е натфрлено за 8,39 отсто во однос на планираното во енергетскиот биланс“, стои во соопштението од ЕЛЕМ.

Оттаму информираат дека сите расположливи капацитети за производство на електрична енергија на ЕЛЕМ се ставени во погон и испорачуваат во согласност со потребите на тарифните потрошувачи.

Според „Електрани на Македонија“, за денеска не е предвидена дополнителна набавка на електрична енергија и целосните потреби на потрошувачите на регулираниот пазар се обезбедени преку производство од домашните електроенергетски капацитети.

„Потрошувачката на електрична енергија постојано се следи и производството од домашните капацитети се адаптира во согласност со потребите на регулираниот пазар. Со оглед на најавите од ЕВН дека и претстојните денови се очекува и до 30 отсто поголема потрошувачка во однос на вообичаената за тој период, согласно распишаниот јавен оглас на ЕЛЕМ од 10 јануари за периодот од 14 до 22 јануари, во текот на вчерашниот ден е извршена набавка на вкупно 22.824 мегават-часови по просечна цена од 79,38 евра за мегават-час. Оваа цена е постигната при редовна постапка со негативна аукција“, се вели во соопштението од ЕЛЕМ.

Од „Еелектрани на Македонија“ нагласуваат дека набавката на електрична енергија што се врши во овој период, во услови на рекордна потрошувачка и екстремно ниски температури од кои е зафатен поголемиот дел од земјите во Европа, нема да влијае врз цената на електричната енергија за домаќинствата и за малото стопанство кои се на регулираниот пазар за електрична енергија.


ЕЛЕМ: Трошењето струја е зголемено за 30 проценти во однос на последните пет години


Скопје, 10 јануари, 2017 - 12:33 (META) 

Поради екстремно ниската температура, регистрирана е 30 проценти поголема потрошувачка на електрична енергија во однос на истиот период за последните пет години, се вели во соопштение на АД ЕЛЕМ.

–  Сите расположливи капацитети за производство на електрична енергија на АД ЕЛЕМ се ставени во погон. Дел од количествата се обезбедуваат на слободниот пазар во согласност со постојните правила и процедури усвоени од Регулаторната комисија за енергетика – посочуваат од компанијата.

Оттаму додаваат дека за дополнување на потребите во периоди од денот со најголема потрошувачка, вчера се набавиле 3.600 мегават-часа електрична енергија преку лиценцираните компании за трговија со електрична енергија.

– Набавката што ја изврши АД ЕЛЕМ е по просечна цена од 101,43 евра за мегават-час и е поевтина во однос енергијата што се продаваше на берзите во регионот. Временските услови од кои се погодени земјите од Југоисточна и од Централна Европа, директно влијаат и на цените на тој енергент. Во текот на вчерашниот ден, на берзата во Унгарија мегават-час електрична енергија во периоди на зголемена потрошувачка се продаваше за 126,3 евра, на берзата во Бугарија чинеше 123 евра, додека на берзата во Србија за истиот период се нудеше по цена од 140,3 евра – објаснуваат од ЕЛЕМ.

Од компанијата нагласуваат дека набавката на електрична енергија, што се врши во овој период, нема да влијае врз цената на електричната енергија за домаќинствата и за малото стопанство.

Термоелектраната „Битола 3“ очекуваат да проработи следните 72 часа.


Вучиќ во Москва ќе разговара за набавка на борбени авиони и на противавионски системи


Белград, 19 декември, 2016 - 15:02 (META) 

Премиерот на Србија, Александар Вучиќ, денеска изјави дека за време на неговата претстојна посета на Москва ќе разговара и за набавка на шест борбени авиони од типот „миг 29“, како и на протиавионски системи „бук“, за потребите на војската на Србија.

Вучиќ, кој на 21 декември ќе престојување во Москва, изјави дека Србија од Русија добила „многу добра цена“ за најсовремените ракети воздух – воздух.

Според српскиот премиер, Србија како воено неутрална земја, со набавката на авионите и на противавионските системи сака да ја осигури безбедноста на своите граѓани.

„Нашата доктрина е да го заштитиме нашиот народ и меѓународно признаените граници. Во услови на сè поголеми опасности, моравме да размислуваме како да ја унапредиме нашата борбена готовност“, вели Вучиќ.

Прашан дали договорот за набавка на авионите под пазарната цена оди заедно со договор за статусот на Рускиот хуманитарен центар во Ниш, Вучиќ рече дека регулирањето на статусот на центарот е „прашање за кое треба да одлучи владата на Србија, а не ценовник“.

„Не го ставам тоа прашање на маса во Москва и не мислам дека тоа е тема на нашите разговори“, рече Вучиќ.

Инаку, Русија сака Србија на персоналот во хуманитарниот центар во Ниш да му даде дипломатски статус, каков што имаат и војниците на НАТО.


Како „Финзи“ преку опремата за прислушување го оштетила буџетот


Скопје, 28 септември, 2016 - 13:33 (META) 

Специјалното јавно обвинителство на прес-конференција ја презентираше новата истрага наречена „Трезор“, која се однесува на економски криминал.

Како што појасни обвинителката Фатиме Фетаи, постојат основани сомнежи за три раководни лица од Управата за безбедност и контратразузнавање и за едно лице од МВР. Во истражната постапка, според Фетаи, било утврдено дека четрвтоосомничениот вработен во МВР им помогнал на првите тројца осомничени, раководни лица од УБК, да ѝ овозможат на компанијата „Финзи“, со која управувал сега починатиот Коста Крпач, да оствари имотна корист во вредност од 862.045 евра.

Оваа компанија, всушност, посредувала во набавката на електронска и комуникациска опрема меѓу Министерство за внатрешни работи и компанија во Велика Британија, чие име во предистражната постапка не се открива.

Наместо набавките на опремата да одат директно меѓу МВР и компанијата од Велика Британија, „Финзи“ посредувала во набавките и при фактурирање кон МВР ја зголемувала набавната цена на опремата, па со нејзино продавање по повисока цена од набавната го оштетила буџетот на РМ.

sjo14

Графички приказ на патот на парите меѓу „Финзи“, МВР и компанија од Велика Британија

Но, како оделе набавките?

Во периодот од јули 2010 година до крајот на 2012 година, првите три осомничени лица ја искористите службената положба и овластувања и за компанијата „Финзи“ прибавиле имотна вредност во вкупно од 35.488.294 денари или 577.045 евра.

За четвртоосомничениот постои основан сомнеж дека како службено лице со умисла им помогнал на осомничените во реализацијата.

– Првите тројца осомничени за да набават опрема за потребите на МВР и на УБК, на 7 јули 2010 се сретнале со претставници на компанија од Велика Британија и договориле набавка на електронска и на комуникациска опрема за потребите на петтата управа. Но, наместо опремата да биде набавена директно од компанијата од Велика Британија, како најевтин начин на набавка, истата требала да се набави од „Финзи“ – изјави јавната обвинителка Фатиме Фетаи.

Кога биле дефинирани начинот, условите и цената на набавка на орпемата, првите двајца осомничени по враќањето во Македонија му наложиле на сведокот, кој е вработен во МВР, да почне со постапка за набавка на опремата од компанијата „Финзи“ без да се спроведе тендер.

finzi

Графички приказ на времето и сумите на склучените договори

Компанијата „Финзи“ потоа доставила понуда за набавка до МВР, по што бил изготвен договор за купопродажба меѓу МВР и „Финзи“ и на 26 ноември 2010 година склучен е договорот за купопродажба со вкупна вредност од  124.293.233 денари со ДДВ.

– Според доказите, „Финзи“ извршила увоз на опремата од правното лице од Велика Британија со вкупен износ од 89.322.845 денари или 1.452.403 евра, а истата опрема „Финзи“ ја префактурирала спрема МВР за вкупен износ од 124.293.233 денари со ДДВ или 2.021.028 евра. Од ова произлегува основано сомневање дека била прибавена имотна корист која надминува значителна сума од 22.265.449 денари или 362.039 евра. Ова е разлика меѓу набавната цена на опремата и цената што е фактурирана кон МВР – додаде обвинителката Фетаи.

Во 2011 година биле склучени два анекси на главниот договор, меѓу другото и за одржување на опремата која, главно, била нефункционална, во вредност од 30.000 евра месечно. Оваа опрема, книговодствено во МВР била заведена со вредност од еден денар.


МО: СДСМ нема елементарни познавања за набавката на опрема и за модернизацијата на АРМ


Скопје, 25 август, 2016 - 16:12 (META) 

Модернизацијата на Армијата на Република Македонија е сериозен процес, на кој Министерството за одбрана, Генералштабот и Армијата пристапуваат професионално, се вели во реакцијата на Министерството за одбрана на денешното соопштение на СДСМ, во кое опозициската партија бара министерството да го поништи тендерот за набавка на опрема вредна 250 милиони евра.

„Министерот Јолевски повеќепати, вклучително и вчера, на неколку национални телевизии детално информираше за овој значаен процес. Сепак, уште еднаш ќе појасниме дека целата модернизација (набавка на нова опрема и ремонт) ќе чини нешто повеќе од 300 милиони евра, вклучувајќи и ДДВ, а без ДДВ и царина околу 250 милиони евра. Затоа, изненадени сме од фактот што СДСМ упорно тврди дека набавката на оклопни возила ќе чини 250 милиони евра. Процесот за аквизиција сè уште не е завршен, но сигурни сме дека цената за набавката на оклопните возила ќе биде неколкупати помала. Кога се коментираат работи поврзани со националната одбрана, заради значењето на областа, треба да бидат издржани и базирани на факти и на анализи, а не на шпекулации“, стои во реакцијата на Министерството.

Оттаму велат дека постапката е спроведена со најголема сериозност, а во неа, според министерството, биле вклучени професионалци – припадници на Армијата, кои ги кажале нивните потреби, барања и ги дефинирале спецификациите за опремата што треба да се набави.

„Како што посочивме многупати досега, во процедурата на набавка ќе бидат земени предвид единствено понудите што ги исполнуваат строгите услови во согласност со НАТО-стандардите, по што како домаќинска Влада и Министерство, предвид ќе ја земеме и цената. Споменатите оклопни возила се дел од партнерските цели на Република Македонија за членство во НАТО. Во поглед на одржувањето на борбените системи, би сакале да истакнеме дека доколку СДСМ ги следеше вчерашните интервјуа на министерот Јолевски, ќе знаеше дека токму во тендерската документација се побарува овие системи, вклучувајќи ги и оклопните транспортери, да можат да се одржуваат токму во Република Македонија, од припадници на АРМ кои ќе бидат обучени од производителот“, велат од МО.

Според министерството, плаќањето на опремата ќе се одвива до 2026 година и тоа нема да биде само од еден годишен буџет.

„И најобичниот познавач на оваа проблематика, знае дека вака скапи средства не се набавуваат од еден годишен буџет. Ниту најбогатите земји во светот не го прават тоа. Затоа сосема логично е Македонија да ја исплаќа оваа опрема во подолг временски период, во кој, повторно, ќе внимаваме да имаме најдобра и економски најисплатлива понуда“, додаваат од Министерството за одбрана.


МО: Шпекулација е наведената сума од 250 милиони евра за набавка на оклопни возила


Скопје, 17 август, 2016 - 18:52 (META) 

Модернизацијата на армијата за секоја држава е стратегиско прашање, кое не треба да се гледа од краткорочен аспект, се вели во реакцијата на Министерството за одбрана на денешната прес-конференција на Петре Шилегов од СДСМ.

Од Министерството велат дека во јавноста неосновано се пласираат информации за набавка на опрема, која е во насока на модернизација на армијата и посочуваат дека процесот на набавка на оклопни возила бил започнат уште во октомври 2014 година.

Оттаму, наведуваат дека сумата од 250 милиони евра, која што се споменува е за период од 12 години, заклучно со 2027 година и е наменета за транспортни средства, средства за индивидуална и колективна заштита, средства за вооружување (борбени и неборбени), логистичка и медицинска опрема, како и за ремонтот и модернизацијата на материјално – техничките средства, а не само за оклопни возила.

„Оваа информација досега неколку пати беше пласирана во јавноста, но вие очигледно не сте ја слушнале ниту пак виделе. Напоменуваме дека финалните понуди од произведувачите, кои потекнуваат од земји членки на НАТО сè уште не се пристигнати и затоа изнесените факти се чиста шпекулација. Понатаму, битно е да се истакне дека тоа се директни понуди од производителите, а не од трговци. Министерството за одбрана и Владата на Република Македонија ќе продолжат со своите активности во насока на модернизирање на опремата и подигнување на стандардот на припадниците на АРМ“, велат од Министерството.


ДИК купува таблет-компјутери од 700 евра


Скопје, 23 декември, 2015 - 15:34 (META) 

Државната изборна комисија ја избра понудата на фирмата „Адванс медија“ за набавка на таблет-компјутери за членовите на комисијата. Според договорот со фирмата, ДИК ќе купи 12 таблет-компјутери по цена од 44.000 денари без ДДВ или по 713 евра за еден таблет-компјутер. Првичната процената вредност на огласот објавен на електронскиот систем за јавни набавки (ЕСЈН) беше 255.000 денари без ДДВ, а сега, по повторената постапка, набавката чини вкупно 528.000 денари без ДДВ.

На 12 ноември беше објавен првиот оглас за набавка, а крајниот рок за пријавување беше 19 ноември. Сепак, комисија од ЕСЈН утврдила дека тендерската документација содржела битни пропусти и недостатоци, па предложи тендерот да биде поништен.

На повторениот тендер, била избрана „Адванс медија“, која понудила најниска цена од сите пет кандидати. За оваа постапка не се спроведе јавно отворање на понудите, а најниската цена беше основниот критериум за тендерот.


Жичената ограда за јужната граница Македонија ја набавила од Унгарија


Будимпешта, 10 декември, 2015 - 18:37 (META) 

Жичената ограда со која се оградени и дополнително се оградуваат делови од македонско-грчката граница, поради мигрантската криза, Македонија ја набавила од Унгарија, објави хрватската државна телевизија ХРТ.

Унгарците беа првите кои подигнаа жичена ограда на својата граница за да го спречат протекот на мигранти на нивна територија, а сега, како што јавува ХРТ, бодливата жица им е еден од најголемите и најдобри извозни производи.

Покрај Македонија, жичена ограда за своите граници од Унгарија набавиле и Австрија и Словенија, а нови нарачки пристигнувале секој ден.

„Гјорги Баконди, комесар на унгарската влада за еконимија, се пофали дека деновиве испратиле нарачка која пристигнала од Македонија. Станува збор за голема пратка од дури 10.000 метри (10 километри) бодлива жица, која нивната влада наскоро треба да ја постави на границата со Грција“, пишува ХРТ.

Како што објавува телевизијата, жицата се произведува во гратчето Марианоштра, оддалечено десетина километри од Будимпешта, кое досега било познато само по најобезбедуваниот затвор во Унгарија.

Бодливата жица, всушност, е главниот производ што го изработуваат околу 700 затвореници во Марианоштра.

Македонските власти на 28 ноември подигнаа жичена ограда на македонско-грчката граница кај котата 59, во близина на Гевгелија, а денеска Армијата на Република Македонија (АРМ) почна со поставување ограда и кај граничниот премин Меџитлија во близина на Битола.


СДСМ: За два „телевизора“ Груевски потрошил 900.000 евра од буџетот


Скопје, 28 ноември, 2015 - 15:20 (META) 

Социјалдемократскиот сојуз на Македонија (СДСМ) денеска обвини дека за два месеци премиерот Никола Груевски потрошил над 900.000 евра од државниот буџет за набавка на ЛЕД екрани за, како што велат од партијата, „рекламирање на неговите виртуелни политики“.

„Минатиот месец, на 30 октомври Груевски склучил договор за ЛЕД екран и негова монтажа од околу 340.000 евра. Овој месец, на 17 ноември, распишан е нов тендер за нов ЛЕД екран тежок неверојатни над 520.000 евра. Еден ден подоцна, на 18 ноември, објавен е уште еден тендер за монтажа на половина милионскиот ЛЕД екран. За тоа Груевски ќе извлече од граѓаните уште 58.000 евра народни пари. Додека 1.000 рударски семејства месецов останаа без егзистенција, над 180.000 граѓани живеат со 40 денари на ден, примателите на социјална помош живеат со 22 денара на ден, 500.400 граѓани на Македонија живеат под линијата на сиромаштија, Никола Груевски ќе потроши над 900.000 евра за два телевизора“, стои во соопштениот на СДСМ.

Според СДСМ, ЛЕД екранот, вреден околу половина милион евра ќе биде поставен на палата АСНОМ, во која е сместен Секретаријатот за европски прашања, додека за другиот засега нема информација каде ќе биде поставен.


МВР: Чоколадите се за посебните единици


Скопје, 27 октомври, 2015 - 16:13 (META) 

Чоколадите што Министерството за внатрешни работи (МВР) ги набавува преку тендер за сума од 4.743.000 денари или околу 77.000 евра, се „за потребите на посебните единици во рамките на Министерството“, одговорија од МВР на прашањето на „Мета“ зошто се набавуваат толку чоколади и за какви потреби?

„Предметот на набавката, кој е во согласност со годишниот план за јавни набавки, е за потребите на посебните единици во рамките на МВР за таков вид прехранбен производ, како и врз основа на реалните потреби. За наведените услови (критериуми за исполнување на способност и барањата од техничката спецификација) кои се наведени во огласот објавен од МВР, известуваме дека истите се пропорционални со предметот на набавката, а како потврда за тоа се и решенијата од Советот за јавни набавки, во кои се дава согласност за почнување на постапка со предвидените услови во огласот“, стои во писмениот одговор од МВР.

Оттаму велат дека сумата од 77.000 евра е проценета вредност на набавката и дека не станува збор за конечен износ во оваа фаза на постапката.

„Проценетата вредност на предметот на набавката е со износ на 4.743.000,00 денари без ДДВ и истата е проценета вредност, бидејќи набавката во согласност со податоците од огласот е во фаза на јавно отворање на пристигнатите понуди. Проценетата вредност не е вредност која е конечна во оваа фаза на постапката, бидејќи следи фаза на евалуација, фаза на електронска аукција и фаза на донесување одлука за избор, односно поништување“, велат од МВР и додаваат дека министерството „врши набавка и на други прехранбени производи во согласност со планот за јавни набавки, а за потребите на посебните единици“.

МВР огласот за набавка на чоколади го распиша на 6 октомври, а последниот рок за пријавување на фирмите беше заклучно до вчера (26 октомври).