!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Пијан возач влета во толпа и повреди 28 лица во Њу Орлеанс


Њу Орлеанс, 26 февруари, 2017 - 10:32 (META) 

Пијан возач влета во толпа, при што 28 лица се повредени, меѓу кои и деца, јавија американски медиуми. Луѓето ја гледале главната парада на карневалот „Марди грас“ во центарот на Њу Орлеанс.

Шефот на локалната полиција, Мајкл Харисон изјави дека не станува збор за терористички напад, туку дека возачот бил, или пијан или дрогиран.

– Се сомневаме дека осомничениот бил доста интоксициран – изјави Харисон.

Во инцидентот е повредена и една припадничка на полицијата на Њу Орлеанс.


Почнува карневалот во Рио де Жанеиро


Рио де Жанеиро, 24 февруари, 2017 - 20:36 (META) 

Во Рио де Жанеиро, кој не е ниту главен, ниту најголем град на Бразил, но е секако најпознатиот, денеска, како и во други места во големата јужноамериканска земја, почна карневалот.

Карневалот во Рио е можеби најпознатиот на светот, а наскоро градските власти на овој крајбрежен мегалополис ќе му ги предадат клучевите на градот на „Момо“, односно годинашниот дебел крал на карневалот, кој е водач на карневалската забава.

Карневалот во Рио ќе трае пет дена, а се очекува да го проследат огромен број гости од земјата и од странство, и покрај рецесијата и штрајковите на полицајците.

Градските власти на Рио се надеваат дека карневалот ќе привлече повеќе од милион посетители и ќе донесе околу милијарда американски долари во градската каса.


Денеска на Вевчанскиот карневал, главната атракција – дефиле на маските


Вевчани, 13 јануари, 2017 - 9:58 (META) 

На Вевчанскиот карневал денеска главната атракција е дефилето на маските, или суратите, како што се нарекуваат на локалниот дијалект.

Од повеќе маала ќе тргнат поворките со повеќе од илјада василичари, кои ќе се спојат на плоштадот пред зградата на Општина Вевчани.

Никој однапред не открива со какви маски, односно пораки, ќе излезат вевчанци годинава. Тоа се смета за најстрога тајна во милениумската традиција, иако со сигурност се знае дека политиката, повторно, ќе биде во центарот на вниманието.

Во културниот дел, од 21 часот, ќе пеат Анета Наковска и вевчанецот Ефто Пупиновски, со чиј настап ќе биде пречекана Православна нова година.

Синоќа, во Вевчани настапија женскиот бенд од Нови Сад „Фрајле“, дуото „ДНК“ и групата „Нокаут“.

Вевчанскиот карневал завршува утре, со традиционалното палење на маските.


Денеска почнува „Вевчанскиот карневал“


Струга, 10 јануари, 2017 - 11:07 (META) 

Годинешниот „Вевчански карневал“ почнува денеска со културни настани предвидени за оваа манифестација.

Програмата денеска е во знакот на одбележувањето на верскиот празник Свети Василиј Велики, заштитник на вевчанските василичари и на Вевчани, додека формалниот почеток на карневалот е в четврток.

Денеска, со почеток во 17 часот, во Клубот на пензионери во Вевчани ќе се одржи трибина на тема „Перспективите на руралниот туризам во Република Македонија со осврт на општина Вевчани“. Утре ќе биде извршена промоција на романот „Пред шарени врати“ од Косте Шутиноски.

Изложбата на слики од академскиот сликар Ниче Василев ќе биде отворена на 12 јануари (четврток) во 12 часот, во Клубот на пензионери.

Забавниот дел ќе почне на 12 јануари во 21 часот, со настап на домашните групи „ДНК“ и „Нокаут“, а пред полноќ ќе се претстави групата „Фрајле“ од Србија.

На 13 јануари, во 21 часот, присутните ќе ги забавува фолк-пејачката Анета Наковска, додека православната Нова година ќе биде пречекана со настапот на вевчанецот Ефто Пупиноски.

Традиционалното дефиле на маските ќе се одржи на 13 јануари, по 14 часот.

Карневалот завршува на 14 јануари, со традиционалното палење на маските.


„Фрајле“ и 1.500 василичари ќе ги забавуваат посетителите на Вевчанскиот карневал


Скопје, 4 јануари, 2017 - 14:40 (META) 

Околу 1.500 василичари ќе учествуваат на годинешниот Вевчански карневал, на кој главна атракција ќе биде женскиот бенд од Нови Сад „Фрајле“, соопшти денеска на прес-конференција во Скопје градоначалникот на Општина Вевчани, Цветомир Угриновски.

Според програмата на карневалот, од домашната сцена ќе настапат дуото „ДНК“ и групата „Нокаут“, додека од фолк-сцената, посетителите и туристите ќе ги забавуваат Анета Наковска и Ефто Пупиновски.

Градоначалникот Угриновски потсети дека документите сведочат дека карневалот е стар најмалку 1.460 години, но постојат археолошки наоди кои упатуваат на податоци дека карневалот постои барем 2.200 години.

– Денес карневалот е интересно и необично преплетување на пагански со христијански обичаи. Традиционално, учесниците се обидуваат да избегнат воведување на современи карневалски елементи, но, сепак, во последните години во организација на Општината и на Министерството за култура, се воведува ред во овој инаку хаотичен вонвременски настан – истакна Угриновски.

На презентацијата на програмата присуствуваше заменик-министерот за култура, Драган Недељковиќ.

Годинава, музичката и промоциска продукција „Пасворд“ е организатор на музичкиот и на забавниот дел на карневалот. Музичкиот дел почнува на 12 јануари, од 21 часот.

На 13 јануари во 13 часот е традиционалното дефиле на маските, кое ќе трае цело попладне, а потоа ќе следи вториот музички ден.

Вевчанскиот карневал завршува на 14 јануари со традиционалното палење на маските.


За време на карневал во Келн, регистрирани 22 сексуални напади


Келн, 6 февруари, 2016 - 18:51 (META) 

Германската полиција соопшти дека биле регистрирани 22 сексуални инциденти за време на карневалските свечености во западногерманскиот град Келн.

Речиси 200 лица биле притворени за нарушување на јавниот ред, додека едно лице е уапсено и обвинето за напад и за силување.

Мерките за безбедност годинава се значително зголемени и на улиците има повеќе од 2.500 полицајци.

Ваквата одлука на германските власти доаѓа по големиот број инциденти во Келн што се случија за време на новогодишната ноќ, кога беа регистрирани голем број сексуални напади и грабежи.


Џоломарите од Тиквешијата на карневал во Словенија


Кавадарци, 6 февруари, 2016 - 18:15 (META) 

Џоломарите од кавадаречкото село Ресава заминаа на карневал во словенечкиот град Птуј.

– Ќе бидеме дел од карневалскито дефиле, кое ќе се одржи денеска и в недела. Ќе ја промовираме историјата, традицијата и културата на Тиквешијата. Со лицата исцрнети со саѓи, страшните кожувчиња, вревата од клопотарците и со стаповите, ќе ги избркаме злите духови и ќе направиме место за среќата и за позитивната енергија – вели Никола Ризов, кој е дел од џоломарската група.

Џоломарската тајфа од Ресава е надалеку позната по мистичноста на маските на џоломарите, кои со векови привлекуваат внимание со нивните пагански игри и ритуали.


Дваесет загинати на уличен карневал на Хаити


Порт-о-Пренс, 17 февруари, 2015 - 14:21 (META) 

Најмалку 20 лица загинаа, а 46 се повредени од струен удар на карневалот во Порт-о-Пренс, главниот град на Хаити.

Несреќата се случила во време кога на улиците се наоѓаат илјадници луѓе на годишната прослава.

Очевидци велат дека некој од масата со штица ја допрел жицата што пренесувала струја за да може карневалското возило да мине под неа. Некои од жртвите загинале од струен удар на самото место. Останатите скокнале од возилото, по што меѓу насобраните настанала паника.


Германија откажа карневал поради терористички закани


Брауншвајг, 15 февруари, 2015 - 16:46 (META) 

Германската полиција нареди откажување на традиционалниот карневал во северниот германски град Брауншвајг поради „специфични закани од исламистички напади“, соопшти германската полиција.

Карневалот, кој денеска требаше да почне, е откажан откако безбедносните служби добиле информации за потенцијални напади.


Студент поднесе кривична пријава против Вевчанскиот карневал


Струга, 23 јануари, 2015 - 13:53 (META) 

Златко Јакимовски, студент во трета година на Правниот факултет „Јустинијан Први“, до Обвинителството во Струга поднесе кривична пријава против непознати сторители за убивање, мачење и за нанесување непотребни болки на животни на Вевчанскиот карневал, кој се одржа во периодот од 10 до 15 јануари годинава,  јави  „Академик“. 

– Оваа кривична пријава ја поднесов како граѓанин, но, пред сè, како човек кој од својата најрана возраст е посветен на кинологијата, наука што се занимава со изучување на кучињата. Ова дејство е казниво во согласност со македонскиот Кривичен законик, според член 233, именуван „мачење животни“. Со интенција ја поднесов неколку дена по случувањето бидејќи мислев дека со пријава ќе реагираат, пред сè, надлежните органи сами или, пак, некое од многубројните здруженија за заштита на животни. Но, бидејќи изостана каков било акт од нивна страна, се чувствував морално должен да дадам предлог до ОЈО Струга да поведе соодветна постапка – изјавил Јакимовски.

Тој истакнува дека го почитува како традиција најстариот карневал во нашата држава, но истовремено оценува дека изведбите на неколкуте учесници, освен што се невкусни, неморални, нечовечки, се и казниви во согласност со македонското позитивно казнено право.

– Сакам да верувам дека овојпат нема да недостига навремена реакција и дека нема да биде уште еден неуспешен обид на патот до правдата – вели  Јакимовски.

За случувањата на Вевчанскиот карневал реагираше и  Федерацијата на европски карневалски градови. Оттаму стигна соопштение дека ќе го ревидираат ставот кон карневалот во Вевчани.