Филипче: Бројот на загинатите е 14, не 15, а седум се во критична состојба


Скопје, 14 февруари, 2019 - 12:47 (META) 

Не се основани шпекулациите дека починал уште еден од повредените во вчерашната автобуска несреќа, и дека бројката се искачила на 15 загинати, соопшти министерот за здравство Венко Филипче претпладнево, по посетата заедно со премиерот Зоран Заев и вицепремиерот Бујар Османи, кој инаку е хирург, на полесно повредените кои се хоспитализирани во скопската Градска болница „8 Септември“.

Премиерот Заев се заблагодари и на итната помош, на полицијата и пожарникарите, како и на „8 Септември“ и на Клиничкиот центар, како и на тетовската болница, но исто така и на локалното население што прво притрчано да помага на повредените.

– Сакам да се заблагодарам на „8 Септември“ каде сме сега, на Клиничките центри, сите други јавни институции и во Тетово и во Гостивар, но и на полицајците и пожарникарите и на сите други јавни служби кои беа со желбата да помогнат на луѓето и да учествуваат во нивното спасување.  Сакам да се заблагодарам од името на Владата за солидарноста и хуманоста на нашите сограѓани од селото кошто притрчаа во првиот момент и буквално покажаа човечност, големина. Владата е подготвена да помогне за се што треба, за повредените, секако и за семејствата на загинатите. Навистина огромна трагедија, која ја обви во тага целата наша земја – порача премиерот Заев.

И министерот Филипче изрази сочувство до семејствата на загинатите, како и благодарност до локалното население.

Тој уверуваше дека сите возила на Итна помош од Скопје веднаш по дојавата се упатиле кон местото каде излета и се преврте автобусот на Дурмо Турс и изрази огромна благодарност до приватните болници „Аџибадем Систина“ и „Неуромедика“ бидејќи веднаш ги испратиле своите возила за Итна помош за да помогнат во помагањето и превезувањето на повредените.

-Исклучително брзо и промптно реагираше службата за Итна помош, на ефикасен и професионален начин дадоа брза помош. Мора да дадам благодарноста на двете приватни болници кои излегоа во пресрет со нивните амбулантски возила и ги транспортираа повредените овде во „8 Септември“. 80 отсто од персоналот беше на работа за вмногу краток временски интервал од 15 минути и се организираше системот, се направи тријажа и се сместија во соодветните оддели за лекување тука и во Клиничкиот центар. Во овој момент во „8 Септември“ има четири пациенти кои се во одделот за интензивна нега и се во критична состојба, и уште тројца пациенти кои се во Клиничкиот центар во одделот за интензивна, врз кои во текот на ноќта се изврши хируршка интервенција и тие утрово се во критична состојба. Искрено се надевам дека овие 7 пациенти ќе ја надминат оваа криза и понатаму ќе го продолжат лекувањето – рече Филипче, појаснувајќи дека ноќеска е оперирана уште една пациентка во „8 Септември“ која уште е во критична состојба.


На Итната помош во Македонија итно ѝ е потребна помош (видео)


Скопје, 9 февруари, 2019 - 8:00 (META) 

Службата за итна помош во Македонија нема доволно тимови и е неефикасна. А (не)културата на граѓаните, исто така влијае за нивната бавна реакција. За околу 2 милиони жители во функција се само 156 амбулантни возила, пренесува „Порталб.мк“.

Согласно Уредбата за итна медицинска помош, во Македонија, за 1 милион и 991 илјада жители, како што е наведено во уредбата, има 285 тимови, а би требало да има 303 тимови.

Здравствениот дом Скопје и домот во Тетово ја прекршуваат Уредбата, затоа што Скопје мора да има 64 тимови за Итна помош, а има само 45. Од друга страна, Тетово мора да има 21 тимови на итна помош, а има само 13.

Амбулантните возила се амортизирани и застарени

Покрај недоволниот број екипи, на неефикасноста на Службата за итна медицинска помош влијае и актуелната состојба на амбулантните возила. Повеќето од возилата на Итна помош се амортизирани и застарени. Имало случаи во кои поради тоа се загубени човечки животи.

За да се надмине ова, Министерството за здравство вети замена на амбулантните возила врз основа на километражата, со што не се согласуваат автомеханичарите, бидејќи тие бараат замената на возила да биде врз основа на километражата за градовите надвор од Скопје, додека во Скопје, замената да се изврши врз основа на употребливоста, односно состојбата во која што е возилото.

За амортизацијата и староста на возилата на Итна помош алармираше и министерот за здравство, Венко Филипче, кој на 17 ноември минатата година кажа дека ќе бидат купени 12 амбулантни возила, за, како што рече, „да се подобри хаотичната состојба на оваа служба”.


Нови возила ќе бидат нарачани најдоцна до 4 април

Договор за набавка на 12 нови возила за Итна помош е потпишан договор на 7 декември минатата година, откако беше избрана најниската понуда во износ од 21.591.564 денари (351.000 евра). Едно амбулантно возило ќе чини 1.799.297 денари (29.250 евра), за половина поевтино од последните 70 возила кои беа набавени во 2012 година. Едно од возилата во 2012 година чинело 3.921.429 денари (63.760 евра).

Во практика, возилата и по два месеци од склучувањето на договорот, не се нарачани од компанијата што победи на тендерот на Министерството за здравство – „Аутомотив груп“. Рокот за испорака на возилата е 120 дена од денот на потпишувањето, односно истекува на 4 април годинава.

-Ние потпишавме тендер со Министерството за здравство, а тендерот предвидува датуми до кога ќе можеме да нарачаме возила. Возилата сè уште не сме ги нарачале – вели Симона Николовска, одговорна за маркетинг-секторот во “Автомoтив груп”.

Нема критериуми како ќе се распределуваат новите возила

Шест од 12-те нови амбулантни возила се планирани за Скопје, но никој не знае кој ќе ги добие другите, бидејќи не постојат јасни критериуми за распределба. Министерот Филипче рече дека нема конкретни критериуми за начинот на распределба на возилата, но директорите на Здравствените домови ќе бидат прашани за нивните потреби .

-Тоа ќе се прави врз основа на моменталната состојба на возилата кои сега ги има на располагање Итната помош. Да бидеме реални, постојат здравствени домови кои велат дека не ни требаат возила – изјави Филипче за „Порталб.мк“.

Нови возила треба да добијат здравствените домови кои имаат амортизирани и застарени амбулантни возила, но и таму каде што бројот на тимови и амбулантни возила не е соодветен на бројот на населението, како што случајот е со здравствените домови Кичево, Пробиштип, Тетово, Куманово, Гостивар , Велес и Дебар. Сите тие имаат поднесено барања за амбулантни возила, освен Тетово, од каде побарале само дополнителни тимови.

Во име на болницата, поднесовме барање за возило и го доставивме до Министерството за здравство. Имам податоци дека за Дебар е определено  едно возило – вели директорот на Општата болница со проширена активност во Дебар, Баки Алили.

Ние побаравме да ни се одобри и кредит, за да купиме ново возило, но не знам што ќе се случи. Ми ветија дека ќе ми дадат едно возило, и тоа би било доволно за да служиме во Кичево. Покрај Кичево, ние ја покриваме и територијата на Македонски Брод и Пласница – вели директорот на Здравствениот дом Кичево, Џабир Бајрами.

Сега е поднесено барања за две нови возила – рече директорот на Здравствен дом Кочани, Александар Серафимов.

Од Министерството ни ветија дека ќе ни дадат едно од новите возила од тендерот, но и ни ветија дека во 2019 година ќе ни дадат уште едно возило, бидејќи сега на располагање имаме две возила – рече директорот на Здравствен дом Куманово, Адриан Афузи.

Поднесовме барања, барања, барања… но досега немам информации дека ние ќе добиеме нешто. Повеќе, барав теренски возила, а дали ќе ги добијам, не знам – рече директорот на Здравствен дом Пробиштип, Гоце Неделковски.

За да створиме оптимални услови ни требаат две возила, но и едно ако добиеме, тогаш ќе биде многу добро -изјави директорот на Здравствениот дом Гостивар, Сунај Мазлами.

За возила не сме поднеле барање. Треба да видиме дали со новите тимови ќе има потреба за нови возила. Досега, со тимовите што ги имавме на располагање, овие беа доволни. Но со новите тимови ќе видиме дали ни требаат нови возила”, рече директорот на Здравствениот центар Тетово, Борислав Јоргаќиевски.

 Шест милиони денари се потрошени за одржување на 40 амбулантни возила

„Порталб“ поднел барање за пристап до информации од јавен карактер во 16 здравствени домови, за тоа колкав дел од буџетот оди за Итна помош и колку пари се потрошени за одржување на амбулантните возила, но одговор стасал само од осум.

Според податоците, околу 6 милиони денари се потрошени за одржување на 40 амбулантни возила во осум здравствени домови.

Министерството сè уште без резултати од физибилити анализата, не кажува кој ја спроведува

На 14 ноември беше затворен повикот за пријавување за изработка на Физибилити анализа за јавно-приватно партнерство. Целта на анализата е да се најдат начини на функционирање на службата за Итна помош во Македонија. Идејата за јавно-приватно партнерство предизвика бројни реакции во јавноста, односно спротивставување на можноста за приватизација на итната помош.

По повеќе од два месеци, сè уште немаме официјални информации за тоа кој ја изработува анализата, колку долго ќе трае, и дали е завршена, кои се наодите? „Порталб“ неколку пати инсистирал да ги добие тие податоци, но министерот Филипче изјави само дека анализата се спроведува.

– Сè уште не е завршена. Добитник е една од пријавените компании, со постапка на електронско наддавање, имаат рок од 60 дена, којшто сè уште не е поминат – рече министерот Филипче.

„Порталб“: Зошто тендерот не е објавен во „Е-набавки”?

Филипче: Мислам дека требаше да биде во „Е-резерви”. Но, ќе го потврдам тоа.

„Порталб“: Не е објавен, ние побаравме. Која е компанијата што го доби тендерот?

Филипче: Не знам, за да ви кажам. Ќе ве известиме дополнително.

Иако министерот јавно најави дека ќе каже која е компанијата што го добила тендерот за спроведување на физибилити студија, тоа уште не е направено, иако прашањата се веќе две недели доставени во Министерство и се чека нивна обработка во Комисијата за јавни набавки на Министерството.

Автор: Фатбарда Цури


Хвар гледа спас во лекарка од Македонија со плата од 6.740 евра!


Сплит, 22 јануари, 2019 - 9:56 (META) 

Жителите на општината Суќурај, во источниот дел на хрватскиот остров Хвар долго време се без лекар, а решение за нивниот проблем изгледа ќе стане лекарка од Македонија, извести хрватскиот јавен радиодифузен сервис ХТВ.

И половина година откако е распишан огласот за нов лекар во амбулантата во Суќурај, од Хрватска не се јавил никој, а единствена заинтересирана била лекарка од Македонија. На огласот покрај бесплатно сместување и редовната плата се нуди и бонус од општината во износ од 50.000 куни годишно (6.740 евра).

– До ден-денеска никој не дојде, но имаме најава дека би можела да дојде лекарка од Македонија, кога ќе се средат документите. Никој од Хрватска не сака во Суќурај – вели градоначалникот на општина Суќурај, Иван Славиќ.

Во амбулантата во селото Суќурај има само медицинска сестра во амбулантата. Два-три пати во неделата доаѓаат лекар од Јелса, гратче кое е оддалечено 53 километри, а таму е и најблиската екипа на Итна медицинска помош, на која поради лошите патишта и треба повеќе од еден час за да стигне.


Медицинските сестри немаат сигурно работно место дури ни во Итна помош


Скопје, 20 декември, 2018 - 11:45 (META) 

Освен физички напади, персоналот на службата за Итна медицинска помош во Македонија се соочува и со уцени, со проблемот на недостиг на униформи и имаат низок бенефициран стаж. Сите овие случаи, според една медицинска сестра вработена во Здравствен дом – Скопје, чиј идентитет е познат на редакцијата на „Порталб“, се резултат на незадоволство на граѓаните спрема службата од една страна, а од друга страна, недостиг на соодветно почитување и вреднување на нивната работа.

Физичкиот напад врз лекарката во Волково не е единствен случај на напад врз здравствените работници при давање услуги од службата за итна помош. Знаеме и за случајот кога беше нападнат лекар во Тетово, беа нападнати лекар и медицински сестри во Чаир, како и напад врз персоналот во скопска Кисела Вода.

-Да, случајот со тепањето на лекарката не е прв што ни се случува како вработени во оваа служба. Се случувало и пред тоа. Тоа доаѓа како последица на тоа што граѓаните не ја добиваат посакуваната услуга. Често пати доцниме, а ова ее поради расипување на возилата кои се стари – вели за „Порталб“ медицинска сестра вработена во Здравствен дом – Скопје.

Таа вели дека имаат несоодветни униформи, а пак возилата честопати немаат ниту функционални клима уреди, ниту средства за дезинфекција.

– Недостигаат услови, почнувајќи од униформа за терен, која треба да не штити. Услови во внатрешноста на возилото не се соодветни. Во текот на летото и зимата недостасуваат клима уреди, и често се случува ампулите да смрзнат, ја менуваат физичка состојба. Недостасуваат дури и средства за ракавици, маски – продолжува медицинската сестра.

Како илустрација, Хрватска, која исто така е држава на Балканот, но членка на Европската Унија, има возила и униформи какви што ги посакуваат и вработените во службите за Итна помош во Македонија.

Медицинската сестра вели нивниот стаж треба да биде ист како и на лекарите во другите служби, каде 12 месеци работата се вреднуваат како 15 месеци, бидејќи опасноста на работа и стресот што го доживуваат, влијае врз нивната здравствена состојба.

Според податоците на Министерството за труд и социјална политика, Деловникот предвидува:

– На лекар во Итна медицинска помош 12 месеци му се пресметуваат како 15 месеци:

– На медицински техничар (сестра,  техничар, главна сестра), кои и помагаат на сестрата при давање итна медицинска помош, 12 месеци работа им се вреднуваат како 14 месеци стаж.

– На возач 12 месеци на работа му се вреднуваат како 14 месеци стаж.

Иако министерката за труд и социјална политика, Мила Царовска вети дека ќе се формира комисија за верификација на бенефицираниот стаж, сепак такво нешто не се случило.

„Ќе се формира Комисија за утврдување на бенефицираниот стаж, која според законот требало да се формира во 2012 година. Целта е да се заштитат правата на работниците, кои согласно постојните законски одлуки спаѓаат во опасни професии, но не можеле  да го реализираат тоа“, изјави министерката Царовска во јули 2017 година.

Медицинската сестра со која зборуваше новинарот на „Порталб“ е скептична дека новите возила за Итна помош ќе влезат во функција пред да се реализираат вработувањата за кои министерот за здравство Венко Филипче изјави ќе се реализираат кон средината на 2019 година. Вработувањата според медицинската сестра, се ветуваат веќе 5 години.

Инаку, за зајакнување на услугите на Итна помош, министерот за здравство Венко Филипче најави набавка на 12 амбулантни возила, од кои 6 од се планирани да бидат дистрибуирани во Скопје, а другите 6 во други градови, но тоа се прави врз основа на критериум што не постои.

Да потсетиме, службата за Итна помош се очекува да подлежи на физибилити анализа за наоѓање на подобар начин на функционирање. Анализата се изведува од страна на еден оператор, од три колку што се пријавиле на повикот на Министерството, но имињата не се откриваат.

Во меѓувреме, Итната медицинска помош во Македонија функционира со стари и амортизирани возила, а пак нивниот број не кореспондира со бројот на жители во некои градови. Имало случаи кога во нив сме имале и губење на човечки животи. За да се избегнат овие ситуации, Министерството за здравство вети замена на амбулантните возила врз основа на километражата.

Но, со ова не се согласуваат автомеханичарите, бидејќи тие бараат замена на возилата не само врз основните километражата, туку и врз основа на тоа колку се искористени и амортизирани овие возила генерално и  во пократки односи.


Итната помош треба да го промени името во „Итна помош со стари возила“ (инфографик)


Скопје, 3 декември, 2018 - 13:00 (META) 

Проблемот со амбулантните амбуланти во Македонија, покрај нивниот број, лежи во подготвеноста на возилата. Според податоците, Македонија главно има стари и амортизирани возила што треба да им служат на околу 2 милиони луѓе. Нај амортизирани возила има Кичево, додека најстарото возило го има Пробиштип, пренесува „Порталб.мк“.

Состојбата е најлоша во Кичево

Во Кичево служба на Итна помош се врши со две амбулантни возила, коишто се нај амортизираните во Македонија. Едното возило има поминато 1 милион и 360 илјади километри, а другото 800 илјади километри. Следува Крива Паланка со две амбулантни возила, со поминати над 652 илјади километри и 620 илјади километри, Дебар со едно амбулантно возило со 640 илјади километри, Велес со едно амбулантно возило со над 452 илјади километри и Охрид со две амбулантни возила со над 450 илјади километри, и со околу 442 илјади километри.

Скопје, којшто доби шест нови возила, има едно амбулантно возило со поминати 450.642 километри.

Министерството за здравство најави дека ја разгледува можноста за измена на Деловникот за работа на итната помош, со која се предвидува замена на возилата врз основа на километражата, бидејќи како што објаснија од таму: “Имаме стари возила коишто поминале и по 600.000 километри“.

Иако е свесен за моменталната состојба со амортизацијата на возилата во Македонија, министерот за здравство, Венко Филипче, не вети дека Кичево ќе ја има судбината на Скопје – да добие ново амбулантно возило.

„Ќе видиме”, одговори Филипче во прашањето на „Порталб.мк“ врз основа на кој критериум ќе бидат распределени 6 возила, што останаа од набавката на 12 возила, во другите градови на Македонија.

Пробиштип го држи рекордот за староста на амбулантните возила

Врз основа на годината на производство, најстарото амбулантно возило со кое се вршат услуги на Итната помош, се користи во Пробиштип – произведено во 1986 година, потоа во Делчево – произведено во 1987 година, Крушево и Струга – произведени во 1989 година, во Неготино и Охрид – произведени во 1993 година и во Велес – произведено во 1994 година.

Претходно „Порталб.мк“ консултираше експерти за сервисирање на возила, кои се занимавале и со сервисирање на амбулантните возила на Итната помош, кои проценија дека критериум за замена и сервисирање на амбулантни возила треба да биде искористеноста на возилата, додека во другите градови поминатата километража. Побараа да има посебен правилник за сервисирање и замена на амбулантните возила.

Според автомеханичарот Игор Трајковски едно амбулантно возило на итна помош не треба да се користи повеќе од 10 години.

33 проценти од амбулантните возила се странски донации

Од 156 возила, 33 проценти од нив се странски донации, околу 40 отсто се финансирани од средства од државниот буџет, додека за 27 проценти Министерството за здравство нема информации за тоа кој ги финансирал.

Министерството за здравство нема критериум врз основа на кој ќе се дистрибуираат возилата во другите градови, а критериумот кој, наводно, е употребен за набавката на 6 возила во Скопје, не постои.


Автомеханичарите против замената на амбулантните возила според километражата


Скопје, 9 ноември, 2018 - 12:33 (META) 

Со цел да се избегне ситуацијата возилата на Итната медицинска помош (ИМП) во Македонија да се расипуваат секојдневно, Министерството за здравство предвидува нов правилник, според кој овие возила ќе се сервисираат и заменуваат зависно од бројот на поминати километри.  Со овој критериум на Министерството не се согласуваат автомеханичарите, бидејќи според нив, критериум за замена и сервисирање на возилата би требало да биде векот на нивното користење и условите во коишто се возат, пишува „Порталб“.

По случаите на расипување возила на Итна помош, при што пациенти починуваа бидејќи не можело да бидат пренесени в болница, Министерството за здравство (МЗ) соопшти дека планира амбулантните возила да се исфрлаат од употреба и да се заменуваат со нови врз основа на бројот на поминати километри.

„Министерството за здравство во моментов ги разгледува опциите со цел етаблирање како систем со што преку посебен Правилник со кој децидно ќе стои дека возилото за ИМП треба да се замени по помината одредена километража. Само за илустрација имаме стари возила кои имаат и по 600.000 поминати километри“, соопшти неодамна МЗ.

„Порталб“ го посети пунктот на Итна помош во Чаир и утврди дека едното од двете возила кои се во употреба поминало 429.756 километри, а второто 208.100 километри.

Автомеханичарот Игор Трајковски има спротивен став од тој на Министерството за здравство.

Вели дека некое возило не треба да се проценува според големиот број изминати километри, туку според неговата механичка состојба. Тој вели, на пример, дека ако едното од двете возила во пунктот во Чаир има поминато релативно малку километри, тоа не значи дека е во состојба да се вози и понатаму, бидејќи веќе е многу амортизирано.

Фото: Portalb.mk

– Има еден услов, зборувам за нови возила, според кој рокот за сервисирање во нормални околности на користење e 15.000 километри во рок од една година, но има и ситуации каде рокот е секои две години. Зборувам за условите во Македонија. Да бевме во Германија, тие ги сервисираат на секои 30 илјади километри, но во какви услови на користење? Ние, на пример, ако одиме од Ѓорче Петров до Автокоманда, ќе заглавиме во Центар… Кочи – тргни – кочи. Тука имаме еден час на искористеност, но не поминуваме километри. Не може километражата да биде услов за замена на возилото – вели Трајковски.

Тој е на ставот дека сервисирањето на возилата треба да се прави на секои 15.000 километри.

– Тие што се користат во оптимални услови треба да се сервисираат еднаш годишно, но ова не значи дека поминатите километри не треба да се земат предвид, бидејќи ако едно возило поминува 40.000 километри во годината, тогаш истото треба да се сервисира два пати годишно. Под сервисирање подразбираме замена на маслото, филтрите, како и контрола. Тоа е редовно сервисирање – рече Трајковски.

Според Здравствен Дом – Скопје, возила за Итна помош последен пат се набавени во 2008 година. Трајковски вели дека тие возила треба да се заменат со нови, а предлага и да има различни возила за урбана средина и за планински терени.

-Условите на користење на повисоки места не се исти како во Центар. Tреба да се има предвид кои возила во какви услови се користат. Едно е возило што патува од Охрид кон Скопје, а друго се возилата што се возат во рурални средини. Сега зборуваме за возила кои се понови, од 2009 година навака. Исто така, треба да има критериум дека возилата за ИМП не смее да бидат постари од 10-15 години. Тука нешто не е во ред. Треба да се постават стандарди, но државата треба да го направи тоа. На пример, по пет години користење, да се купи ново возило. За услугите што се вршат по селата, треба да имаа специјални возила, а не овие што сега се користат – вели Трајковски.


Пет лица починале од високите температури во Бугарија


Софија, 2 јули, 2017 - 10:19 (META) 

Пет лица починале вчера од топлото време, со екстремно висока температура во Бугарија. Температурата на одделни места во земјата достигнала до 44 Целзиусови степени, јавуваат бугарските медиуми.

Меѓу починатите бил и 75-годишен маж, кој излегол да трча во паркот во Софија и починал на самото место.

Екипите на итната помош во Софија вчера интервенирале на околу 200 повици од граѓани, а 18 лица колабирале, меѓу кои и деца на возраст од 13 и од 17 години.

Поголемиот дел од Балканот изминативе неколку дена е зафатен од топлотен бран, со екстремно висока температура. Намалување на температурата и посвежо време се очекува од денеска попладне.


Тодоров ги довел во ризик и бебињата во возилата на итната помош, обвинува СДСМ


Скопје, 19 март, 2017 - 15:21 (META) 

Набавените 69 возила на итната медицинска помош, до кои се сликаше Никола Тодоров, немаат приклучок за инкубатор за бебиња, па бебињата за кои е потребна итна интервенција се превезуваат со стари возила кои често се расипуваат, обвинија денеска од СДСМ.

– Откако завршија два човечки животи во возило на итната медицинска помош, кое се расипа на патот од Крива Паланка кон скопските клиники, деновиве во ризик е доведен и живот на бебе! Според информациите што ги имаме, од Охрид кон Скопје било превезувано бебе во старо возило на итна медицинска помош, кое се расипало на Стража. Поради тоа бебето на Стража било префрлено во друго возило на итната помош. Во старо возило на итна помош и завчера било пренесувано друго бебе, исто така од Охрид кон Скопје – изјави денеска на прес-конференција пратеничката во Собранието и претседател на комисијата за здравство на СДСМ, Јагода Шахпаска.

Таа истакна дека ова е уште еден доказ за несовесните политики во здравството, кои, како што рече, мора да бидат спречени.

– Несоодветните возила на итната помош за коишто се дадени милиони евра пари на граѓаните и негрижливото одржување на возилата уште еднаш покажуваат дека Никола Тодоров беше министер за тендери, а не за здравство. Тодоров, Груевски и нивните соработници наштетија на граѓаните и го доведоа во ризик нивното здравје. Во програмата на новата реформска влада, здравјето на граѓаните е врвен приоритет – рече Шахпаска.

Од охридската болница за „Телма“ потврдиле дека овој месец имале два случаи во кои бебиња биле префрлени од Охрид во Скопје, но негираат дека возилата со кои биле пренесувани бебињата се расипале по пат.


Возач загина во сообраќајна несреќа на патот Охрид – Струга


Охрид, 4 декември, 2016 - 14:02 (META) 

Едно лице го загуби животот во тешка сообраќајна незгода што синоќа околу 21.15 часот се случи на магистралниот пат Охрид – Струга, во близина на бензиската пумпа „Бесјани“.

Станува збор за Благоја Р. (37) од струшкото село Мороишта, кој веднаш по несреќата со возило на итна помош бил пренесен во Општата болница во Охрид, каде им подлегнал на повредите.

Сообраќајната незгода се случила кога Благоја Р., управувајќи автомобил марка „киа“ во правец од Струга кон Подмолје, изгубил контрола над возилото и со предниот дел удрил во метална канделабра и ограда со бетонски столбови. Од силината на ударот, возилото се превртело на покривот и излетало надвор од патот.

По наредба на јавен обвинител, на местото на несреќата, увид извршија полициски екипи од полициската станица за безбедност во патниот сообраќај во Охрид.

Според насоките на јавниот обвинител, врз телото на починатиот денеска ќе биде извршена обдукција, а дополнително ќе биде вештачен и автомобилот што го управувал.


Жена загина во сообраќајна несреќа на влезот во Штип


Штип, 1 декември, 2016 - 13:28 (META) 

Во сообраќајна несреќа на влезот во Штип загина 65-годишна жена од селото Тераници, општина Чешиново – Облешево. Жената се превезувала со синот во возило „опел тигра“, кога во него удрил „џип чироки“, со бугарски регистарски таблички, сопственост на возач од Пехчево.

„Несреќата се случила вчера попладне во 16.40 часот кај селото Чардаклија. Од ударот „опелот“ се запалил, но пламенот набргу бил изгаснат. Жената сè уште покажувала знаци на живот кога дошла екипата на итната медицинска помош од Штип. Веднаш била пренесена во Клиничката болница, каде набргу починала“, соопштија од СВР Штип.

Во болницата се примени уште три други лица, кои се превезувале во џипот, а кои поминале со полесни повреди.

Од штипската полиција не можат да кажат која е причината за сообраќајката. Истрагата, која ја води Основното јавно обвинителство треба да утврди како дошло до фаталната несреќа. Местото на несреќата е една од таканаречените црни сообраќајни точки.

По врнежите од снег во изминатите три дена, во Југоисточна Македонија во сообраќајни несречи животот го загубија три лица, а повеќе од десет се повредени.