!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Димитриев го искара Рама на „Фејсбук“


Скопје, 21 април, 2017 - 11:50 (META) 

Додека мојот колега од Албанија „од ракав“ вади сценарија за спојувања на Албанија и на Косово, доколку пропадне европската интеграција на државите од регионот, негови дежурни адвокати се трудат да го правдаат со теза дека тоа што Рама бара домашни предизборни поени преку брутално мешање во македонските процеси било од „пријателска природа“, вели техничкиот премиер Емил Димитриев на својот фејсбук-профил.

– Каква неодговорност од социјалист кој најотворено подгрева национализам! Додека владее конфузност кај политичари во соседството дали сакаат да поддржат навистина пријателски дух во регионот или не, сакам да им порачам дека ние, иднината на Македонија ја гледаме во Европската Унија и немаме дилема во однос на овој стратешки приоритет. Ваквите изјави не се во прилог на добрососедството и на градењето пријателски односи. Напротив, додаваат масло на огнот кој тлее и ги разгоруваат националистичките чувства кај сите поединечно. Дури и Европската Унија нема дилема дека иднината на државите од регионот е во ЕУ. Само Рама со неговиот тим ги има и очигледно мисли дека со неговите алтернативи добива предизборно и ги покрива домашните слабости – вели Димитриев.

Според техничкиот премиер, никакво територијално прекројување, обединување или разединување не е во насока на поголема стабилност и мир, ниту на просперитет.

– Секоја држава од регионот е суверена држава, a главна цел треба да ѝ биде зголемување на стандардот на граѓаните, во сопствените граници. Иднината на регионот не е во обединувањето на две држави или повеќе територии, туку иднината е во обединувањето на сите околу европските вредности во Европската Унија – додава Димитриев.


Димитриев: Да надвладее разумот, да се запази достоинството на народот


Штип, 16 април, 2017 - 14:18 (META) 

Во моменти кога имаме силна политичка поларизација, треба да надвладее разумот, да се запази достоинството во постапките и во комуникацијата меѓу себе, порача денеска од Штип техничкиот премиер Емил Димитриев, каде присуствуваше на велигденската литургија во централниот храм на Брегалничката епархија „Свети Никола“ во Штип.

– Република Македонија во историјата преживеала многу премрежиња, ќе го преживее и ова и ќе излезе посилна – рече Димитриев.

Тој истакна дека доброволната жртва на Исус нè потсетува дека треба да ги запазуваме вредностите, кои што со векови го јакнеле единството меѓу македонскиот народ, а граделе соживот и толеранција со другите народи.


Синдикатот на „Југохром“ бара итна средба со Димитриев


Тетово, 23 март, 2017 - 13:45 (META) 

Синдикатот на „Југохром Алзар – Јагуновце“ бара итна средба со техничкиот премиер, Емил Димитриев, поради ситуацијата со комбинатот, чии печки се исклучени поради пробивањето на рокот за изградба на пречистителна станица.

Од синдикатот реагираат на игнорирањето од страна на Владата на нивниот последен допис и бараат средбата со Димитриев да се случи најдоцна в понеделник.

Оттаму наведуваат дека за утре, синдикатот имал најавено протест пред зградата на Владата, кој самите го откажале поради сложената политичка ситуација во земјава.

– Сметаме дека имавте доволен временски простор да оформите став како влада за работењето на „Југохром Алзар Јагуновце“. Сакаме да укажеме дека ова е последно обраќање до Вас и бараме владата дефинитивно да се произнесе со став за „Југохром“. Сметаме дека оваа влада секогаш имала агенда на отворање нови работни места и развој на економијата, меѓутоа со нас – вработените во „Југохром“ се покажува спротивното – стои во дописот на синдикатот на „Југохром“ до техничкиот премиер Емил Димитриев.

Комбинатот „Југохром“ престана со работа на 31 октомври минатата година, откако инспекторатот за животна средина донесе одлука фабриката да ги згасне печките поради пробивањето на рокот за изградба на пречистителна станица.


СДСМ: Кога нема влада, ризични се отсуствата на претседателот и на техничкиот премиер


Скопје, 16 март, 2017 - 12:44 (META) 

Aко ВМРО-ДПМНЕ сака унитарна и суверена Македонија и се грижи за потребите на граѓаните, треба веднаш отворено да ја поддржи програмата на новата реформска влада, да прифати дека е опозиција и да овозможи мирен трансфер на власта, се вели во соопштението на СДСМ.

Според нив, „и за домашната и за меѓународната јавност е јасно дека ова што го прават Никола Груевски и ВМРО-ДПМНЕ, поттикнувањето поделби меѓу граѓаните, омраза и нетрпеливост, има цел само заштита на криминално стекнатото богатство и обид за бегство од одговорност“.

– За колку несериозни политичари станува збор, кои не мислат на своите граѓани, покажува однесувањето на Ѓорге Иванов, за кого државен приоритет не е формирањето влада, туку неговите прошетки по Азербејџан, Унгарија и по Австралија. Од денеска и Емил Димитриев, кој извршува функција технички премиер, не е во државата. Во услови кога нема нова влада, Собранието нема претседател, а Груевски и ВМРО-ДПМНЕ се ориентирани кон сценарија на конфликтност, ова е крајно ризично и бара итно отрезнување на креаторите на кризата и многу брза разврска на политичката криза – се вели во соопштението на СДСМ.

Од партијата велат дека институциите мора веднаш да се формираат и државата мора да профункционира според мнозинска волја на граѓаните.


Димитриев: Нови избори се единственото решение за излез од кризата


Скопје, 8 март, 2017 - 15:12 (META) 

Техничкиот премиер Емил Димитириев, при денешната посета на Делчево, го повтори партискиот став на ВМРО-ДПМНЕ дека предвремени парламентарни избори, кои би биле организирани заедно со локалните, се единствениот излез од политичката криза.

Димитриев забележа дека постизборните дискусии, според него, длабоко задираат во уставното уредување, а не биле дел од предизборната кампања или многу малку се зборувало за тоа.

– Сметам дека ваквите теми не се привилегија на политичките елити, колку и тие да се сметаат за способни да се справуваат со овие процеси. За вакви теми, единствен фактор кој може да каже и да се изјасни е народот на нови парламентарни избори, кои би биле организирани заедно со локалните. Партиите, сето тоа што сметаат да го работат постизборно, ќе мора да го кажат предизборно, бидејќи за тоа треба да добијат легитимитет, за граѓаните да имаат јасна претстава кому го даваат гласот и во кој правец ќе се движат работите во иднина – изјави  Димитриев.

Техничкиот премиер ја коментираше највата за можноста од отворање на бегалски кампови од Македонија, која ја спомена шефот на австриската дипломатија, Себастијан Курц.

– Македонија даде огромен придонес во справувањето со мигрантската криза и тоа беше забележано од сите земји на ЕУ и пошироко. Ние и во иднина ќе се однесуваме така, меѓутоа за евентуално формирање кампови за згрижување бегалци во нашата земја, нашиот став е категорично „не“, бидејќи во државава бегалците доаѓаат од земја членка на ЕУ, земја која е безбедна и не гледаме никаква логика во нашата земја да се формираат бегалски кампови. На тој предлог ние, како држава, се спротивставуваме – рече Димитриев.


Димитриев до Рама: Многу некоректно потпалувате националистички оган


Скопје, 2 март, 2017 - 13:30 (META) 

Постојаното мешање во внатрешните работи на Република Македонија прави голема штета на добрососедските односи и е спротивно на европските вредности, се вели во обраќањето на „Фејсбук“ на техничкиот премиер Емил Димитриев кон албанскиот премиер Еди Рама.

„Мешањето не ѝ помага на Албанија, чии граѓани очекуваат од Вас да се зафатите со слабостите во владеењето и со економијата, ниту на Македонија, чии граѓани сакаат суверена и независна земја во сегашните граници. Тие граѓани ја плаќаат цената за Вашите наводни амбиции да ја редефинирате Македонија, наместо да ја реформирате Албанија во постојните граници. Не помага ни на партиите во Македонија кон кои се однесувате покровителски и несоодветно потценувачки. Убеден сум дека и без Вашето мешање ќе најдеме решенија за нашите предизвици. Конечно, многу е некоректно да потпалувате националистички оган“, вели Димитриев.

Техничкиот премер, назначен според Договорот од Пржино, вели дека албанскиот јазик е нашироко застапен во Македонија и дека државата ангажира големи ресурси за промоција на јазикот и на културата на заедниците.

Димитриев додава дека македонските граѓани, без разлика на нивната етничка и верска припадност, сами пребродиле многу кризи во историјата и дека ќе ја надминат и оваа.


Хан ја почна работната посета со средба со премиерот Димитриев


Скопје, 9 февруари, 2017 - 8:57 (META) 

Еврокомесарот за проширување и за добрососедска политика, Јоханес Хан, утринава се сретна со премиерот Емил Димитриев, со кој разговараше за ситуацијата во земјата по предвремените парламентарни избори, одржани на 11 декември минатата година.

Детали од средбата засега не се откриваат, а Хан од средбата објави фотографија на социјалната мрежа „Твитер“ со краток опис.

„Го почнав работниот ден во Скопје со разговор со премиерот Димитриев. Потоа состанок со министрите од земјите од Западен Балкан за зајакнување на енергетската поврзаност“, напиша Хан.

Еврокомесарот синоќа допатува во Скопје, а денеска ќе учествува на шестиот министерски состанок на земјите од Западен Балкан, посветен на регионалната соработка во областа на енергетиката.

На состанокот, освен Хан и министрите за надворешни работи и министрите за енергетика од балканските земји, ќе присуствуваат и италијанскиот државен потсекретар за надворешни работи, Винченцо Амендола, и генералниот секретар на Советот за регионална соработка, Горан Свилановиќ.

На неформалната средба ќе се разговара за прашања од областа на регионалната соработка во различни сегменти, но со посебен акцент на заедничките регионални предизвици, економскиот просперитет и меѓусебното поврзување, владеењето на правото и антикорупцијата, во функција на интегрирање на сите балкански земји во ЕУ.

По завршувањето на министерскиот состанок, Хан ќе има средби со претставниците на граѓанскиот сектор, како и одделни средби со лидерите на политичките партии кои освоија пратенички места во Собранието. Тема на состаноците ќе биде состојбата на Македонија по предвремените парламентарни избори, напорите за формирање влада и за враќање на земјата на евроатлантскиот пат.


Кривични пријави од СДСМ за Димитриев, Попоски, Тодоров и за Канческа-Милевска


Скопје, 3 февруари, 2017 - 14:30 (META) 

Социјалдемократскиот сојуз на Македонија ќе поднесе кривични пријави против премиерот во оставка, Емил Димитриев, и против министрите во оставка Никола Попоски, Никола Тодоров и Елизабета Канческа-Милевска поради прекршување на Изборниот законик.

Кривичните пријави, како што соопшти денеска портпаролот на СДСМ, Петре Шилегов, ги поднесуваат бидејќи премиерот и тројцата министри во моментов истовремено ја извршуваат и функцијата пратеник во Собранието и функцијата министер.

– Во Изборниот законик јасно е наведено дека функцијата пратеник е неспоива со функцијата министер и дека со денот на верификација на мандатот за пратеник, функцијата министер им престанува по сила на закон. Во ваков случај, министерствата не остануваат без раководно лице, бидејќи должноста на министерот ја презема заменик-министерот – изјави Шилегов на прес-конференција.

Тој додаде дека „наведените членови на ВМРО-ДПМНЕ смислено и во континуитет од денот на верификација на мандатите за пратеници во Собранието на РМ, парарелно ја вршат и функцијата министер“ и „со таквото однесување ја злоупотребуваат својата службена положба и овластување“.

– СДСМ како одговорна партија, која се грижи за доследно спроведување на законите во РМ, поднесува соодветни кривични пријави против наведените лица и очекуваме брза и ефикасна реакција од надлежното обвинителство – рече Шилегов.


Вработените во „Југохром“ во вторник продолжуваат со блокади и со протести


Тетово, 27 јануари, 2017 - 16:06 (META) 

Вработените во „Југохром“ во вторник од 11 до 13 часот ќе го блокираат автопатот Тетово – Скопје, кај наплатната рампа Желино. Блокадата, како што велат од синдикалната организација на фабриката, е поради неоправданото исклучување на печките во комбинатот.

Од синдикатот на „Југохром“ велат дека во последните десет дена, оствариле средби со премиерот Емил Димитриев и со вицепремиерот Владимир Пешевски, кои биле конструктивни, но од властите сè уште не добиле никаков одговор во врска со статусот на вработените и на фабриката.

– Ние од власта немаме никаков одговор. Ние, вработените, до 31 јануари сме на принуден одмор, имаме некаков статус, но по 1 февруари не се знае ништо и најверојантно ќе бидеме под Заводoт за вработување, a државата ќе има нови 700 невработени лица. Затоа бараме државата да дозволи да се рестартира фабриката и од тоа нема да се откажеме. Oвие барања ќе ги изнесеме на 31 декември, на блокадата на автопатната делница Тетово – Скопје – изјави Светислав Спасовски, член на синдикатот на „Југохром“.

Југохром престана со работа на 31 октомври минатата година, откако инспекторатот за животна средина донесе одлука фабриката да ги згасне печките поради пробивањето на рокот за изградба на пречистителна станица.


Цела Македонија под привремена управа – в.д. ги водат судовите, владата и собранието


Скопје, 24 јануари, 2017 - 11:48 (META) 

Трите власти во државата – законодавната, судската и извршната – се под привремена управа. Веќе два месеци, и подолго, на чело на најважните судови, Владата, Собранието, МВР се наоѓаат вршители на должност, кои привремено ги извршуваат раководните функции на кои се поставени.

Ваквата ситуација го скратува дијапазонот на одлуки и на решенија што можат да ги носат, а и веќе донесените се ставаат под знак прашалник од јавноста и од експертите. До кога ќе трае привремената управа, се очекува да биде појасно до крајот на неделава, кога истекува рокот од 20 дена, во кој лидерот на ВМРО-ДПМНЕ, Никола Груевски, треба да се изјасни дали може да формира влада или не.

В.д. судска власт
  • Врховниот суд (највисок суд во државата и носител на судската власт) од 5 декември има в. д. претседател. Функцијата ја извршува судијката Снежана Бајлозова, откако на Лидија Неделкова еден ден претходно ѝ истече мандатот;
  • Основниот суд Скопје 1 (најголемиот и најважниот суд во државата, каде се судат случаите за организиран криминал и корупција и предметите на Специјалното јавно обвинителство) од 5 декември како в. д. претседател го води Татјана Михајлова (која го суди предметот на СЈО против Никола Груевски за случајот „Шамари“, н.з.), откако на Владимир Панчевски му истече мандатот на 4 декември;
  • Основното јавно обвинителство за гонење организиран криминал и корупција, по изборот на обвинителот Јован Илиевски за судија од Македонија во Меѓународниот суд за човекови права во Стразбур, за в.д. шеф го има Златко Биковски;
  • Министерството за внатрешни работи (иако не е дел од судската, туку од извршната власта, МВР сепак е дел од институциите задолжени за борба против криминалот и корупцијата), по официјалните резулати од изборите, го раководи Агим Нухиу (претходно заменик-министер во МВР, н.з.) кој функцијата ќе ја извршува до изборот на новата влада.

(Во тек е постапката за избор на претседатели на Врховниот и на Кривичниот суд во Скопје, која иако почна уште на почетокот на октомври минатата година, сè уште не е завршена, а изборот на претседателите на судовите, по препорака на Државната комисија за спречување на корупција, беше одложен по изборите.

Во законите за судски совет и за јавни обвинители не се наведени рокови за избор на претседатели на судовите и на шефови на јавните обвинителства).

В.д. законодавна власт
  • Новото Собрание на Република Македонија, иако се конституира на 30 декември 2016 година, сè уште нема избрано претседател и заменици-претседатели. Во моментов со него, како „вршител на должност“ претседавач, раководи претходниот спикер, Трајко Вељаноски. Изборот на претседател на Собранието зависи од формирањето на владина коалиција, која ќе обезбеди мнозинство во парламентот.
В.д. извршна власт
  • Со Владата раководи техничкиот премиер во оставка, Емил Димитриев, сосе министрите во оставка, кои функциите ќе ги извршуваат до изборот на новата влада.