!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ избра нов извршен комитет, осум високи функционери заминаа од врвот


Скопје, 30 јули, 2017 - 1:35 (META) 

ВМРО-ДПМНЕ синоќа избра нови 19 членови на извршниот комитет (ИК) на партијата, а меѓу нив повеќе не се осум од досегашните високи функционери, од кои повеќето се споменуваат во „бомбите“ што ги објави СДСМ.

Во новиот ИК не се поранешните министри Владимир Пешевски, Емил Димитриев, Зоран Ставрески, Гордана Јанкуловска, Миле Јанакиески и Кирил Миновски, како и блиските соработници на Никола Груевски, Мартин Протоѓер и Сашо Мијалков. Поранешниот директор на УБК, претходно соопшти дека е повлекува од сите функции на партијата додека против него течат судските процеси кои ги поведе Специјалното јавно обвинителство.

Од досегашните членови, во извршниот комитет на партијата остануваат Илија Димовски, Владимир Ѓорчев, Никола Попоски, Никола Тодоров, Даниела Рангелова и Коце Трајановски.

На синоќешниот состанок, кој траеше речиси до полноќ, беа избрани 19 нови лица. Пратеникот Антонио Милошоски соопшти дека поранешниот директор на ЕЛЕМ, Христијан Мицкоски, е новиот генерален секретар на партијата. Тој доаѓа на местото на поранешниот технички премиер Емил Димитриев, кој неодамна изјави дека на партијата ѝ е потребно освежување.

Во новиот состав на ИК влегоа Никола Србов од „Стоп операција Сорос“, активистот Богдан Илиевски од „За заедничка Македонија“, поранешниот портпарол на Влада, Александар Георгиевски, како и пратениците Ане Лашкоска и Зеќир Рамчиловиќ и поранешниот министер за странски инвестиции, Џери Наумоф.


Адвокатот Додевски повикан како сведок во СЈО за случајот „Талир“


Скопје, 10 јуни, 2017 - 13:12 (META) 

Aдвокатот Никола Додевски ќе биде повикан како сведок во Специјалното јавно обвинителство за случајот „Талир“ и тој нема да може да биде адвокат на лидерот на ВМРО-ДПМНЕ и поранешен премиер, Никола Груевски, за овој случај, кој е првоосомничен пишува порталот „Сакам да кажам“ (www. sdk.mk).

Од Специјалното јавното обвинителство ја потврдиле информацијата, но не кажале повеќе детали во врска со случајот.

Инаку, вчера за случајот „Талир“ во СЈО се појавија генералниот секретар на ВМРО-ДПМНЕ и поранешен технички премиер, Емил Димитриев, поранешниот министер за транспорт и врски, Миле Јанакиески, пратеничката на ВМРО-ДПМНЕ, Даниела Рангелова, како и пратеничката на СДСМ, Фросина Ташевска-Ременски.

За понеделник се очекуваат првоосомничениот Груевски, Илија Димовски и Кирил Божиновски. СЈО испратило покани до сите 11 осомничени да дадат исказ за „Талир“.

Инаку, адвокатот Никола Додевски ги застапува поголемиот дел од осомничените во случаите што ги води СЈО.


Јанакиески очекува СЈО да му поднесе обвинение и да оди на суд


Скопје, 9 јуни, 2017 - 14:48 (META) 

Специјалното јавно обвинителство продолжува да работи како експозитура на СДСМ и да води политичка хајка против функционери на ВМРО-ДПМНЕ, рече поранешниот министер за транспорт и врски и функционер на ВМРО-ДПМНЕ, Миле Јанакиески по излегувањето од просториите на СЈО, каде се задржа помалку од половина час.

„Денеска бев осомничен затоа што сум ставил параф на некој договор,“ рече Јанакиески.

Тој го повика СЈО да почне да работи предмети против СДСМ за да докаже дека не е нивна партиска експозитура.

„Нивниот рок е при крај и тие одлучија да се занимаваат со функционери на ВМРО-ДПМНЕ. Ние ќе ја докажеме нашата невиност во судска постапка. Велам судска постапка, затоа што очекувам да поднесат обвинение,“ рече Јанакиески.

Тој не кажа зошто толку кратко се задржа во СЈО, но најверојатно како генералниот секретар на ВМРО-ДПМНЕ и поранешен технички премиер Емил Димитриев и пратеничката на ВМРО-ДПМНЕ, Даниела Рангелова и тој побарал да добие увид во доказите и потоа да даде исказ пред обвинителите на СЈО.


Јанакиески дојде во СЈО да даде исказ за случајот „Талир“


Скопје, 9 јуни, 2017 - 14:19 (META) 

Поранешниот министер за транспорт и врски Миле Јанакиески, попладнево во 14 часот пристигна во Специјалното јавно обвинителство, каде според информациите треба да даде исказ за случајот „Талир“ во кој и тој е еден од осомничените. Јанакиески не даде изјава за медиумите.

Инаку во Специјалното јавно обвинителство денеска беше и пратеничката на СДСМ, Фросина Ташевска-Ременски. Таа по излегувањето изјави дека била повикана во својство на оштетена, чии телефони, три години биле незаконски прислушувани од Управата за безбедност и контраразузнавање.

Ременски одговарајќи на новинарско прашање рече дека, како штети што ги претрпела од овие активности се аферата „Афис“, нејзиното разрешување од позицијата продекан за настава од Факултетот за безбедност во Скопје и континуираниот политички мобинг што го трпела од претходната власт.

Претходно денеска во СЈО беа генералниот секретар на ВМРО-ДПМНЕ и поранешен технички премиер Емил Димитриев и пратеничката од ВМРО-ДПМНЕ, Даниела Рангелова.

Тие по излегувањето од просториите на СЈО изјавија дека денеска не дале искази туку побарале увид во доказите, по што ќе се произнесат по кривичните дела за кои ги товарат.

СЈО испратило покани до сите 11 осомничени да дадат исказ за „Талир“ во просториите на обвинителството. Инаку, првоосомничен во случајот е лидерот на ВМРО-ДПМНЕ и поранешен премиер, Никола Груевски.

Неофицијално, Груевски, Илија Димовски и Кирил Божиновски денеска нема да дојдат на распит бидејќи наводно не ги добиле поканите. Се очекува тие да се појават в понеделник.


Димитриев не дал исказ во СЈО, побарал увид во доказите


Скопје, 9 јуни, 2017 - 12:13 (META) 

Генералниот секретар на ВМРО-ДПМНЕ и поранешен технички премиер Емил Димитриев денеска не дал исказ во Специјалното јавно обвинителство, туку како што изјави побарал увид во доказите за случајот „Талир“, каде тој е еден од 11 осомничени.

– Побарав увид во доказите и штом ги добијам, ќе се произнесам – рече генералниот секретар на ВМРО-ДПМНЕ.

Димитриев во СЈО се задржа околу еден час, а беше придружуван од адвокатот Никола Додевски., кој е бранител на повеќето осомничени во случаите што ги води СЈО.

Тој во изјава за медиумите не сакаше да ги коментира наводите од истрагата на СЈО во случајот „Талир“ за нелегално финансирање на ВМРО-ДПМНЕ.

– Да оставиме случајот да се води во институциите, без да даваме дополнителни изјави и коментари – рече Димитриев.

Како што дознаваме, СЈО испратило покани до сите 11 осомничени да дадат исказ за „Талир“ во просториите на обвинителството. Инаку првоосомничен во случајот е лидерот на ВМРО-ДПМНЕ и поранешен премиер, Никола Груевски.

Неофицијално, Груевски, Илија Димовски и Кирил Божиновски денеска нема да дојдат на распит бидејќи наводно не ги добиле поканите.

Околу 12 часот, во просториите на СЈО се појави пратеничката Даниела Рангелова, која исто така е осомничена во случајот „Талир“. И таа, како што изјави, ќе побара увид во доказите.

Рангелова рече дека не се чувствува виновна, а прашана како партијата се стекнала со толкав имот, рече дека за тоа треба да се праша тој што го стекнал имотот.


Емил Димитрев дава исказ во СЈО за случајот „Талир“


Скопје, 9 јуни, 2017 - 11:22 (META) 

Генералниот секретар на ВМРО-ДПМНЕ и поранешен технички премиер Емил Димитриев претпладнево во 11 часот пристигна во Специјалното јавно обвинителство каде според информациите треба да даде исказ во врска со случајот „Талир“.

Димитриев во СЈО дојде со адвокатот Никола Додевски кој ги застапува поголемиот дел од осомничените во случаите што ги води СЈО.

Како што дознаваме, СЈО доставило покани до сите 11 осомничени во „Талир“ да дојдат на распит. Првоосомничен во случајот е лидерот на ВМРО-ДПМНЕ и поранешен премиер Никола Груевски.

Случајот „Талир“ се однесува на истрага за незаконско финансирање на ВМРО-ДПМНЕ.


Заев: Димитриев ми пренесе дека состојбата во државата не е сјајна, но не е ниту драматична


Скопје, 1 јуни, 2017 - 15:08 (META) 

Новиот премиер, Зоран Заев, денеска изјави дека примопредавањето на премиерскиот кабинет од досегашниот технички премиер, Емил Димитриев, поминало во пријателска атмосфера.

– Разговаравме со техничкиот премиер во заминување, господинот Емил Димитриев, и бев запознаен со сите неопходни детали што треба да ги знам уште денеска, во согласност со целиот протокол. Нормално, бев информиран за салите за состаноци, за помошните простории, за сè што значи работен амбиент на премиерот – рече Заев.

Тој истакна дека бил запознаен и со состојбата во државата.

– Секако, таа не е сјајна, но не е ниту драматична, така беше пренесено. Кога ние ќе направиме увид, веднаш ќе им соопштиме на граѓаните, но драго ми е што на еден ваков пријателски начин се направи примопредавањето, зашто тоа испраќа позитивна порака до граѓаните дека без разлика на политичките околности и на нашите некогаш и спротивставени политички позиции, сепак на сите им е јасно дека ќе си требаме еден со друг, заради граѓаните, заради државата, заради реформите. Така што уште еднаш честитки до цела Македонија за новата влада, Господ да ни дава памет нам, политичарите, за да водиме мудро и исклучиво во интерес на граѓаните и Господ да ни ја чува Македонија – рече Заев.


Заев се всели во премиерскиот кабинет


Скопје, 1 јуни, 2017 - 13:07 (META) 

Новиот премиер, Зоран Заев, во 12.30 часот влезе во кабинетот на премиерот во Владата на Република Македонија, каде беше пречекан од техничкиот премиер Емил Димитриев.

Димитриев срдечно го пречека Заев и му ја предаде функцијата.

Заев во Владата стаса во придружба на неколку членови на новиот владин кабинет.


ВМРО-ДПМНЕ: СЈО му помага на Заев да реализира нарачани платформи


Скопје, 22 мај, 2017 - 17:46 (META) 

На прес-конференција денеска дури тројца високи функционери на ВМРО-ДПМНЕ одговараа на наводите што денеска ги изнесе СЈО отворајќи три нови случаи, од кои два „Талир“ и „Траекторија“ се за претседателот на ВМРО-ДПМНЕ и за високи партиски или државни функционери во владите на ВМРО-ДПМНЕ.

Антонијо Милошоски од партиската говорница обвини дека СЈО само „штанца обвиненија против ВМРО-ДПМНЕ“ за да му помогне на претседателот на СДСМ и мандатар за нова влада, Зоран Заев во „спроведување нарачани платформи“.

– Од пресот на СЈО се забележуваат две цели. Првата цел е најава за притисок врз судството отворена политичка најава за силен притисок врз судството што ќе следува во наредниот период. И втората цел преку таквиот притисок врз судствоот да се издејствуваат судски пресуди кои што се веќе дел од некој политички или коалиционен договор.  Таквата најава денес СЈО ја соопшти преку соопштувањето на случајот Сопот – рече Милошоски, наведувајќи дека потоа би уследиле идентични постапки и за случаите „Монструм“ и „Диво насеље“.

За случајот „Траекторија“ зборуваше Никола Попоски, кој рече дека не е точно дека била нанесена материјална штета од 155 милиони евра, оти станувало збор за капитален проект од кој корист имаат сите граѓани на Македонија. Тој рече и дека за двата автопати, односно Миладиновци – Штип и Кичево – Охрид не се применувал Законот за јавни набавки затоа што во Собранието во 2013 година, и со гласови на пратеници од СДСМ и од ДУИ, бил изгласан Законот за реализацијата на двата инфраструктурни проекти, кој пак се засновал на Законот за рафирикација на договорот за економска и техничка соработка во инфраструктурата меѓу владите на Македонија и на Кина. Тој негираше и дека во игра била само една понуда.

– Третата инсинуација во денешниот настап на СЈО е дека се преговарало со само една компанија и не била избрана најниската понуда. Вистината е следна, склучени се меморандуми со две компании и тоа: China International Water and Electric Corpоration (CWE) и Sinohydro Corporation Limited. Двете компании доставиле свои понуди и во 2013-та година е одбрана најниската понуда – рече Никола Попоски.

За случајот „Талир“, за незаконско финансирање на ВМРО-ДПМНЕ одговараше Емил Димитриев, генерален секретар на партијата и технички премиер. И тој обвини дека отворањето на случаите од СЈО е уште еден напад врз ВМРО-ДПМНЕ, порачувајќи дека партијата не работела незаконски, што било „потврдено од страна на сите институции надлежни за проверка на финансиското работење на политичките партии“.

– Јасно и гласно со чест и со достоинство порачуваме дека ова нема да помине. Финансирањето на ВМРО-ДПМНЕ е реализирано согласно закон, целокупниот имот на ВМРО-ДПМНЕ е законски стекнат. Имотот на ВМРО-ДПМНЕ се користи за извршување на партиските функции.ВМРО-ДПМНЕ има право да има простор за свое функционирање. СДС не може и не смее да биде во привилегирана позиција и да има простор за функционирање кој му оставен од поранешната комунистичка партија. А, ВМРО-ДПМНЕ да нема простор. Сиот имот на партијата е законски стекнат и без разлика дали е во целост оспособен за партиско функционирање како што е отприлика 95% од просторот или пак е во тек постапка за оспособување на просторот како што имаме 4-5 ситуации – рече Димитриев.


ЛДП бара поништување на „скандалозниот“ договор за изградба на нов клинички центар


Скопје, 19 мај, 2017 - 19:26 (META) 

Никола Тодоров, Никола Груевски и Емил Димитриев денеска потпишаа и поддржаа скандалозен и бескруполозен договор за изградба на нов клинички центар во Скопје, свесно произведувајќи нови линии на поделба и беззаконие во Рeпублика Македонија, обвинуваат од Либерално-демократската партија (ЛДП).

Оттаму велат дека потпишувањето на ваков договор од страна на лице „кое не е ништо друго, освен пратеник во новиот собраниски состав“, е класично кршење на Уставот и на законите во државата.

„Прашуваме во кое својство Никола Тодоров потпишува милионски договори со поддршка на техничка Влада, која патем нема друга функција освен организирање избори. Или можеби провизиите се поважни од почитувањето на законите и владеењето на правото? ЛДП, како дел од новата влада, ќе го преиспита договорот и за истиот ќе има одговорност“, стои во соопштението на ЛДП.

Од партијата ги повикуваат надлежните институции да го поништат договорот, кој, како што велат од ЛДП, претставува преседан во секој поглед.

„И компаниите потписници на договорот би требало да знаат дека оваа техничка влада ниту имала, ниту има легитимитет да потпишува проекти, уште повеќе што се работи за изградба на клинички центар, кој е од голем национален интерес“, додаваат од ЛДП.