!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Државниот врв и лидерите на партиите упатија честитки по повод Богојавление – Водици


Скопје, 19 јануари, 2017 - 12:43 (META) 

Претседателот на држвата, Ѓорге Иванов, премиерот Емил Димитриев и лидерите на ВМРО-ДПМНЕ и на СДСМ, Никола Груевски и Зоран Заев, до поглаварот на Македонската православна црква – Охридска архиепископија, г.г. Стефан, и до православните верници во земјава испратија честитки по повод празникот Богојавление – Водици.

„Во духот на овој голем празник, да го поттикнуваме најдоброто во нас и најдоброто кај нашите ближни и кај нашите сограѓани, независно од нивната етничка, верска, јазична и идеолошка припадност. Само така ќе чекориме кон остварување на заедничките цели за успешна и просперитетна Република Македонија“, стои во честитката од претседателот Иванов.

Премиерот Емил Димитриев во честитката порача вредностите кои ги носи денешниот празник да помогнат во „подобрување на економијата, за унапредување на стандардот на населението, за создавање услови за развој во секоја општествена сфера и изградба на напредна Република Македонија“.

Во честитката по повод празникот, лидерот на ВМРО-ДПМНЕ, Никола Груевски, истакна дека со истата верба во Бога, со која денеска се тргнува кон местата за водосвет „да продолжиме да чекориме по патот на успехот и просперитетот на нашата татковина и да го зацврстиме единството, да се почитуваме, да си помагаме и да ги унапредуваме вредностите кои се предност на нашето општество“.

Лидерот на СДСМ, Зоран Заев, во својата честитка порача дека повторно е потребна цврстата волја на духот, преку мудрост и искрена верба, „за да го создадеме животот што го избравме“.

„Денешниот ден на духовното раѓање носи нова животна сила на секој од нас, за потребната обнова на нашето општетсво во кое среќно ќе живееме сите“, напиша Заев во честитката по повод Богојавление – Водици.


Вработените од „Југохром“ повторно бараат средба со Димитриев


Тетово, 12 јануари, 2017 - 12:54 (META) 

Синдикалната организација на комбинатот „Југохром“ повторно бара средба со премиерот Емил Димитриев откако по барањето за средба што го испрати на 4 јануари, доби одговор дека со претставниците ќе се сретне советникот на премиерот.

„Средбата сме подготвени да се прилагоди во рамки на Вашите слободни термини во кое било време од денот (Ви стоиме на располагање 24 часа). Ургираме средбата да се реализира во најкраток можен рок. Ви напоменуваме дека ургенцијата е поради огромниот притисок од 700 вработени кои се загрижени за својот работен статус“, се вели во барањето.

Во барањето за средба испратено на 4 јануари, вработените велат дека се чувствуваат изиграни и измамени од некои институции кои, како што велат, најпрво задоцниле со издавањето на неопходните дозволи за изградба на филтри, а потоа наредиле престанок со работа на печките.

„Спремни сме да продолжиме со уште порадикални протести и со други облици на изразување на незадоволството. Но, пред да преземеме други мерки, би сакале да се сретнеме со Вас, да размениме информации и да видиме дали е можно проблемот да се реши по институционален пат. Сметаме дека може, со Ваша помош и посредство да се најде некое прифатливо решение со кое ќе се обезбеди сигурна егзистенција на работниците“, велат од синдикалната организација на комбинатот „Југохром“.


Постизборни апсурди: Премиерот ни е технички, владата политичка, Собранието без претседател…


Скопје, 12 јануари, 2017 - 10:03 (META) 

По тесните резултати од предвремените избори, државава се најде во состојба која е полна со куриозитети, прашања и со дилеми.

Премиерот веќе цела година (од 18 јануари 2016!) ни е „за спроведување избори“, за владата не се знае дали ни е техничка, преодна или нешто трето, Собранието е конституирано, ама нема претседател…

Македонија од 30 декември номинално има парламент, но нема претседател на парламентот. Трајко Вељаноски го свика новиот состав, но пратениците не избраа нов претседател. Дали Вељаноски е веќе бивш претседател? Кој ќе го води и ќе го свикува парламентот – најстариот пратеник или пратеничка група?

Номинално, Македонија има и премиер – Емил Димитриев. Но, неговата партија инсистира дека тој е само „технички премиер за спроведување на изборите“, иако изборите завршија на 11 декември. Сепак, на веб-страницата на Владата, Димитриев се води како „претседател на владата“. Каков му е легитимитетот? До кога ќе биде премиер со таа титула, до кога му е мандатот? Кој треба да го разреши или да му ја смени функцијата? Собранието? Кое собрание? Кој ќе го свика?

Имаме и влада, но никој не се осмелува да ѝ даде име. Дали е политичка влада? Ако е тоа влада на ВМРО-ДПМНЕ и на ДУИ, зошто имаме премиер (Димитриев) кој има функција „технички премиер за спроведување на изборите“? Дали таа влада „владее“ или има ограничен мандат – како пред изборите? Дали министрите редовно и без ограничувања си ја извршуваат работата или има некои рестрикции со оглед на лимбото во кое се наоѓа целата држава?

Емил Димитриев беше назначен за премиер на 18 јануари 2016 година, врз основа на измените на Законот на Влада, кои произлегоа од Договорот од Пржино, како основа за организирање и за спроведување на предвремени парламентарни избори за излез од политичката криза.

Владата, во измените на Законот донесени на 9 ноември 2015 година, е означена како преодна влада за спроведување избори на пратеници, а предводена од нов премиер кој го номинира партијата со најголем број пратеници:

„Сто дена пред одржувањето на избори за пратеници, а по претходна оставка на претседателот на Владата на Република Македонија (Никола Груевски, н.з.), Собранието на Република Македонија ќе избере нова, преодна влада за спроведување на избори на пратеници, предводена од нов претседател на Влада (беше избран Емил Димитриев, н.з.) кој го номинира партијата со најголем број пратеници во Собранието на Република Македонија“.

Во измените никаде не е наведено до кога трае мандатот на Димитриев како премиер на преодната влада. Ова е затоа што тоа прашање е уредено со Уставот (член 93), според кој, владата на која ѝ престанал мандатот поради распуштање на Собранието, останува на должност до изборот на нова влада.

„На Владата ѝ престанува мандатот кога Собранието се распушта. Владата на која ѝ е изгласана недоверба, која поднела оставка или на која мандатот ѝ престанал поради распуштање на Собранието, останува на должност до изборот на нова влада“.

Инаку, со прогласувањето на конечните резултати од изборите на 11 декември, им заврши мандатот на министрите за внатрешни работи и за труд и социјална политика од редовите на СДСМ (како и на дополнителните заменици-министри, кои беа дел од владата за спроведување на изборите), а нивните функции ги презедоа замениците-министри во двете министерства, кадри на ДУИ.


Иванов, Димитриев и г.г. Стефан упатија пораки за мир и за спокој за Божиќ


Скопје, 6 јануари, 2017 - 16:11 (META) 

Поглаварот на Македонската православна црква – Охридска архиепископија, г.г. Стефан, со порака за мир и за обединување, на православните верници им го честиташе големиот празник, Раѓањето Христово – Божиќ.

„Живееме во време во кое, како никогаш досега, злото го притиска светот! Ова е време преполно со искушенија на сите страни! Но, да не губиме надеж. Господ никогаш не нè оставил и нема да нè остави, туку ќе биде со нас во сите дни, сè до свршетокот на светот“, вели г.г. Стефан.

Добро здравје и духовен мир, со отворено срце да ја прославиме радосната вест за раѓањето на Господ Исус Христос, им порача претседателот на државата, Ѓорге Иванов, на сите христијани кои го слават Божиќ.

„Во деновите кои следат ќе го славиме животот, семејството и новите почетоци. Ова е период од годината кога во духот на евангелието треба да пронајдеме сили и да ги надвладееме суетите и искушенијата, простувајќи си едни на други. Ако сакаме да градиме општество на почитување и на достоинство, треба да научиме да подадеме рака и да го отвориме срцето со искреност и со доверба едни кон други“, се вели во честитката на Иванов.

Премиерот Емил Димитриев порача дека Божиќ е денот кој е симбол на љубовта божја кон луѓето и порача срцата да бидат исполенти со среќа и со радост, а домовите со мир и со спокој.

„Вредностите што ги симболизира овој празник да ни дадат сила да продолжиме со работа во интерес на народот, да го подобруваме секојдневието на сите граѓани, да обезбедуваме пораст и развој на економијата и подобрување на стандардот на населението, да продолжиме со развој на општество и култура на меѓусебно почитување, меѓусебна толеранција и заемна соработка, и со развој на можностите во секоја општествена сфера, за понатамошни успеси на Република Македонија“, пишува Димитриев во честитката.


Димитриев: Новата влада треба да се грижи за интересот на народот и за нивните проблеми


Скопје, 31 декември, 2016 - 12:40 (META) 

На државен план, годината што изминува ќе остане запаметена по неколку работи од кои треба да извлечеме поуки, истакна во своето новогодишно обраќање техничкиот премиер, Емил Димитриев.

Тој во честитката упатена до граѓаните потсети и на предвремените парламентарни избори.

– Владата за спроведување на изборите која ја предводев, иако функционираше во специфични и невообичаени околности и се соочуваше со многу проблеми во своето функционирање, сепак успеа да биде на висината на задачата. Но, пред сè, квалитетните избори се заслуга на целиот народ – вели Димитриев.

За политичката влада која треба да биде избрана, тој смета дека треба да се грижи за интересот на народот и да ги решава нивните секојдневни проблеми.

Димитриев истакна дека минатата година како држава се соочивме со мигрантската криза, а Македонија имаше клучна улога во справувањето со овој глобален феномен.

Како што вели, потребен ни е период на стабилизација и на фокусирање на реалните проблеми.


Димитриев очекува политичките партии да ги прифатат резултатите од изборите


Пробиштип, 11 декември, 2016 - 19:07 (META) 

„По пребројувањето на гласовите, очекувам политичките партии да ги прифатат резултатите од изборите како волја на граѓаните“, рече премиерот за спроведување на изборите, Емил Димитриев, по гласањето во Пробиштип.

– Со оглед на тоа што предизборната кампања помина во одлична атмосфера, без никакви нарушувања на она што се вика кодекс на однесување во предизборието, очекувам и денешниот ден, денот на гласањето да помине во убава атмосфера, бидејќи за Република Македонија ова е празник. Очекувам дека по пребројувањето на гласовите политичките субјекти ќе ги прифатат резултатите бидејќи тоа е волјата на граѓаните и од тоа нема бегање. На еден начин, со ова отвораме нова страница во нашата историја со влегување во помирни води, со формирање политичка влада, оставање на кризата зад нас и со концентрирање на реализација на изборната програма на онаа партија што ќе ја добие довербата од народот – рече Димитриев.


Димитриев – Чичаковски: Создадени се услови за фер, демократски и веродостојни избори


Скопје, 6 декември, 2016 - 16:57 (META) 

Tехничкиот премир за организирање на избори, Емил Димитриев, денеска се сретнал со членовите на Државната изборна комисија, на која присуствувале и дел од членовите на Владата.

Претседателот на Државната изборна комисија, Александар Чичаковски, информирал дека сè е подготвено за одржување на изборите и оти сите потребни активности се реализирани во согласност со предвидената динамика.

– Информирајќи дека избирачкиот список е потпишан и исконтролиран од подрачните одделенија на Државната изборна комисија, истакна дека во моментов се врши пакување и контрола на испечатениот изборен материјал и се реализираат другите предвидени активности на Државната изборна комисија кои се во насока на организација на денот на изборите – се вели во соопштението од Владата.

На средбата било констатирано дека се создадени сите услови за спроведување фер, демократски и веродостојни избори.


Димитриев во Рига се сретна со бугарскиот премиер Борисов


Рига, 6 ноември, 2016 - 10:33 (META) 

Премиерот на Република Македонија за спроведување на избори, Емил Димитриев, вчера во Рига се сретна со бугарскиот колега, Бојко Борисов.

Двете страни се обврзале да придонесат со заедничка заложба за унапредување на економската соработка, трговската размена и за реализација на инфраструктурни проекти што се од значење за двете држави, со акцент на изградба на железничката и патна инфраструктура на коридорот 8.

Истакната е значајноста и потребата од членство на Република Македонија во НАТО и почеток на пристапни преговори за македонско членство во Европската Унија. Од двете страни била нагласена одлучноста за понатамошно продлабочување на добрососедските односи.

Премиерите се согласиле дека тежиштето мора да биде ставено на големиот потенцијал за размена во области што се од најголемо значење на граѓаните на двете земји, како економијата, туризмот и културата. Заедничка намера е добрите практики на соработка, преку академиите за науки, да се пресликаат и во другите области на соработка.

 


Димитриев: Обвинителствата не смеат да се претворат во портпароли на партиите


Скопје, 22 октомври, 2016 - 22:26 (META) 

Органите на правдата мора да останат надвор од политичката битка на партиите и не смеат да остават впечаток на политичка обоеност, рече меѓу другото премиерот Емил Димитриев во своето обраќање на Свечената академија во Македонската опера и балет по повод празникот 23 Октомври – Денот на македонската револуционерна борба.

Тој нагласи дека Владата ќе им дава поддршка на сите органи на правдата и „во поглед на финансии и во поглед на логистика“, но ќе реагира кога ќе почувствува дека овие органи ја газат линијата на професионалноста. Димитриев рече дека обидот на која било партија да искористи кој било орган на правдата во функција на својата политичка агенда, ќе биде контрапродуктивен и ќе резултира со губење на поддршката од граѓаните.

– Ангажманот на државните и на специјалните органи кои оставаат впечаток на тенденциозност и на пристрасност во предизборен период, покажуваат очигледна намера која македонската јавност јасно ја гледа. Специјалното јавно обвинителство и Јавното обвинителство не треба и не смеат да се претворат и да добијат улога на портпароли на политичките партии и да бидат алатки во функција на политичките агенди – рече Димитриев.

Премиерот ги повика безбедносните сили во изборниот период да се однесуваат професионално и согласно правилата на службата.

– Како човек кој значителен дел од својата кариера ја поминал во безбедносниот сектор, силно го осудувам секој облик и обид за предизвикување конфликт и конфронтација во редот на безбедносните сили – нагласи Димитриев.


Димитриев: За една година ќе имаме преструктуиран безбедносен систем


Скопје, 18 октомври, 2016 - 15:26 (META) 

Министерството за внатрешни работи почнува со реализација на процесот на реформи за консолидација на безбедносниот систем во државата, во согласност со препораките од извештајот на Прибе, кои, меѓу другото, треба да ја засилат контролата на работата на безбедносните служби.

Ова денеска на прес-конфереција го соопшти техничкиот премиер Емил Димитриев, по состанокот на кој присуствуваше целото раковдство на МВР, односно министерот, Оливер Спасовски, дополнителниот заменик-министер, Оливер Андонов, заменик-министерот Агим Нухиу, директорот на Бирото за јавна безбедност (БЈБ) Митко Чавков и директорот на Управата за безбедност и контраразузнавање (УБК), Владимир Атанасовски.

– Можам да кажам дека се направени сите подготовки и почнуваме со реализација на национален прокет за консолидација на безбедносниот систем во Македонија… Реформите во областа на безбедноста опфаќаат голем број институции, владини и невладини, собраниските комисии за надзор на работата на безбедносните служби. Поканивме и странски експерти од ова област од Европската Унија, кои ќе соработуваат со групите од МВР и од другите институции – изјави Димитриев.

Процесот, како што рече премиерот, сега е во фаза на анализа на состојбите во земјава, а се прави и компаративна анализа за тоа како е организиран безбедносниот систем во други партнерски држави, во земјите-членки на ЕУ и на НАТО.

Првата фаза треба да заврши до декември, а по одржувањето на изборите ќе следува фаза на разгледување на предлог-мерките и решенијата за преструктуирање на безбедносните служби и на институциите задолжени за безбедноста на државата.

Координатор на проектот за реформите, кој според очекувањата треба да биде реализаран најдоцна за една година, е директорот на БЈБ, Митко Чавков.

Прашан зошто се почнува со реализацијата на реформите во предизборен период и со распуштено Собрание, Димитриев рече дека периодот до одржувањето на изборите не треба да биде изгубен и да не се работи на прашања за кои има консензус од сите политички партии.

Министерот за внатрешни работи, Оливер Спасовски, изјави дека преку сеопфатна анализа треба да се дојде до решенија кои ќе ја гарантираат контролата на безбедносните служби од една и безбедноста на државата, од друга страна.

– Сведоци сме дека во Македонија имаше сериозни прекршувања на човековите права преку прислушувањата. Потребна е реформа во легислативата, меѓутоа потребна е и реформа во човековите ресурси. Потребно е преку една сеопфатна анализа да се дојде до предлог-мерки, до конкретни решенија и законски измени што ќе гарантираат, пред сè, контрола на безбедносните служби и од друга страна да се гарантира безбедноста на Македонија како држава – рече Спасовски.