Орбан: Унгарија не му помогна на Груевски да излезе од Македонија


Будимпешта, 16 ноември, 2018 - 18:14 (META) 

Спротивно на претпоставките и на лажните вести кои беа објавени во медиумите, ниту унгарската држава, ниту унгарските власти му помогнале на Никола Груевски да ја напушти Македонија, се вели во соопштението од кабинетот на премиерот на Унгарија, Виктор Орбан.

„Никола Груевски ја посочи својата намера да поднесе барање за азил во едно од унгарските претставништва во странство. Од безбедносни причини, унгарските власти овозможија поднесување на барањето и интервјуто на Никола Груевски, кој беше македонски премиер десет години, да се случи во седиштето за Канцеларијата за азил и имиграција во Будимпешта. Канцеларијата за азил и имиграција постапува по барањето за азил согласно унгарскиот закон и во хармонија со меѓународните закони“, велат од кабинетот на унгарскиот премиер.

Од таму додаваат дека во согласност со унгарските правни процедури и меѓународната практика, додека процедурата не се заврши, унгарските власти немаат право да обезбедат дополнителни информации во однос на процедурата за азил.

„Нагласуваме дека Никола Груевски е во Унгарија легално во согласност со законските одредби кои се однесуваат на процедурата за азил“, стои во соопштението од Кабинетот на премиерот Виктор Орбан.


„Вијести“: Од Црна Гора, Груевски заминал за Србија


Подгорица, 16 ноември, 2018 - 12:51 (META) 

Од Црна Гора, Никола Груевски излегол во неделата, три часа откако влегол во земјата, и во Србија влегол преку граничниот премин „Добраково“, пишува црногорскиот весник „Вијести“, цитирајќи свои извори.

Весникот пишува дека Груевски влегол со неговата лична карта во Црна Гора преку граничниот премин „Божај“ во 19.19 часот на 11 ноември.

-Не се појавила никаква заштитна мерка на системот за пребарување – вели изворот на „Вијести“.

Според него, Груевски бил во автомобил „фолксваген џета“ со регистерски таблички CD 1023, во друштво на Антал Кулсар и Шаба Варсалваи, носители на унгарски дипломатски пасоши.

– Територијата на Црна Гора ја напуштил истиот ден, во 22:16 часот, преку граничниот премин „Добраково“. Во Србија влегол со автобили со регистерски таблички 55А05, во кој биле и Золтан Јозеф Часар и Шаба Фелеѓхази, исто така носители на дипломатски пасош на Унгарија – објаснува изворот на црногорскиот весник.

На веб-сајтот на амбасадата на Унгарија во Подгорица пишува дека Часар е заменик на амбасадорот, а Фелеѓхази е конзул.


Белград без официјална реакција за „случајот Груевски“


Белград, 16 ноември, 2018 - 11:43 (META) 

Поголемиот дел медиуми во Србија денеска ги пренесуваат информациите од министерствата за внатрешни работи на Албанија и Црна Гора дека поранешниот македонски премиер Никола Груевски избегал од Македонија преку Албанија и Црна Гора во автомобил на амбасадата на Унгарија во Тирана, и тоа два дена пред за него да биде распишана потерница.

Но српската власт сè уште не се огласила за „Случајот Груевски“.

Министерството за внатрешни работи на Србија за регионалната телевизија „Н1“ претходно објасни дека Груевски нема српски пасош, ниту државјанство. Но, одговор на прашањето дали Груевски на пат кон Унгарија поминал и на територијата на Србија уште не стаса.

Провладиниот српски весник „Политика“ вчера на насловната страница објави текст потпишан од редакцијата кој, без да наведува извори, изнесе повеќе тврдења за бегството на Груевски, меѓу кои и неточното, дека Груевски од Тирана одлетал за Будимпешта. Но албанската полиција вчера соопшти дека Груевски во неделата, два дена пред за него да биде распишана меѓународна потерница, ја напуштил Албанија на граничниот премин „Хани и Хоти“ кон Црна Гора.


МВР потврди дека Груевски е во Унгарија, унгарскиот амбасадор повикан во МНР


Скопје, 14 ноември, 2018 - 9:33 (META) 

Министерството за внатрешни работи (МВР) вчеравечер потврди дека поранешниот премиер и поранешен претседател на ВМРО-ДПМНЕ, а актуелен пратеник, Никола Груевски е во Унгарија.

Министерството за надворешни работи (МНР), пак, соопшти дека за да ја провери информацијата што Груевски ја изнесе на својата страница на Фејсбук, вчера го повикалo амбасадорот на Унгарија Ласло Дукс. Тој бил повикан на средба кај државниот секретар Виктор Димовски, со цел проверка на информацијата и по дипломатски канали. Димовски притоа нагласил дека Македонија е цврсто определена да опстои на вредностите на градење на правната држава, фунционирање на независното судство и борбата против организираниот криминал и корупцијата на сите нивоа, вклучувајќи ги и највисоките.

МВР вчеравечер соопшти дека од унгарското МВР добила потврда дека Никола Груевски е во Унгарија и дека побарал азил. Потоа до Основен суд Скопје 1 информацијата е пренесена, и сега судот треба да распише меѓународна потерница.


Груевски: Во Будимпешта сум, побарав политички азил


Будимпешта, 13 ноември, 2018 - 13:36 (META) 

Поранешниот премиер и екс лидер на ВМРО-ДПМНЕ Никола Груевски по кого е распишана потерница, се наоѓа во Будимпешта и таму ќе бара политички азил.

Ова самиот го соопшти на социјалната мрежа „Фејсбук“.

„Во последните неколку денови примив безброј закани по мојот живот. Јас сум во Будимпешта сега, и побарав политички азил од унгарските власти. Секогаш ќе останам верен на каузата на Македонија. Никогаш нема да отстапам“, вели Груевски на статус на „Фејсбук“.

Груевски е правосилно осуден на двегодишна затворска казна во случајот „Тенк“ за незаконска набавка на луксузен „мерцедес“ кој против него го водеше Специјалното јавно обвинителство.

Откако неколку дена не можеше да го најде и да му врачи решение сам да се упати во затвор, Основниот суд вчера побара од МВР да издаде потерница по Груевски.


Опаѓа бројот на барања за азил во ЕУ


Брисел, 6 август, 2018 - 13:04 (META) 

Во првата половина на 2018 година во ЕУ, Норвешка и Швајцарија биле примени 301.390 барања за азил, што е пад за 15% во однос на првата половина на 2017 година, соопшти Европската канцеларија за азилска поддршка (ЕАСО).

Во јуни годинава, пак, биле примени 1.600 барања за азил помалку отколку во мај.

Денеска објавените бројки од ЕАСО покажуваат дека генерално се задржува трендот на опаѓање на случаите на азил, чиј највпечатлив момент беше опаѓањето за 43 отсто во 2017 година.


Австрија ќе ги штити границите, по договорот за мигрантите во германската влада


Виена, 3 јули, 2018 - 10:03 (META) 

Австриската влада соопшти дека е подготвена да преземе мерки за заштита на границите, по договорот во германската влада со кој се предвидува рестрикција за влез на мигранти во Германија.

„Доколку германската влада го потврди договорот, ќе бидеме приморани да преземеме мерки за да ги спречиме непријатностите на граѓаните во Австрија“, се наведува во соопштението.

Во него се додава дека Австрија е подготвена да ги штити границите, посебно на југот, со Италија и Словенија.

Германскиот министер за внатрешни работи Хорст Зехофер, кој е во судир со канцеларката Ангела Меркел околу мигрантската политика, изјави дека постигнал договор со неа околу ова прашање.

Постигнатиот компромис предвидува дека во иднина, оние кои бараат азил, а доаѓаат во Германија ќе бидат испратени во транзитни центри на границите, а не по центрите ширум земјата.

Откако барањата ќе бидат разгледани, мигрантите ќе бидат префрлени во други земји на ЕУ каде што најпрво стигнале. Тој трансфер ќе биде организиран во рамките на договорите со тие земји.


Граѓаните на Германија ќе добијат законско право на брз интернет


Берлин, 1 март, 2018 - 9:53 (META) 

Граѓаните на Германија ќе добијат законско право на брз интернет, според коалицискиот договор на конзервативците на Ангела Меркел и Социјалдемократската партија на Германија (СПД), вели Хелге Браун, кој е именуван за шеф на кабинетот на германската канцеларка.

Во интервју за весникот „Билд“, Браун објаснува дека новата голема владина коалиција ќе создаде правна рамка со која граѓаните ќе добијат право на брз интернет.

– Брзиот интернет е важен колку и снабдувањето со гас, вода и струја, па затоа тоа прашање е меѓу врвните приоритет на канцеларката – вели тој.

Според именуваниот шеф на кабинет на Меркел, федералната влада и индустријата ќе издвојат најмалку 100 милијарди евра за до 2025 година сите  региони во Германија да имаат брз интернет.

Германија е на 28. место на списокот на 32 земји по пристапот до брз интернет, подготвен од Организацијата за економска соработка и развој (ОЕЦД).

Браун вели и дека се планира забрзување на процесот на разгледување на барањата за азил, а депортирањето во иднина да се врши побргу.

Сепак, дали сето тоа ќе се случи ќе се знаев в недела, кога околу 464.000 членови на СПД ќе гласаат за „големата коалиција“.


Рочиштето за жалбите на Грујевски и Бошковски во Атина одложено за 2 март


Атина, 16 февруари, 2018 - 10:37 (META) 

Врховниот суд во Атина го одложи за 2 март рочиштето на кое треба да се разгледува жалбата на одлуката на Судот во Солун за екстрадиција на поранешниот началник во УБК, Горан Грујевски и неговиот колега Никола Бошковски, јавува Македонската информативна агенција (МИА).

Грујевски и Бошковски биле денеска во судот во Атина заедно со нивните адвокати.

Советот на судии во Солун на 5 јануари, годинава донесе одлука поранешните началници во УБК да бидат екстрадирани во Македонија, каде се обвинети во повеќе случаи на Специјалното јавно обвинителство поврзани со незаконското прислушување.

Веднаш по објавувањето на пресудата, Грујевски и Бошковски преку своите грчки адвокати поднесоа жалби на пресудата на солунскиот суд, по кои сега треба да одлучува Врховниот суд во Атина.

Инаку, Грујевски и Бошковски вчера требаше да бидат сослушани пред Комитетот за азил во Солун, но и ова рочиште беше одложено. Тие пред Комитетот треба да ги образложат причините поради кои бараат азил во Грција.

Против двајцата бегалци во Ггрција се води уште еден судски процес, оној за фалсификуваните бугарски пасоши со кои на 18 октомври, лани беа фатени на аеродромот во Солун при обид да заминат за Унгарија. Ова рочиште, кое досега неколку пати беше одложувано, е закажано за 17 мај.

Според некои проценки, Грујевски и Бошковски се очекува да бидат екстрадирани во земјава до крајот на март, за кога се закажани рочиштата за случаите „Таргет- Тврдина“ и „Трезор“.


Хелсиншки комитет: Новиот закон за азил има недостатоци во примената на ЕУ-директивите


Скопје, 18 декември, 2017 - 12:04 (META) 

Новиот закон за меѓународна и привремена заштита, кој се однесува на баратели на азил и признаени бегалци, има одредени позитивни, но и негативни измени, вели Уранија Пировска, извршна директорка на Хелсиншкиот комитет за човекови права на Република Македонија.

Таа додава дека забележани се одредени недостатоци при имплементација на принципите и стандардите поставени во ЕУ-директивите. 

Во соопштението на Хелсиншкиот комитет се истакнува дека, позитивен исчекор е направен кај причините за прогон, каде што сега се вметнува и сексуалната ориентација и родовиот идентитет. Во него се додава дека, во добра насока е и отстранувањето на лошите законски измени донесени во 2016 година.

Проблеми во праксата се јавуваат со целосното остварување на правата на барателите на азил, поради идентификационата исправа што тие ја добиваат. Во исправата за идентификација, од Хелсиншки наведуваат не постои единствен матичен број, кој е предуслов за остварување на правата од социјална и здравствена заштита, како и од работните односи.

Новина во законот е можноста за ограничување на слободата на движење. Хелсиншкиот комитет укажува дека овој предлог е целосно спротивен на основните човекови права и слободи.

Предлог-законот за меѓународна и привремена заштита, кој се однесува на баратели на азил и признаени бегалци и кој ќе го замени сегашниот закон за азил и привремена заштита, во моментот е во подготовка, а Хелсиншки комитет за човекови права поднесе коментари со цел подобрување на конечниот текст.