!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Подметнати пожари во неколку центри за азиланти во Шведска


Стокхолм, 17 мај, 2017 - 17:57 (META) 

Повеќе од 300 баратели на азил на југот на Шведска, биле евакуирани од центрите за згрижување поради избувнување на пожар, соопшти полицијата.

Полицијата во градот Векше соопшти дека околу 200 баратели на азил се евакуирани откако пожар ја уништил општинската зграда во близина на центарот. Сè уште нема информации за повредени лица.

Во Молила и во Барби исто така биле евакуирани повеќе од 100 баратели на азил, а шестмина биле повредени. Полицијата се сомнева дека пожарите се подметнати.

Повеќе од 160.000 лица побарале азил во Шведска од 2015 година. Голем број центри за азиланти се запалени во подметнати пожари во последните неколку години.


Грција ги заострува условите за барателите на азил


Атина, 30 март, 2017 - 14:19 (META) 

Грција го менува ставот кон бегалците што бараат азил во земјата. Бегалците или мигрантите на кои ќе им биде одбиено барањето за азил, доколку не прифатат доброволно да си заминат од Грција, ќе го изгубат правото за доброволно враќање.

Грчкиот министер за миграција, Јанис Музалас, најави дека откако на бегалците ќе им се одбие барањето за азил, ќе имаат две можности. Едната е во рок од пет дена да се пријават за доброволно да се вратат во родната земја или, пак, да одлучат да се жалат на одлуката за азил, во кој случај ќе го изгубат правото за доброволно враќање во матичните држави. Оваа одлука, според Музалас, е донесена за да се стопира злоупотребата на можноста за аплицирање за азил во Грција и со тоа да се одолговлекува враќањето на одбиените во нивните матични земји.

– Нашата цел е да им помогнеме на бегалците, односно на оние кои ги имаат правните документи за да добијат азил – изјави Музалас.

Илјадници бегалци и мигранти во Грција имаат поднесено барања за азил како начин да останат во земјата и да не бидат вратени во Турција, а потоа и во нивната матична држава.

Изминатото лето имаше повеќе од 13.000 барања за азил, во одредени моменти сите луѓе што беа на грчките острови поднесуваа барања за азил како единствен начин да останат во ЕУ-држава, бидејќи со договорот меѓу Брисел и Турција сите мигранти дојдени во Грција по 20 март 2016 година треба да бидат вратени во Турција.

Во последниве денови, на островите повторно пристигнаа неколку стотици бегалци и мигранти. Вчера на Хиос и на Лезбос пристигнале 176 нови бегалци.

На грчките острови има повеќе од 14.000 луѓе, а низ целата земја, според официјалните бројки, речиси 63.000 бегалци.


Аврамопулос ја повика Унгарија да ги почитува правилата за азил


Будимпешта, 28 март, 2017 - 15:03 (META) 

Еврокомесарот за миграција, Димитрис Аврамопулос, денеска ја повика Унгарија да се однесува во согласност со правилата на ЕУ за постапување со азилантите.

Аврамопулос на состанок со унгарските власти истакна дека експертите ќе расправаат за да осигураат дека новите унгарски правила за бегалци ќе бидат во согласност со правилата на ЕУ.

Во меѓувреме, унгарскиот Хелсиншки комитет, кој ги застапува правата на подносителите на барања за азил, рече дека привремената уредба на Европскиот суд за човекови права ја спречува Унгарија да испрати осум тинејџери и една жена која е во поодмината фаза за бременоста, во контејнерските кампови на границата.

Новите унгарски прописи, кои денеска стапија на сила, предвидуваат задржување на сите баратели на азил во контејнерски кампови на границата, што наиде на критики од ОН, како и од адвокатите што се занимаваат со човековите права.


Германија почнува со тестирање на софтвер за препознавање на говорот на мигрантите


Берлин, 18 март, 2017 - 11:39 (META) 

Германските власти почнуваат со тестирање на нов софтвер за препознавање на говор, со кој може да се одреди од која земја доаѓаат мигрантите кои немаат документи, јавуваат светските агенции, повикувајќи се на соопштение на властите во Берлин.

Од заводот за бегалци и мигранти на Германија соопштиле дека новиот автоматизиран систем треба да почне да работи во рок од две недели, но, дека нема да подготвен за официјална употреба уште најмалку една година.

Целта на софтверот е да ги открие мигрантите кои зборуваат на арапски јазик и доаѓаат од Сирија, а немаат документи тоа да го докажат и на тој начин да ги зголеми нивните шанси за добивање на азил во Германија.

Лингвистите, како што пренесуваат агенциите, се скептични околу ефикасноста на новиот систем и наведуваат дека е невозможно софтверот да биде целосно прецизен, бидејќи јазикот и говорот постојано се менуваат.

Новиот софтвер треба да се користи во рамките на технологијата за утврдување на индентитет, кој е веќе во употреба, соопштиле германските власти.


Турски дипломати бараат азил во Германија


Берлин, 24 февруари, 2017 - 12:34 (META) 

Германија и понатаму добива барања за азил од Турци со дипломатски пасоши, поради акциите против турската опозиција по неуспешниот воен удар извршен во јули минатата година.

Истражувачката група на медиумските куќи ВДР, НДР и „Зидојче цајтунг“ соопшти дека 136 лица со турски дипломатски пасоши побарале азил од август 2016 година до јануари 2017 години.

Истражувачката група во ноември регистрирала 53 апликации.

Не е познато колку од барателите на азил се дипломати, а колку членови на нивните семејства. Нема информации за тоа колку барања се одобрени.

Ситуацијата предизвика дипломатски тензии меѓу двете земји.


Уште двајца турски војници побарале азил во Грција


Атина, 23 февруари, 2017 - 20:54 (META) 

Грчката полиција денеска соопштила дека уште двајца турски војници, кои биле уапсени откако тајно влегле во Грција, побарале азил во земјата, пренесува балканскиот сервис на „Радио Слободна Европа“.

Од полицијата навеле дека двајцата офицери им се предале на грчките власти во североисточниот град Орестијада, минатата недела. Војниците пред грчката полиција изјавиле дека во земјата влегле преминувајќи ја реката Еврос, долж границата помеѓу Грција и Турција.

Тие официјално побарале азил во Грција во понеделникот оваа недела, информирале од полицијата, која не го соопштила идентитетот на војниците и не изнела други детали во врска со случајот.

Грчкиот суд на 26 јануари оваа година го отфрли барањето на властите во Анкара за екстрадиција на осумте турски војници кои побегнаа во Грција на 16 јули, неколку часа по неуспешниот обид за пуч во Турција, и веднаш побараа азил.

Одлуката на грчкиот суд, кој како причина за одбивањето на барањето за екстрадиција го наведе тоа што на офицерите не може да им биде гарантирана безбедноста во Турција, ги налути властите во Анкара, кои издадоа налог за нивно апсење и упатија ново барање до Грција за екстрадиција.


Грција го одби барањето на Анкара за екстрадиција на пребеганите турски војници


Атина, 26 јануари, 2017 - 14:57 (META) 

Грција го отфрли барањето на Турција за екстрадиција на осумте турски војници. Грчкиот Врховен суд денеска одлучи да ги ослободи војниците кои во јули, по обидот за пуч во Турција, со хеликоптер пребегаа во Грција и побараа азил и заштита.

Одлуката на Врховниот суд да се одбие барањето на Анкара и војниците да не се екстрадираат назад во Турција е конечна и неотповиклива.

Со ова, грчкиот суд ги прифати аргументите на војниците дека ако се вратат назад во Турција, нема да имаат право на фер судење и нивниот живот ќе биде загрозен.

Војниците ќе бидат пуштени на слобода, откако речиси шест месеци беа во притвор, прво во Александруполи, а потоа во Атина. Војниците слетаа во Александруполи веднаш по обидот за воен удар против претседателот Реџеп Таип Ердоган и побараа азил во Грција.

Се бранеа дека не знаеле дека се работи за воен удар и само извршувале наредби за пренесување повредени кога се нашле на мета на турската полиција. Нивните барања за азил сè уште се разгледуваат.

Случајот предизвика голема вознемиреност во Грција, бидејќи владата се најде растргната меѓу желбата да не дојде до нови тензии со турските власти, од една страна, и стравувањето за кршење на човековите права и заканите по живот за војниците доколку бидат вратени назад во Турција.

Грчката влада изрази солидарност со Турција и со Ердоган, но се обиде да се огради од ситуацијата со објаснување дека конечниот збор ќе го има грчкиот правен систем.


Русија му го продолжи престојот на Сноуден


Москва, 18 јануари, 2017 - 10:51 (META) 

На поранешниот службеник во американската Национална агенција за безбедност (НСА), Едвард Сноуден, му е продолжен престојот во Русија, соопшти портпаролката на руското министерство за надворешни работи, Марија Захарова.

„На Сноуден штотуку му е продлжен престојот за уште неколку години“, напиша Захарова на „Фејсбук“.

Во јуни 2013 година Сноуден на „Вашингтон пост“ и на „Гардијан“ им предаде доверливи материјали за американските и за британските програми за следење на интернет. Потоа замина за Хонгконг, од каде на 23 јуни истата година замина за Москва и престојуваше во транзит-зоната на московскиот аеродром „Шереметјево“.

Во август истата година добил привремен азил во Русија.

Сноуден во САД се товари за издавање тајни документи на специјалните служби на други земји и по секоја од трите точку му се заканува до 10 години затворска казна.


Меркел: Работиме на депортација на мигрантите


Берлин, 9 јануари, 2017 - 20:52 (META) 

Германската канцеларка, Ангела Меркел, повтори дека Германија мора да направи „национален напор“ за мигрантите на кои им е одбиено барањето за азил да ја напуштат земјата.

Меркел на конференцијата на државни службеници рече дека Германија работи на враќањето на мигрантите, но дека тоа единствено е можно ако се преговара со нивните татковини.

Забрзување на депортацијата и на доброволното враќање на мигрантите стана приоритет на германските власти по терористичкиот напад на божиќниот базар во Берлин.

Тунижанецот Анис Амри е осомничен дека на 19 декември со камион влета на божиќен базар и усмрти 12 лица. Одговорност за нападот презеде Исламска држава. Германските власти не успеаја да го депортираат осомничениот пред нападот затоа што Тунис одби да го прифати.

Во Германија во 2015 година пристигнаа повеќе од 890.000 мигранти.


Тројца турски војници ќе бидат екстрадирани од Грција


Атина, 6 декември, 2016 - 15:14 (META) 

Тројца од осумте турски војници што бараа азил во Грција по обидот за воен удар против Ердоган ќе бидат екстрадирани назад во Турција. Грчкиот апелационен суд денеска одлучи тројца од војниците да бидат вратени во Турција бидејќи смета дека се виновни за обид за уривање на турската влада, опструкција на работата на собранието и за кражба на хеликоптер.

Одлуката предизвика големо изненадување бидејќи вчера истиот суд одлучи други тројца војници да не бидат екстрадирани како што бара турската влада и да бидат пуштени на слобода. Под знак прашалник останува судбината на уште двајца војници, за кои ќе се одлучува во следните денови.

Тројцата кои треба да бидат екстрадирани во Турција најверојатно ќе поднесат жалба до судот против одлуката.

Војниците пред судот се бранеа дека доколку бидат вратени во Турција, нема гаранција за нивниот живот и за добросостојбата на нивните семејства, како и дека најверојатно нема да имаат право на фер судење.

Осумтемина војници слетаа во Александруполи во јули годинава со турски хеликоптер веднаш по обидот за воен удар во Турција и побараа азил во Грција. Комисијата за азил ги одби барањата, но војниците се жалеа на суд и чекаат одлука од второстепената комисија за азил.

Случувањата со турските војници предизвикаа загриженост за нов инцидент меѓу Грција и Турција. Грчките власти, иако веднаш ја поддржаа турската влада, сепак беа растргнати меѓу турските притисоци и барања за екстрадиција од една страна и заканите на турскиот претседател и функционери дека пучистите може да се соочат со смртна казна ако бидат вратени назад во Турција.