Утврден предлог-законот за амнестија на учесниците во настаните од 27 април


Скопје, 12 декември, 2018 - 12:34 (META) 

Подгрупата за помирување во Собранието изготви предлог – закон за амнестија што денеска ќе биде доставен до Координативното тело за помирување, а ако биде прифатен, како предлог – закон ќе биде пуштен во собраниска процедура за да се носи во скратена постапка.

Зекир Рамчиловиќ, од независната пратеничка група на ВМРО-ДПМНЕ, кој ја предводи оваа подгрупа, изјави дека нејзините членови постигнале консензус по ова прашање.

Според него, со pредлог-законот нема да бидат опфатени организаторите и лицата кои извршиле физичко насилство за време на настаните од 27 април лани во Собранието.

– Направена е разлика, најдена е правна формулација за дистинкција меѓу лицата организатори на настаните од 27 април лани и насилниците со оние кои не организирале и не извршиле насилство. Секое лице опфатено во процесот на ваквата амнестија, откако законот ќе биде изгласан, ќе треба да поднесе барање за амнестија – рече Рамчиловиќ.


Работната подгрупа за помирување денеска ќе продолжи со работа


Скопје, 12 декември, 2018 - 9:44 (META) 

Работната подгрупа за помирување на Интерпартиската парламентарна група за помирување, реформи и интеграција во Собранието на Република Македонија денеска во 10.30 часот ќе го продолжи вториот работен состанок.

Претходниот состанок кој се одржа во понеделникот, беше прекинат поради нови информации за кои се потребни дополнителни консултации во врска со законското решение за амнестија на дел од учесниците во настаните во Собранието на 27 април минатата година.

Работната подгрупа за помирување има задача да го подготви законското решение за помилувањата и националното помирување, додека останатите две групи формирани во рамките на Координативното тело за помирување, се за интеграција и реформи.

Минатата недела беше најавено дека до петок ќе има законско решение.


Иванов: Против мене се води хајка и линч со нарачани лажни искази


Скопје, 7 декември, 2018 - 20:13 (META) 

Претседателот Ѓорге Иванов демантира дека на 27 април планирал да прогласи воена состојба и дека наводно под притисок на меѓународната не го направил тоа. Претседателот во обраќањето рече дека против него се води хајка и линч со очајно смислено сценарио со нарачани лажни искази и генерирање лажни вести.

– Ако УБК се дрзнува без никакви основи да ги следи активностите на мојот кабинет и да ме става мене како претседател во службени белешки кои опишуваат непостоечки настани, се плашам од помислата што сè се случува во оваа институција и како се креираат извештаи со фиктивни извори за да се постигне определена цел. Со планиран истек на калисфицирани податоци се гради лажна перцепција за на крај да се конструира судско-полициски случај – рече Иванов.

Тој потврди дека генералниот секретар во неговиот кабинет, Борис Јосифовски, на 27 април минатата година бил во седиштето на ВМРО-ДПМНЕ. Кога почнале настаните во Собранието рече дека веднаш го повикал Јосифовски да го свика кабинетот.

За советникот за национална безбедност Синиша Алексовски, пак, рече дека тој ден тргнал на службен пат кон Вашингтон.

– Му реков веднаш да се врати од Истанбул и по полноќ околу 1 часот пристигна, сите извештаи што ги има ги има пратено на обвинителството – рече Иванов.

Тој вели дека во неговиот Кабинет на 27 април никогаш не се разговарало, ниту се размислувало за прогласување воена или вонредна состојба.

– Ги отфрлам и сите шпекулации дека меѓународната заедница вршела каков било притисок врз мене да отстапам од некаков наводен план за прогласување воена или вонредна состојба. Во овој момент, јавно ги повикувам странските претставници да излезат и да ги посочат тие кои ми вршеле притисок. Сценарио за воена и вонредна состојба немало, освен ако во Република Македонија не функционирал паралелен врховен командант на вооружените сили и паралелен Генералштаб на Армијата на Република Македонија – рече Иванов.

За сведочењата на дел од обвинетите за настаните на 27 април кои посочија дека наводно во кабинетот на Иванов се разговарало за прогласување воена состојба, Иванов рече дека таквите искази се лажни.

– Деновиве сме сведоци дури и на лажни искази дадени во судскиот процес за настаните од 27 април. Прво, сакам да укажам дека за давање лажен исказ пред суд, кривично се одговара. Второ, ги охрабрувам сите оние кои ме обвинуваат слободно да се обратат до надлежните институции, Министерството за одбрана, Армијата на Република Македонија, Агенцијата за разузнавање, Управата за безбедност и контраразузнавање и други институции кои се споменуваат, и да побараат веродостојни информации за планските и дневните активности на секој старешина, командант и војник. Овие институции треба да одговорат на прашањата каде биле одговорните лица на 27 април или претходно, и дали постојат какви било административни записи за подготовки на некакви сценарија за воена или вонредна состојба – рече Иванов.

Иванов потврди дека поранешните министри Миле Јанакиески и Владимир Пешевски биле во неговиот кабинет за консултации во врска со процесот за помирување.

Иванов не го коментираше бегството на експремиерот Никола Груевски.


Нинџа: Сè беше под контрола на УБК и паравоениот штаб на ВМРО-ДПМНЕ


Скопје, 6 декември, 2018 - 14:03 (META) 

Упадот во Собранието на 27 април беше командуван од паравоениот штаб на ВМРО-ДПМНЕ. „За заедничка Македонија“  беше формирана од ВМРО-ДПМНЕ и имаше фиктивни водачи. На протестите на „За заедничка Македонија“ 80 отсто беа од ВМРО-ДПМНЕ, која ги даваше сите реквизити што се користеа. Сите водачи на протестите ги имам гледано во штабот на ВМРО-ДПМНЕ кај Кирил Божиновски, рече обвинетиот Александар Василевски  – Нинџа во својот денешен исказ пред судот во врска со настаните во Собранието на 27 април минатата годинa.

Тој рече дека бил ангажиран во Управата за безбедност и контраразузнавање (УБК) од Горан Грујевски, а потоа му бил „очи и уши“ на Никола Бошкоски. Обајцата сега се избегани во Грција.

– Сите водачи на протестите ги имам гледано во штабот на ВМРО-ДПМНЕ кај Кирил Божиновски – рече обвинетиот Александар Василевски  – Нинџа.

Според него, оперативните податоци до кои што тој дошол велеле дека организаторите на протестите биле исплаќани од ВМРО-ДПМНЕ.

– Јас само ги видов во партијата со Кирил Божиновски, но не можев да ги видам нивните џепови – рече Нинџа.

Но малку подоцна, на вкрстено прашање, дали биле плаќани водачите на „За заедничка Македонија“ Игор Дурловски, Богдан Илиевски – Бетмен, Борис Дамовски и Владо Јовановски од ВМРО-ДПМНЕ, или протестите ги воделе од патриотски причини, Нинџа одговори:

– Јас не сум ги видел со свои очи што имаа во џебовите кога излегуваа откај Кирил Божиновски, но од оперативни сознанија на Петтата управа знам дека биле плаќани од ВМРО-ДПМНЕ. Впрочем и Никола Бошкоски ми кажа дека за тоа го информирал директорот на УБК, Владимир Атанасовски – рече тој.

Александар Василевски – Нинџа, исто така кажа дека по налог на поранешниот директор на УБК, Владимир Атанасовски, кога бил формиран „Фронтот за Македонија“ се сретнал со Ченто и Игор Југ. Задачата во однос на Југ била да процени дали е проруски ориентиран.

– Кон 15 април зовре состојбата и се скандираше против „тиранската платформа“. Во свест ни беше врежан патриотизмот. Никој од овие во судница не знаеше што може да се случи на 27 април. Тој ден околу 12:30 часот ми се јави директорот на УБК и ми кажа да бидам во Скопје, бидејќи има информации дека нешто ќе се случи – рече Нинџа.

Додаде дека околу 16 часот повторно му се јавил Атанасовски и му рекол дека има информации оти СДСМ ќе бира претседател на Собранието и оти тоа го знае и Ченто.

Нинџа пред судот истакна дека имал контакт и со Сашо Мијалков, кој го викнал да оди во „Мериот“ и штабот на ВМРО. Околу 18 часот бил во штабот на партијата, но Мијалков не бил таму. Таму, како што додаде, имало лица од парламентарниот командно-оперативен штаб на партијата – Бришковска-Бошковски, Божиновски, Јанакиески, Чавков.

Од тука, како што посочи Нинџа, се координирало што се случуваше на 27 април.

Бришковска-Бошковски кажала дека не поминало првото сценарио и пратениците не си ја завршиле работата и не предизвикале тепачка.

– Потоа му се јави на Трајко Вељаноски и му рече да се отворат вратите од Собранието, а во 19:15 му се јавил Атанасовски и му рекол да оди да известува од терен – додаде Нинџа.

Рече дека на една од клупите во „Жена парк“ го сретнал и Горан Грујоски, кој му рекол дека има седум до осум луѓе во Собрание од прикриени операции.

Одговарајќи на вкрстени прашања од обвинителството Александар Василевски-Нинџа рече дека УБК ги следело Зоран Заев, Зоран Верушевски и Оливер Спасовски, иако тогаш бил министер за внатрешни работи. Додаде дека бил следен и политичкиот аналитичар Алберт Муслиу кому му биле поставени камери кога не бил дома.


Поранешниот шеф на УБК, Владимир Атанасовски, доби 30 дневен притвор


Скопје, 5 декември, 2018 - 9:41 (META) 

Судија на претходна постапка му одреди 30 дневен притвор на поранешниот директор на Управата за безбедност и контраразузнавање (УБК), Владимир Атанасовски по вечерашниот распит во Кривичниот суд.

Атанасовски беше уапсен синоќа, пред зграда спроти МВР.

Тој се товари за кривично дело „здружување заради непријателска дејност“, откако на минатите рочишта за случајот за упадот во Собранието на 27 април минатата година, од дел обвинети беше директно посочуван како главен организатор на насилниот упад во Собранието минатата година.

Атанасовски беше спроведен во Кривичниот суд на распит, а обвинителството побара притвор по сите три основи.

– Побарав мерка притвор по 3 основи, опасност од бегство, влијание врз сведоци за што е способен со оглед на функцијата што ја извршувал и опасност од повторување на кривичното дело – изјави шефицата на Обвинителството за организиран криминал и корупција, Вилма Русковска.

Атанасовски беше на чело на УБК, откако Сашо Мијалков даде оставка во септември 2016 година, до јуни 2017, а сега е советник за безбедност на претседателот на ВМРО-ДПМНЕ, Христијан Мицкоски.


Има согласност за помирувањето, но не смеат да се поминат црвените линии, вели Заев


Скопје, 30 ноември, 2018 - 13:45 (META) 

Премиерот, Зоран Заев по средбата со координативното тело за помирување и интеграција во Собранието изјави дека е постигната согласност за процесот на помирување и за изготвување законско решение.

– Да оставиме сега на правните тимови кои под раководство на овие посебни групи ќе ги направат следните чекори. Ние денеска изразивме политичка волја. Со моето гостување на самата група јас ја потврдив мојата лична волја и волјата како премиер – рече Заев.

Премиерот кажа дека волја и желба постојат, но дека црвените линии не смеат да се поминуваат, како што рече „за да не ни падне на памет да влијаеме врз правосудниот систем“.

Потсети дека реформите и независноста на судството се многу важен императив во евроинтеграциските процеси за влез во НАТО и во ЕУ.

Заев вели дека треба да се разграничи што е насилство, а што не е насилство, што е физичко насилство, што е тоа реализација и осмислување и што е тоа некој да учествува во толпата, да биде заведен или понесен.

– Сите може да се согласиме дека терористичко загрозување на уставниот поредок не е нешто кое треба да ги опфати сите и не навлегувам подетално само кажувам како пример дека имаме потреба да направиме јасна дистинкција и разграничување. Секако, пораката на помирување и подадена рака мора да постои, но и пораката на неповторување на вакви работи исто така мора да постои – вели Заев.

Тој рече дека очекува да бидат запазени роковите за уставните измени и целиот процес да заврши до средината на јануари, а во финалната фаза да биде поддржан од дополнителен број пратеници во Собранието.

–Во следната фаза верувам дека постои можност и многу други пратеници да ги поддржат конечните амандмани, затоа што некои најавија дека еден дел од тоа е прифатливо.


Координативното тело за помирување ќе ги договара и реформските двотретински закони


Скопје, 28 ноември, 2018 - 13:40 (META) 

На првиот состанок на собраниското координативно тело за помирување била утврдена динамиката за работа во интерес на процесите и воспостување соработка, информираше копретседателката на телото, Фросина Ременски.

Таа рече дека на денешната средба било договорено да се формираат три работни групи – за интеграции, за реформи и за помирување.

– Интеграцијата се однесува на уставните измени за членство во ЕУ и НАТО. Втората подгрупа е за поширок план на помирување и ќе работи на решенија поврзани со настаните за 27 април. Ќе има долгорочен план. Ова е чин на консензус меѓу одговорни пратеници кои сметаат дека без соработка за темите кои нè делат не може да одиме во реформи и интеграција. Третата подгрупа, ќе биде за реформски процес по ЕУ-агенда. Тоа ќе го овозможиме преку инклузивен процес и носење одлуки за реформи и двотретински закони да се градат преку консензус. Сите овие процеси се врзани и детерминарни и ќе одат во еден здив и пријатна атмосфера – рече Ременски на прес-конференција во Собрание.

Таа потенцираше дека не му кажуваат на судството како да ја мери вината, но може да му укажат да има фер судење и внимателен пристап за настаните од 27 април.

– Ова тело нема намера да биде над обвинителството и над судовите. Наша идеја е да разгледаме можност за сугестии и предлози кои ќе ги консултираме со експерти – додаде таа.

Не дадовме бланко-потписи, процесот на помирување и интеграција е условен, изјави пратеничката Емилија Александрова од независната пратеничка група на ВМРО-ДПМНЕ

Таа апелираше процесот да почне што поскоро и посочи дека очекува уште денес или утре групите да почнат со работа. Таа не сакаше да коментира за предлог-законот за амнестија за 27 април, рече дека идеите и предлозите ќе бидат презентирани пред интерпарламентарната група.

Координативното тело за помирување ќе заседава повторно во петок, кога се очекува присуство и на премиерот Зоран Заев.


Собранието не го усвои предлог-законот за целосна амнестија на учесниците од 27 април


Скопје, 26 ноември, 2018 - 12:42 (META) 

Собранието со 59 гласа „против“ и 25 „за“ не го усвои предлог законот за амнестија што го поднесе пратеничката група на ВМРО-ДПМНЕ и Коалицијата „За подобра Македонија.

Пратениците од опозицијата бараа овој закон да се донесе по скратена постапка. Тој предвидуваше неселективно спроведување на правдата, односно амнестија на сите осомничени, обвинети и осудени лица за настаните од 27 април.

Зад овој закон стојат пратениците Драган Данев, Горан Манојлоски, Иван Иванов, Никола Мицевски, Весна Дамчевска Илиевска, Крсто Јовановски, Илија Димовски, Магдалена Манаскова, Слаѓана Митовска, Стојан Миланов, Нада Ципушева, Невенка Стаменковска, Дафина Стојаноска, Лилјана Затуроска, Павлинче Честојнова, Весна Пемова, Благица Ласовска, Жаклина Пешевска, Трајчо Димков, Владимир Ѓорчев, Трајко Вељаноски, Зоран Илиоски, Ане Лашкоска, Лилјана Кузмановска, Никола Попоски, Антонијо Милошоски, Емил Димитриев, Драган Цуклев, Димитар Стевананџија.


Вилма Русковска нов шеф на Обвинителството за организиран криминал


Скопје, 14 ноември, 2018 - 16:08 (META) 

Советот на јавни обвинители денеска ја избра Вилма Русковска, обвинителката која го води случајот за насилствата од 27 април, за нов шеф на Основното јавно обвинителство за гонење на организиран криминал и корупција – Скопје.

Покрај насилствата на 27 април, Русковска ги водеше и истрагите за „Диво Насеље“, „Змиско око“ и „Детонатор“.

На денешната седница на Советот на јавни обвинители беа избрани и шефови на скопското Вишо обвинителство, Мустафа Хајрулахи, во гостиварскто Вишо обвинителство Ислам Абази, за велешкото Основно обвинителство Гордана Тодорова, Елизабета Мишева во Кавадарци и Лиле Талевска за прв човек на битолското Основно обвинителство.


Новата амбасадорка на САД, Кејт Брнс, за разочараноста од Иванов и за 27 април


Скопје, 8 ноември, 2018 - 19:57 (META) 

Новата амбасадорка на САД Кејт Мери Брнс (Kate Marie Byrnes) која е предлог на претседателот Доналд Трамп и која треба да ја потврди Сенатот, доаѓа од Атина каде што ја врши функцијата заменик амбасадор, а на претходната функција како претставник на САД во ОБСЕ во Виена веќе ги коментираше состојбите и настаните во земјава.

Во мај минатата година, како претставник на Мисијата на САД во ОБСЕ, Брнс рече дека САД го повикуваат надлежните во Македонија да преземат чекори за да ја осигурат безбедноста на сите членови на парламентот, да ги истражат нападите во Собранието од 27 април темелно и да ги повикаат на одговорност тие што ги извршиле, ги организирале и ги нарачале насилствата.

– САД силно ги осудуваат насилните напади на членови на македонскиот парламент, кои следеа по изборот на Талат Џафери за спикер на Собранието. САД ќе соработуваат со новиот спикер и со парламентот за поддршка на демократијата и за да ѝ помогнат на Македонија да се движи по европскиот пат. За насилството нема место во демократските процеси. Ги изразуваме нашите најдлабоки симпатии кон членовите на парламентот и кон другите повредени во нападите и на нивните семејства. Како стратешки партнер и пријател на Македонија, со целосна почит на нејзиниот суверенитет и унитарноста, САД ги повикуваат сите партии да го концентрираат интересот на Македонија и на нејзините граѓани, пред сè друго, да работат заедно конструктивно и целосно да ги имплементираат сите нивни заложби што произлегуваат од Договорот од Пржино. Ги повикуваме сите партии да ги решат разликите мирно и да ги почитуваат законите во Македонија и демократските процеси – рече Брнс во нејзиното обраќање.

Претходно, во март истата година, Брнс изјави дека САД се разочарани од одлуката на Иванов да го додели мандатот за формирање влада на парламентарното мнозинство.

– САД се разочарани што претседателот Иванов одби да им понуди можност да се формира новата влада на претставниците кои имаат јасно парламентарно мнозинство. Ние сметаме дека оваа одлука не е во согласност со заложбите на ОБСЕ, основните демократски принципи и владеењето на правото, што се основни вредности на оваа организација – рече Брнс.