!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Сакаме чист воздух, а не панорамско тркало и боемски улици, порачаа еко-активистите


       
Скопје, 28 декември, 2016 - 20:12 (META) 

Воведување на системот пар-непар за возилата, бесплатен јавен превоз цела зима, засилени инспекции, казна од 10 години затвор за уништување на каква било вегетација и стопирање на сите проекти како панорамското тркало, боемски улици и стиропорни фасади и пренамена на средствата за лечење на болните од загадувањето. Ова се дел од 17-те барање што неколку стотини граѓани и еко-активисти му ги доставија на градоначалникот на Скопје, Коце Трајановски, на вечерашниот протест против енормното загадување на воздухот, кое во одредени денови и до 20 пати ги надминува дозволените вредности.

Протестот почна во Градскиот парк, од каде граѓаните и активистите се упатија кон зградата на Владата. Демонстратните носеа транспаретни на кои пишуваше „Воздух за сите“, „Добро бе, вие деца немате?“, „Филтри место финти“, „Кога ќе пораснам сакам да дишам“.

Од власта побараа веднаш да ги смени приоритетите и на прво место за решавање да го стави проблемот со загадениот воздух.

Според активистите, последните изјави на градоначалникот Трајановски не нудат решение за надминување на проблемот и не ветуваат поквалитетен воздух.

Тие на Трајановски му порачаа дека е време за итни мерки и дека покрај плановите на долг рок, неопходни се и решенија кои веднаш ќе дадат резултати.