Граѓанската акција „Ние одлучуваме“ предупредува дека намерата 10 декември да биде работен ден за администрацијата е влијание на нормалниот тек на предизборниот ден и ангажманот на администрацијата вклучена во изборните органи кои го примаат изборниот материјал на избирачките места.
„Одлуката 10 декември да биде работен ден, која е многу веројатно дека ќе биде донесена, е спорна поради можноста за директен последен притисок врз државната администрација пред денот на гласањето. Можноста денот пред изборите да биде работен ден за вработените во администрацијата, влијае и на можноста за остварување на нивното гласачко право за оние лица кои работат надвор од градот во кој се регистрирани за гласање. Дополнително, на ова може да влијаат и временските услови, доколку се земе предвид дека изборите се одржуваат во зимскиот период,“ велат од „Ние одлучуваме“.
Од граѓанската акција апелираат до политичките партии да ги елиминираат притисоците врз вработените во администрацијата.
Од „Ние одлучуваме“ потсетуваат дека спречувањето на гласање и повредата на слободата на определување на избирачите претставуваат кривични дела за кои е предвидена казна затвор од најмалку три години.
