Во Македонија постои континуитет на кризни ситуации во кои, од една страна, постепено дошло до зајакнување на авторитарната власт, но, од друга страна, цивилната сцена е пообединета од кога и да е, оценуваат хрватски експерти за ХРТ.
Експертот за безбедносни прашања Влатко Цвртила вели дека настаните во Македонија на почетокот ѝ одговараа на владејачката гарнитурата затоа што го одвлекуваа вниманието од реалните проблеми во земјата.
– Инцидентот на караулата веќе покажа дека постојат тензии, а фактот што властите дадоа толку малку информации за сè, говори многу. И сега нема одговор од каде тие структури влегле во земјата, зошто не се запрени. Настанот го окупираше вниманието на нацијата, а Владата не даде одговори што требаше да ги даде, па веројатно е дека тешко ќе остане на власт – изјави Цвртила.
Активистот за човекови права Горан Божичевиќ не ја исклучи можноста за вонредна состојба во Македонија и се согласува дека власта оставила многу неодговорни прашања.
– Се плашам дека владејачката гарнитура нема стратегија, ним не им е опција да заминат, тие ќе направат сè за да останат – вели Божичевиќ.
Според експертите, загрижува и тоа што во Македонија постојат особено силни групи на организиран криминал, кои ја користат ситуацијата и отвораат можности за илегални имигранти да влегуваат и да минуваат низ одредени територии, криминалните групи може да соработуваат со властите, нивните платеници се особено моќни и контролираат делови од земјата и можат да преземат различни акции.
Цвртила нагласи дека Македонија не напредува во процесите за приближување кон ЕУ и оти сегашната ситуација ѝ одговара на власта, но не и на граѓаните.
– Во Македонија владее големо незадоволство – незадоволни се и Албанците и Македонците и Србите. Загрозени се од клиентилизмот, економската ситуација, но тоа не е основа за обновување на етничкиот конфликт, затоа што играњето со етничките конфликти е многу опасно и би можело да ја избрише Македонија – смета Цвртила, додавајќи дека трансформацијата на Македонија ќе биде долга и оти е неопходна меѓународна присутност.
