Двајца обвинети признаа вина за нападот врз Села


       
Скопје, 11 јуни, 2018 - 11:32 (META) 

Обвинетите Цејо Горгиевски и Стојан Павловски признаа вина во судската постапка за случајот насилство за нападот врз Зијадин Села што се случи за време на упадот во Собрание на 27 април минатата година.

Обвинетиот Павловски пред судот рече дека признава вина и дека не можел да ги негира снимките и откако тие биле пуштени во судница, не може да каже дека не бил виновен.

– По изведените видео докази не можам да кажам дека не сум виновен. Тоа беше во момент на агресија – рече Павлески.

За двајцата кои го признаа делото, постапката ќе се раздвои од останатите седуммина кои се обвинети за обид за убиство.

На минатото рочиште обвинителот во овој случај, Дарко Јакимовски им го предаде изменетото обвинение на судот и на одбраната.

Со измените, за кои клучна беше новата снимка што како доказ ја презентираше Обвинителството, Сашо Сенков е ослободен од обвинение, а за двајца обвинети, Цејо Горгиевски и Стојан Павловски делото обид за убиство е преквалификувано во полесно дело, насилство.

За останатите седуммина обвинети останува истото кривично дело обид за убиство.