Денеска во основното училиште „Димитар Миладинов“ во Скопје се отвори Центар за талентирани ученици, кој е резултат на меѓуопштинската соработка меѓу општините Центар, Карпош и Кисела Вода.
Како што соопштија од Општина Центар, центарот располага со површина од 120 квадратни метри и вклучува три посебни простории и тоалет, опрема за планетариум и физика, биохемиска лабораторија и лабораторија за уметности.
Просторот е со посебен влез, физички одвоен од влезот во училиштето.
Ваквиот Центар за талентирани ученици е прв во главниот град и има исклучително значење за талентираните ученици кои немаат катче каде ќе можат да ги развиваат и усовршуваат своите таленти, знаења и способности.
Учениците во ова катче ќе работат со своите наставници, додека трошоците за редовните комуналии за просторот, струјата и парното ќе ги намирува училиштето „Димитар Миладинов“. Материјалните трошоци, пак, ќе ги покриваат сите три општини заедно.
