Сообраќајката во која е повредено седумгодишното девојче се случила вчера, околу 14.30 часот, на регионалниот пат Тетово – Пирок. На девојчето, додека одело пеш, налетало патничко возило „киа“ со тетовски регистарски таблички, што го управувал 41-годишен жител од Долно Палчиште.
По несреќата, девојчето, кое добило телесни повреди, пренесено е во тетовската болница и потоа пуштено на домашно лекување. Во извршениот увид, утврдено е дека причина за несреќата била неприлагодена брзина.
Во изминатите шест месеци од годинава се случиле околу 30 сообраќајни несреќи во кои настрадуваат пешаци. Во нив, тешко повредени биле десетина, додека другите завршиле со лесни телесни повреди.
Имајќи ги предвид ваквите бројки, Секторот за внатрешни работи Тетово уште еднаш апелира до возачите да не возат пребрзо и секогаш да им даваат предност на пешаците, не само на обележани премини, туку и воопшто, зашто во спротивно ќе се соочат со соодветни поднесоци и глоба, која изнесува 300 евра.
На пешаците, пак, им се советува да бидат крајно внимателни, да не се движат по коловоз и да не ги преминуваат улиците каде ќе стигнат. Глобата за невнимателно однесување на пешаците во сообраќајот и за непочитување на постоечките правила и прописи се движи од 20 до 35 евра.
