Невладината „Цивил“ бара итен прогрес во преговорите и почитување на крајните рокови предвидени со политичкиот договор, како и продолжување на крајниот рок за одржување на изборите.
„Еден ден пред крајниот рок, да се постигне согласност за избор на специјален обвинител, очигледно, нема прогрес. Бараме таа „една од најголемите политички партии“ конечно да го прифати Договорот во полза на иднината на оваа земја. Однесувањето на „едната од најголемите политички партии“ е неприфатливо. Јавноста не мора премногу да размислува за да извлече заклучок која е таа политичка партија. Очигледно е дека премиерот Никола Груевски и неговата политичка партија го кршат Договорот од самиот почеток. Ние, „Цивил“ – Центар за слобода, уште еднаш го упатуваме барањето да се продолжи крајниот рок за одржување на изборите, предвидени за 24 април 2016 година, бидејќи владејачките партии веќе ги пробија сите други крајни рокови и го прекршија Договорот. Затоа, на нашата земја ѝ треба повеќе време да се подготви за слободни избори, а, пред сѐ, итна имплементација на политичкиот договор“, се вели во соопштението од „Цивил“.
