Грчкиот шеф на дипломатијата, Никос Коѕиас, се подготвува за посета на САД. Според грчкиот весник „То вима“, Коѕиас на покана на Стејт Департментот ќе го посети Вашингтон и ќе има средба со американскиот државен секретар Џон Кери.
Средбата, според првичните информации, се очекува да биде на 20 април и да има обемна агенда на разговори.
Посетата на САД ќе биде неколку недели по патувањето на Коѕиас во Москва заедно со премиерот Алексис Ципрас, закажано за 8 април.
Коѕиас и Кери веќе имаат двапати разоварано телефонски, а средбата во Вашингтон ќе им даде можност тет-а-тет да разговараат и за економијата, регионалната стабилност и за клучните прашања од грчката надворешна политика.
На агендата на Кери и на Коѕиас се очекува да се најдат проблемите од Блискиот Исток и од Северна Африка, загрижувачкиот тренд на порастот на џихадизмот, нуклеарната програма на Иран, кризата во Украина, но и дискусија за енергетските прашања и за соработката на Грција со Русија. Според „То вима“, од агендата нема да изостанат ни грчките „национални“ прашања – Кипар, спорот за името, проблемите со Турција.
Според најавите, Коѕиас го очекува долг и напорен април, бидејќи покрај средбите во Москва и во Вашингтон, тој најави дека во април ќе се достави и листата мерки за градење доверба до македонската влада и ќе се почнат разговори во таа насока за подобрување на довербата меѓу двете страни.
