Огнот стивна, на теренот на пожарот над Охрид, влегоа и неколку противпожарни возила.Спречено е проширувањето на огнената стихија кон запад, во правецот на безинската пумпа на Макпетрол и дирекцијата на Националниот парк Галичица.
Се уште може да се забележи по некој пламен јазик, но кон повисоките планински реони.Во несреќата, голема среќа е што немаше ветер, така што и покрај високите температури, пожарникарите можеа да им пријдат на пламените јазици.
Силен пожар изби и беснееше попладнево над Охрид, во подножјето на планината Петрино, во област со далноводи и со преносни предаватели на мобилни оператори.
Постоеше голема опасност, пламенот да навлезе во подрачјето на висока и густа борова шума, со што ќе дојдеше до уште поголема стихија.
На површина од неколку хектари, изгоре ниско стеблеста шума, главно смрека и борови.Во делот од градот што е најблиску до местото на пожарот, се чувствува мирис на чад.
Охриѓани и бројните гости со страв и неизвесност го гледаа тоа што се случуваше, барајќи одговор на прашањето, зошто брзо не беа испратени да дејствуваа двата канадери на Дирекцијата за безбеност и заштита.
Директорот Шабан Салиу, во изјава за „Мета“ се повика на стандардните процедури за нивно ангажирање.
Засега не се знаат причините за пожарот, на некои портали објавена е информација дека е можеби подметнат, со оглед на фактот што се појавил истовремено на три места.