Заедничката публикација на Светската здравствена организација (СЗО) и Центрите за контрола и превенција на болести (ЦДЦ) на Соединетите Американски Држави, објавена вчера, лоцира алармантен пораст на случаите на сипаници, епидемии и смртни случаи во 2022 година.
Случаите на сипаници се зголемиле за 18 проценти и изнесуваат 9 милиони случаи, додека смртните случаи се зголемиле за 43 проценти (136.200) во споредба со 2021 година. Во 37 држави имало епидемии во 2022 година.
Наодите од публикацијата ја повторуваат континуираната потреба од забрзани напори за поддршка на закрепнувањето од пандемијата со ковид-19 и за зајакнување на здравствените системи, особено во државите со пониски приходи кои се најпогодени од оваа смртоносна болест.
Од 22 милиони деца кои не ја примиле првата доза на вакцина против сипаници во 2022 година, повеќе од половината живеат во десет држави, од кои шест се земји со пониски приходи, поддржани од Алијансата за вакцини Гави – Конго, Етиопија, Индија, Мадагаскар, Нигерија и Пакистан.
„Сипаниците се многу заразна и смртоносна болест: спречувањето на епидемии бара вакцинирање на најмалку 95% од подобните деца. Ова беше предизвик и пред пандемијата со ковид-19, а епидемиите и смртните случаи што можат да се спречат, нагло се зголемуваат поради зголемените празнини во имунитетот поврзани со пандемијата“, изјави Аурелија Нгуен, главен програмски директор во Гави.
„Недостатокот во покриеноста со вакцини против морбили во земјите со ниски приходи по пандемијата е аларм за акција. Сипаниците со добра причина се нарекуваат вирус на нееднаквост. Тоа е болеста што ќе ги најде и ќе ги нападне оние кои не се заштитени“, рече Кејт О’Брајан, директорка за имунизација, вакцина и биологија на СЗО, додавајќи дека „децата насекаде имаат право да бидат заштитени со вакцината против сипаници, без разлика каде живеат“.
Годинава, Алијансата Гави поддржа девет земји со пониски приходи во напорите за планирање и започнување на последователни кампањи за вакцинација против морбили, сипаници и рубеола и исплати повеќе од 12 милиони американски долари како одговор за поддршка во шест држави. Пред крајот на оваа година се планирани дополнителни три кампањи за превентивна вакцинација. Како одговор на одржливиот и алармантен тренд во случаите на сипаници, во 2024 година Алијансата Гави ќе поддржи рекорден број земји со пониски приходи – најмалку 15 – да преземат кампањи за превентивна вакцинација против мали сипаници и рубеола со цел да допрат до околу 38,5 милиони деца, а дополнително и за рутинско воведување на вакцини.
Од Гави соопштуваат дека вакцината против мали сипаници е безбедна, ефикасна и евтина. Децата треба да примаат две дози од вакцината, првата доза на 9 месеци и втората на возраст од 15-18 месеци.
