На возачот, кој во вторникот вечерта со својот автомобил предизвика сообраќајна несреќа и ја усмрти новинарката Сузана Тодоровска Павловска, одредена му е мерка притвор од 30 дена, соопшти обвинителството.
„Во рамки на истрагата за сообраќајната несреќа, на 10 јули 2015 година (денеска), пред надлежниот обвинител беше доведен осомничениот со неговиот бранител. Надлежниот обвинител потоа достави предлог за определување на мерката притвор за осомничениот бидејќи ценеше дека се исполнети законските основи за нејзино изрекување. Предлогот беше прифатен од судијата на претходна постапка, па на осомниченото лице судот со решение му изрече мерка притвор во траење од 30 дена“, стои во соопштението на Обвинителството.
Вчера оттаму соопштија дека анализата на крвта и на урината на 37-годишниот скопјанец покажала дека во моментот на сообраќајката, тој бил под дејство на алкохол, а биле детектирано и присуство на марихуана во организмот.
Според Обвинителството, тој имал 1,52 промили алкохол во крвта, а во урината 2,41 промили.
