Пратениците, кои пред неполн месец во Собранието дискутираа дека Законот за високо образование е добар и дека ваков закон недостигал за да се доведе во ред високото образование, денеска кренаа рака и гласаа да се одложи примената на некои одредби од Законот, со образложение дека недостигала дебата.
– Сакам да ја изразам поддршката за одложувањето на Законот. Владата имаше слух за сите дебати и јавни расправи. Не смееме да си играме со младите луѓе, нив местото не им е на улиците каде што се манипулира со нив, туку во амфитеатрите за да учат. Ова е можност за сите релевантни фактори да се вклучат со конструктивни предлози, кои ќе се втемелат во високото образование. Очекувам во наредниот период сите да дадат конструктивни мислења и препораки за законот – кажа пратеничката Олга Најденовска.
Пратничката Солза Грчева на тоа рече дека Владата сама си признала дека Законот не е добар и од таа причина некои одредби се одложуваат.
– Со денови расправавме дали групата закони е добра или не, а на крајот потврдата ни дојде од Владата. Мене не ми е јасно како можевте и тогаш и сега да го браните законот. Имајте малку доблест и барем премолчете – рече Грчева.
За законот гласа 77 пратеници. Со измените во законите се предвидува да се одложи спроведувањето на државниот испит за студентите и обврската на професорите да објавуваат научни трудови во списанија со импакт-фактор.
На седницата се изгласаа и измените на Законот за придонеси од задолжително социјално осигурување по скратена постапка и други закони.
