Од 20 часот вчеравечер до 9 часот утрово, авиокомпаниите откажале десет, а пренасочиле три лета поради намалена видливост како резултат на густата магла во скопската котлина, соопштија од Меѓународниот аеродром Скопје.
Оттаму велат дека согласно правилата на авиопревозниците за вакви ситуации, тие им организираат превоз и хотелско сместување на патниците.
„За сите натамошни информации во врска стекнување на патничките права, ги упатуваме патниците да се обратат кај својата авиокомпанија, со чии услови и правила на користење се согласиле кога ги купиле авионските карти“, се вели во објавата на Меѓународниот аердором Скопје на нивната страница на Фејсбук.
Доколку патниците имаат потреба дополнително да ги бараат своите патнички права, Меѓународниот аеродром ги упатува да се обратат до Агенцијата за цивилно воздухопловство на чија интернет-страница се пропишани правилата и условите за нивно остварување.
Од 9 часот утрово нема откажани летови од скопскиот аеродром, а во моментов не се очекуваат нарушувања иако видливоста е променлива.
Од скопскиот аеродром ги упатуваат патниците да ја следат нивната интернет-страница во делот Летови – Заминувања/Пристигнувања, каде се ажурираат евентуалните промени во редовниот распоред на летови.
