Јавното обвинителство оформило предмет по епизодата „Нечиста крв“ што вчера ја објави ИРЛ, во која постојат индиции дека линиката „Жан Митрев“ вршела клиничка студија со методот на хемофилтрација без да пријави, и без соодвоетно да ги информира пациентите, а обработуваа и смртни случаи кои се јавиле по појава на неколку опасни бактериски инфекции.
„Веднаш по објавата на наведената документарна емисија, Основното јавно обвинителство Скопје оформи предмет врз основа на инструментот на допрен глас, предвиден во Законот за кривична постапка. Предметот е распореден кај надлежен јавен обвинител кој ќе преземе дејствија за проверка на наводите од кои произлегуваат индиции за кривични дела против здравјето на луѓето“, потвдрија за Мета.мк од службата за односи со јавноста на ОЈО.
Од клиниката „Жан Митрев“ денес преку соопштение реагираа дека деновиве на социјалните медиуми „се објавени невистинити и наведувачки информации“ поврзани со работата на Клиничката болница Жан Митрев и д-р Жан Митрев.
„Клиничката болница Жан Митрев успешно работи за добробит на граѓаните веќе 22 години, нудејќи им услуги сертифицирани по светски стандарди, професионална грижа во насока на подобрување на здравјето, што е докажано во безброј успешни случаи. Ваквиот пристап продолжи да се применува и во текот на светската пандемија предизвикана од страна на вирусот ковид-19, во кој период клиниката со многу труд волја и неизмерно себевложување од своите вработени придонесе за спасување на огромен број човечки животи“, се вели во соопштението од болницата.
Од таму додаваат дека се згрозени од, како што велат, „тенденциозниот говор на омраза употребен кон институцијата, како и од неточните наводи, односно од фабрикуваните информации кои единствено се насочени кон креирање на лажна слика во пошироката јавност за работата на Клиничката болница Жан Митрев“.
Од „Жан Митрев“ меѓу другото најавија и дека ќе преземат чекори во насока на искористување на сите правни можности согласно законите, а со цел да се спречат неосновани напади на институцијата.
Стотици нови пријави од граѓани добиле новинарите на ИРЛ по објавата на „Нечиста крв“
