„Вистинските патриоти сте вие, „а не оние кои бараат работни визи во странство, нови возила, компјутери и некакви чадори што би ги заштитиле. Не може да бидат патриоти оние кои наместо од сопствените граѓани, поддршка добиваат од „пријателите“ од надвор“, рекла министерката за внатрешни работи, Гордана Јанкулоска, во своето обраќање по повод 34-годишната од формирањето на Единицата за специјални задачи „Тигар“.
Во своето обраќање кон специјалците, Јанкулоска направи паралела меѓу случувањата од 2001 година и тогашната афера „Прислушување“ со сегашната ситуација во која, како што вели министерката, „Македонија е повторно соочена со обид за напад врз институциите“.
„Припадниците на Единицата за специјални задачи се дел од оние кои беа на браникот на татковината во 2001 година, кога нашата земја беше соочена со најголемата закана. Тогаш, на крвавиот судир во кој беа изгубени бројни животи, му претходеше обид за разорување на државните институции. Тогаш беше обелоденета аферата „Прислушување“. Петнаесет години подоцна, Република Македонија повторно е соочена со обид за напад врз институциите. Повторно се соочуваме со обид да биде заложена иднината на Република Македонија за нечиј политички интерес“, подвлекла министерката за внатрешни работи.
Јанкулоска истакнала дека тогаш аферата „Прислушување“ завршила без кривична одговорност, а сега Македонија покажала капацитет и „лажните патриоти се откриени и кривично гонети“.
“Осомничени за шпионажа, незаконско прислушување и за соработка со странски служби, не се и не може да бидат патриоти. Свесни се дека нивната приказна сега не минува кај граѓаните. Свесни се дека само го валкаат поимот патриот, со кој сите се гордееме. Затоа сакам да ви порачам, во 2001 година, патриоти бевте вие и вашите претходници кои ги ризикуваа животите за Македонија, а не тие што ја конструираа аферата со прислушувањето. Денеска, повторно патриоти сте вие, кои застанувате на браникот на татковината“, истакнала Јанкулоска.
