ЗНМ молчеше кога СДСМ и Заев објавуваа непотврдени разговори на други новинари кои, според СДСМ, не се блиски на опозицијата, а реагира на најава на разговори блиски до СДСМ кои не се објавуваат јавно, за разлика од другите новинари, се вели во соопштението на Македонската асоцијација на новинари (МАН) по повод, како што велат „настаните поврзани со објавување приватни телефонски разговори од страна на СДСМ и на нивниот претседател Зоран Заев, во кои се објавуваат и приватни разговори на новинари како и на други лица“.
– Објавените разговори од страна на СДСМ се употребуваат за партиски потреби, односно за подигнување на партискиот рејтинг на СДСМ на штета на законот и основните човекови права. Македонската асоцијација на новинари го осудува ваквото партиско манипулирање со јавноста, која со кршење на законот се става во функција на партијата – се вели во соопштението на МАН, една од двете новинарски здруженија во земјава.
МАН смета дека јавното објавување туѓи приватни телефонски разговори без потврда за автентичност и за согласност на учесниците посочени во разговорот е кривично дело, како и масовно кршење на човековите права.
