Над 2.100 граѓани, организации и компании се вклучија во првата национална кампања во рамки на проектот Партнерства за донирање.
За манифестацијата, која траеше два месеца, беше организиран завршен настан кој беше осмислен како Добротворен базар на кој присутните имаа можност преку дадена донација да се стекнат со интересни празнични производи од 13 социјални претпријатија.
По тој повод директорката на УСАИД во Северна Македонија, г-а Џери Дајбл истакна дека поттикнувањето на домашните капацитети за унапредување на социјалната и економската стабилност на земјата во мултиетничката демократија е приоритет за Соединетите Американски Држави.
„Ја гледаме вредноста и повратот на инвестицијата во ова додека соработуваме со вас за да негуваме култура на дарување и да поттикнуваме акции и инвестиции на ниво на заедницата. Ние навистина веруваме дека ангажираната филантропија е од витално значење за унапредување на демократските вредности”, рече Дајбл.
Оваа прилика беше искористена за да им се дадат признанија и благодарници на музичките ѕвезди, модните дизајнери, компаниите и донаторите кои ја поддржаа кампањата „Денови за донирање“ и овозможија да се отпочне првиот Донаторски фонд во нашата земја.
Преку националната кампања „Денови за донирање“ која се одржуваше во последниве два месеца, поддржана од 31 непрофитна организација и 50 бизниси, се донирале 2 милиони денари во финансиски средства, добра и услуги и волонтерски труд.
„Ова му овозможи на тимот на Конект да го формира првиот донаторски фонд во земјата“, известија организаторите.
„Го формиравме првиот филантропски фонд каде се здружуваат донациите на граѓаните и бизнисите за да ги поддржат непрофитните организации што го менуваат животот во нашите заедници”, истакна извршната директорка на Конект, г-а Никица Кусиникова.
Настанот се одржува во рамки на проектот на УСАИД Партнерства за донирање спроведуван од Конект во партнерство со Европскиот центар за непрофитно право, Стопанската комора на северозападна Македонија, Индиго и Американската стопанска комора во Северна Македонија.
