Од денеска до петок, претседателот на Република Македонија, Ѓорге Иванов, ќе престојува во работна посета на Кралството Мароко, на форумот „Кран Монтана“.
Предвидено е а се обрати на официјалната сесија на отворањето на форумот. Главни теми на собирот се унапредувањето на дијалогот меѓу Африка, Магреб и Европа, политиката на соработка на Мароко, како и неопходноста од подобрување на климата за странски инвестиции и обезбедување сигурни индустриски и финансиски партнери.
Шефот на македонската држава на форумот „Кран Монтана“ ќе биде придружуван од министерот без ресор задолжен за привлекување странски инвестиции, Бил Павлески.
Во делегацијата се и претставници на десетина компании, членови на Стопанската комора на Македонија, на Сојузот на стопански комори на Македонија и на Стопанската комора на Северозападна Македонија.
Предвидено е, на иницијатива на претседателот Иванов, да се одржи презентација на инвестициските можности што ги нуди Република Македонија, како и средба на претставници на македонските стопански комори со претставници на марокански стопански комори.
Во рамки на работната посета на Кралството Мароко и учеството на форумот „Кран Монтана“, сопругата на претседателот на Република Македонија, Маја Иванова, ќе се обрати на специјална сесија на Форумот на aфрикански жени, чиј фокус годинава е имплементирање на родова еднаквост, жените во јавниот живот и во приватниот сектор и подобрување на образовниот систем за девојките.
Форумот „Кран Монтана“ е основан во 1986 година за да обезбеди широка меѓународна соработка и поврзување на економските чинители на светско ниво, како и да придонесе за глобалниот економски пораст, воедно обезбедувајќи стабилност, еднаквост и безбедност. Активностите и настаните во рамки на форумот се насочени кон создавање платформи кои ќе им овозможат на политичките и на бизнис-лидерите да ги имплементираат своите стратегии, да ги зајакнуваат партнерствата и да развиваат нови можности за соработка. Форумот тесно соработува со меѓународни институционални партнери, како агенциите на Обединетите нации, Европската унија, Советот на Европа.
