Русија нема да успее да создаде поделби во Германија, изјави министерката за внатрешни работи Ненси Фезер во врска со неодамнешното руско шпионирање на германската армија, пренесе германската новинска агенција ДПА.
„Пропагандната машина на Путин сака да ја дискредитира нашата земја, да манипулира со јавното мислење и да го подели нашето општество“, изјави денеска министерката за медиумите од медиумската група „Функе“.
„Ги зголемивме нашите заштитни мерки против шпионажа и дезинформации и континуирано реагираме на актуелните случувања“, рече Фезер.
Според неа, контраразузнавачката служба во Сојузната служба за заштита на уставот е значително зајакната, кадровски и технолошки. Борбата против активностите на руските разузнавачки служби останува главна задача на таа служба.
Во петокот, Русија објави снимка од разговор меѓу четворица високи германски офицери, меѓу кои и командантот на Луфтвафе, Инго Герхарц.
Службениците разговарале за оперативни сценарија доколку Германија одлучи да испрати крстосувачки ракети „Таурус“ во Украина.
На видеото се слуша и дека властите во Германија не одобруваат испорака на ракети кои Киев упорно ги бара. Канцеларот Олаф Шолц го оправдува своето одбивање со аргументот дека испораката може да ја вовлече Германија во војна.
Ракетите „Таурус“ имаат дострел од 500 километри и украинската војска со тој вид ракети може да ја погоди Москва.
Комисијата за одбрана во германскиот парламент следната недела ќе одржи специјална седница за скандалот со прислушувањето.
„Дотогаш ќе имаме повеќе информации“, рече претседателката на одборот Мари Штрак Цимерман.
„Ќе разговараме за тоа колку нашите институции се подготвени за хибриден напад“, изјави таа.
Политичките либерали (ФДП), најмалата партија во владејачката коалиција, е за испорака на „Таурус“ на Украина.
Ова е ставот на другите либерални функционери, како и дел од Зелените, партија која исто така е во коалиција со Социјалдемократите (СПД) на Шолц.
