На јавниот повик на Фондот за иновации и технолошки развој (ФИТР) за кофинансирани грантови за технолошки развој за забрзан економски раст, аплицирале вкупно 706 домашни компании. Тоа е рекорден број на доставени пријави на било кој досегашен јавен повик на ФИТР, соопштија од Фондот.
Во период од 60 дена додека траеше повикот, за корисниците биле одржани 20 информативни сесии, а апликации презеле дури 1.588 компании.
„Главната цел на овој инструмент на ФИТР е да се поддржат домашни компании да создадат услови за надминување на последиците од економската криза, да остварат забрзан раст, да ја зголемат конкурентноста на меѓународните пазари, преку воведување на нови, иновативни, напредни, „зелени“ и дигитални технологии за нивна трансформација. На повикот освен микро, мали и средни претпријатија, можност да аплицираат имаа и приватните здраствени установи (ПЗУ)“, соопштија од ФИТР.
Вкупниот буџет на јавниот повик изнесува 6 милиони евра, односно 2,5 милиони денари за микро претпријатија, до 5 милиони денари за мали и до 10 милиони денари за средни претпријатија. ФИТР обезбедува 70 отсто од буџетот на проектот за микро или мало претпријатие, или 60 отсто за средни.
Сега следува процес на селекција на предлог проектите, а оценувањето ќе го вршат домашни стручни лица од 22 области на експертиза, врз основа на: технолошки напредок и степен на дигитализација (35 поени), квалитет на проектот (10 поени), капацитет на проектниот тим (10 поени) и влијание на проектот, со по 45 поени. Предност при оценувањето ќе имаат компании со жени управители од различни региони, со цел да се поттикне рамномерниот регинален развој и женското претприемништво.
Во втората фаза, проектите ќе ги разгледува Комитетот за одобрување инвестиции (КОИ), независно тело составено од петмина меѓународни експерти и ќе има јавна презентација на предлог-проектите и потоа следува финална одлука од страна на Комитетот, според дефинираните критериуми.
За апликантите кои ќе бидат одбиени, ФИТР воведе нова менторска програма со цел да ги доразвијат своите проекти и да аплицираат повторно во иднина.
