Во тешка сообраќајна несреќа попладнево загина 42-годишен битолчанец, а 20 луѓе се повредени. Сообраќајната несреќа се случила на регионалниот патен правец Битола-Демир Хисар. Станува збор за судир меѓу патничко моторно возило и комбе на компанија која превезувала работници од Битола кон населените места во Демир Хисар. Загинатиот битолчанец, К.К., бил совозач на автомобилот со битолски регистерски ознаки.
„Јавен обвинител од ОЈО Битола изврши увид на лице место заедно со вешто лице. Издадени се наредби за прибирање на траги од лице место и проверка на крв и урина на возачите. Се постапува за расчистување на причините за несреќата“, соопшти Јавното обвинителство.
Сите 18 патници од комбето и возачот на комбето, А.С (25) од село Вирово, како и возачот на патничкото моторно возило „пежо“ се пренесени во Клиничката болница Битола за санирање на повредите. Повредените работници се од битолската фабрика „Кромберг и Шуберт“, кои работеле во првата смена.
Од болницата за Канал 5 изјавиле дека сите се надвор од животна опасност.
Увидот на местото на тешката сообраќајна несреќа траел повеќе од пет часа. Во спасувањето на повредените биле вклучени и две противпожарни возила со осум пожарникари.
