Сочувство до семејствата на жртвите што загинаа за време на поплавите во тетовскиот регион изрази денеска Демократската унија за интеграција.
„Уште сношти, сите структури на Демократската унија за интеграција се обврзаа да останат во близина и да им помогнат на жителите погодени од вчерашните поплави во Тетовско. ДУИ изразува жалење за причинетата штета и ги уверува граѓаните дека ќе ги преземе сите мерки за обесштетување на штетите предизвикани од поплавите. Апелираме до граѓаните што имаат материјална штета да ги следат постапките и упатствата што ќе ги преземат надлежните органи за да се процени штетата. ДУИ апелира до сите политички фактори, невладините организации и до медиумите да изразат солидарност со напорите да им се помогне на жителите и да не се користи природната катастрофа и трагедијата во Тетово за дневни политички цели. Жителите на Тетово и на полошкиот регион имаат потреба за нашиот придонес и искрена поддршка и ние ќе стоиме зад нив“, се вели во соопштението на партијата.