Денеска во 18 часот на Кејот на Вардар, каде што треба да се гради панорамското тркало ќе се одржи протест под мотото „Скопје не е Дизниленд“. На страницата на социјалната мрежа „Фејсбук“ каде што е најавен настанот, се препорачува демонстрантите да носат маски и костими.
„Драги сограѓани, ве повикуваме на мирен протест и граѓанско собрание во 18 часот, четврток 20 август 2015, на мостот каде треба да почне изградбата на панорамско тркало. Во четврток сакаме да им порачаме на одговорните дека Скопје не е Дизниленд и ова лудило мора да запре. Продолжуваат да се градат контроверзни зданија и споменици без соодветна јавна дебата и консултација со жителите на овој град. Ние не сакаме нашите поколенија да отплаќаат долгови со непоимливи камати за оваа естетска и политичка катастрофа“, пишува во повикот за протестот.
Организаторите велат дека на Скопје му треба модерна инфрастуктура и прогресивни идеи за развој на економијата и соживотот.
„За да покажеме што чувствуваме за се што е изградено од шмизлите па навака ќе носиме маски и костими. Индијанци, каубојци, кловнови, дизни карактери и карикатури, придружете ни се“, повикуваат организаторите.
