Повеќе од 150 луѓе загинаа во земјотрес што вчера го погоди западниот дел од Непал.
Безбедносните сили се распоредени за да помогнат во спасувачките напори во областите Јајаркот и Западен Рукум, 500 километри западно од Катманду, пренесува Би-би-си.
Силни потреси биле почувствувани многу подалеку, во главниот град на Непал и во градови во соседна Индија, вклучувајќи го и Делхи.
Портпаролот на армијата, како што јавува Би-би-си, изјавил дека повеќе од 100 луѓе се повредени, а болницата во Јајаркот е преполна.
Уште три потреси биле почувствувани во рок од еден час по земјотресот, а голем број луѓе го поминале остатокот од ноќта на отворено поради страв од дополнителни земјотреси и оштетувања на нивните куќи.
Видео снимки на локалните медиуми покажуваат урнати фасади на повеќекатните куќи од тули. Фотографии на социјалните мрежи сведочат за тоа како луѓето копаат низ урнатините во мракот за да ги извлечат преживеаните од остатоците од срушените згради.
Непалскиот премиер Пушпа Камал Дахал денеска пристигнал во погодениот регион и изразил „длабока тага“ за загубата на животите и имотот предизвикани од земјотресот, на социјалната мрежа X. Тој рече дека им наредил на безбедносните агенции веднаш да започнат спасување и операции за помош.
