Претседателот во заминување на Меѓународната фудбалска федерација (ФИФА), Сеп Блатер, се наоѓа под истрага на ФБИ поради учество во корупцискиот скандал тежок 100 милиони долари, јавува „Би-Би-Си“.
Американските власти се сомневаат дека Блатер го затаил случајот во кој компанијата за спортски маркетинг „Ај-Си-Ел“ го платила споменатиот износ на поранешните челници на ФИФА, Жоа Авеланж и Ракардо Тешеира, со цел за возврат да ги добијат маркетиншките и телевизиските права за натпревар одигран во текот на 90-години на минатиот век.
Тешеира бил еден од заговорниците на идејата домаќин на Светското првенство во 2022 година да му се додели на Катар. „Би-Би-Си“ наведува дека доделувањето на организацијата чинело 162 милиони евра.
Блатер за овој случај веќе одговарал пред етичкиот комитет на ФИФА, нагласувајќи дека не е запознаен со таквите малверзации, но ФБИ се сомнева во неговите искази.
Швајцарецот, заедно со првиот човек на УЕФА, Мишел Платини, се наоѓа на 90-дневна суспензија во ФИФА, поради сомнителната исплата од два милиони швајцарски франци.
Блатер поради корупцискиот скандал што ја потресе ФИФА поднесе оставка и најави заминување по вонредните избори закажани за 26 февруари.