Република Македонија мора да ги продолжи демократските процеси. Ова било констатирано на денешната средба на лидерот на СДСМ, Зоран Заев, со амбасадорите на Германија, Велика Британија, Шведска и на Холандија во земјава, Кристине Алтхаузер, Чарлс Гарет, Матс Стефансон и Ваутер Пломп.
– Парламентарното мнозинство од 67 пратеници е подготвено да ја реализира граѓанската волја за промени, изразена на изборите на 11 декември. Чекорите што следуваат се избор на нов собраниски претседател и нова реформска влада, според деловникот на Собранието, Уставот на Република Македонија и законите – рекол Заев на средбата, соопштуваат од СДСМ.
На средбата било разговарано за потребата и за одговорноста на сите политички субјекти во државата, институции и поединци да го овозможат овој процес, како и за „последиците од евентуално противуставно однесување на штета на државните интереси“.
– Неопходно е Трајко Вељаноски и Ѓорге Иванов да постапат според мнозинската волја на граѓаните, а опозицијата, Никола Груевски и ВМРО-ДПМНЕ, да овозможат мирен трасфер на власта – рекол Заев.
Од партијата додаваат дека на средбата било оценето дека излезот од кризата е во спроведувањето на итните реформски приоритети, кои ќе ги одблокираат евро-атлантските перспективи на земјава.