Мнозинството граѓани не знаат каде треба да пријават говор на омраза во медиумите


Скопје, 9 ноември, 2018 - 17:07 (META) 

Мнозинството од граѓаните немаат одговор за тоа каде треба да поднесат пријава доколку забележат дека некои од медиумите шири говор на омраза, што претставува кривично дело кое се казнува со парична глоба и казна затвор од 1 до 5 години, покажува спроведената анкета од страна на Центарот за истражувања ИПСОС Македонија“, подржана од Фондацијата Конрад Аденауер и Здружението на новинари на Македонија, пишува „Порталб.мк“.

Истражувањето било спроведен во септември годинава на 1.033 испитаници.

Според анкетата, 46,2 отсто од граѓаните не дале одговор на прашањето каде треба да го пријават доколку забележат говор на омраза во медиумите, 9,2 проценти велат дека тоа би го пријавиле во Агенцијата за аудио и аудиовизуелни услуги, 8,5 отсто во Советот на честа на ЗНМ, 8,4 проценти во Комисијата за заштита од дискриминација, 6,7 отсто во Комисијата за слободен пристап до информациите од јавен карактер, 6,2 проценти во институцијата Народен Правобранител на Македонија, 5,2 отсто во Советот за етика на медиумите на Македонија и 2,9 отсто во Јавното обвинителство.

Претходно од Хелсиншкиот комитет за „Порталб.мк“, изјавија дека граѓаните на Македонија многу малку се запознаени и препознаваат говор на омраза, бидејќи правната рамка е непрецизна. Тие бараат власта да спроведе кампања со цел јавноста да биде запознаена со говорот на омраза.

Од друга страна, Владата на Македонија преку националната стратегија за развивање на концептот „Едно општество и интеркултурализмот во Македонија“, ќе се бори против говорот на омраза, а најавуваат и нови пријави кои ќе се поднесат од МВР за лицата кои ширеле говор на омраза низ социјалните мрежи и други начини.

Стратегијата ќе се изготви во период од шест месеци во форма на документ, и според власта е важен имајќи го предвид степенот на поделба на општеството по разни основи.


Град Скопје: Не пријавувајте отворени огнови на „Фејсбук“, пријавете ги на 193


Скопје, 9 ноември, 2018 - 12:32 (META) 

Од Град Скопје апелираат до граѓаните сите забележани огнови на отворено да ги пријавуваат исклучиво на телефонскиот број 193, наместо на „Фејсбук“ или на другите социјални мрежи.

Од таму потенцираат дека горењето пластика, гуми, кабли, неквалитетни дрва и палењето на дивите депонии влијаат на загадувањето на воздухот и додаваат дека според статистиката греењето на дрва учествува со една третина во загадувањето на воздухот, а најотровните состојки се испуштаат од отворените огнови.

Портпаролот на Град Скопје, Ваљон Салиху вели дека за таа цел мешани тимови и оваа година ќе работат секој ден, 24 часа, за борба против огновите на отворено.

-Со пријавување на бројот 193 екипите ќе може да интервенираат навремено, а со тоа и да се спречи евентуална опасност по здравјето и имотот на нашите сограѓани. Дежурните екипи ќе ги процесираат сите пријави, огновите ќе бидат изгаснати, а доколку постои потреба од згрижување на лицата кои ги палат огновите ќе интервенираме во координација со Центарот за социјална работа на Град Скопје. Одговорноста за решавање на проблемот со огновите на отворено е заедничка за сите нас и затоа е неопходна активна соработка со граѓаните. Градот Скопје интензивно работи на елиминирање на причинителите на загадувањето на амбиентниот воздух во градот – рече Салиху.

Минатата зима, во рамки на оваа кампања биле регистрирани вкупно 438 јавувања на телефонскиот број 193, било интервенирано на 334 огнови на отворено, а во 114 случаи на терен излегле комунални инспектори.

Раководителот на Инспекторатот на Град Скопје, Мирослав Богдановски, рече дека градските инспектори вршат засилени контроли на терен по однос на загадувањето на животната средина и досега се пронајдени и казнети поголем број прекршители во Вардариште и во Ѓорче Петров.

-Во периодот септември/октомври годинава во споредба со истиот период лани имаме зголемување од околу 120 отсто во однос на изречените казни, а имаме изречено и голем број опомени за несовесните граѓани. Засилено се следи и состојбата во Лисиче, каде што граѓаните пријавуваат извори на загадување. Фатени се неколку малолетници кои гореле кабли и различни отпадни материјали. Ги контролираме и градилиштата по однос на прашината, дали се чисти тркалата на камионите, дали се покриени со церади и слично. Направени се контроли кај повеќе од 50 градилишта на подрачјето на Скопје – рече Богдановски.


УЈП го продолжи рокот за поднесување на пријавата за ДДВ


Скопје, 26 октомври, 2018 - 13:01 (META) 

Управата за јавни приходи соопшти дека, рокот за поднесување на пријавата за данок на додадена вредност ДДВ-04 се продолжува, поради отежнатото поднесување на даночни пријави преку системот е-даноци.

„Крајниот рок за поднесување на ДДВ-пријавата, 25 октомври се продолжува за два работни дена, односно крајниот рок за поднесување на ДДВ-04 пријавите ќе се смета 29 октомври“, информираат од УЈП.

УЈП ја својата веб-страница, потсети дека граѓаните треба да се регистрираат во неколку чекори на системот e-pdd.ujp.gov.mk, со што ќе биде на увид Годишната даночна пријава.

Заклучно со 12 октомври во апликацијата „е-персонален данок“ се регистрирале 36. 824 граѓани.


Од околу 1.000 дронови во Македонија, регистрирани се само 52 летала


Скопје, 17 август, 2018 - 15:43 (META) 

Во Македонија од цивилни лица и фирми се користат околу 1.000 воздухоплови без екипаж, а од нив до 15 август кај нас се регистрирани само 52, објаснува Драги Стојаноски, раководител на Секторот за безбедност на воздушен сообраќај и воздухопловна навигација во Агенцијата за цивилно воздухопловство (АЦВ).

Казните за неовластено користење, се од 300 евра, ако се плати истиот ден, до 600 евра за плаќање подоцна.

– Се надеваме дека сопствениците на леталата ќе сфатат дека и оваа дејност мора да биде регулирана и ќе си ги извршат обврските да се регистрираат според Уредбата за воздухоплови без екипаж – вели Стојаноски.

Тој вели дека е проблем и тоа што кај осигурителните куќи уште нема слух да изготват понуди за осигурување на овие летала, со што би им се овозможило некакво олеснување и помош и на сопствениците на воздухопловите без екипаж и на луѓето што ќе претрпат некакви повреди или штета од овие летала.

Уредбата, како и потребните формулари за регистрирање на  воздухоплови без екипаж може да се најдат во одделот за воздухоплови без екипаж на веб-страницата на АЦВ.

Регистрираните дронови добиваат маркичка со регистерски број и со QR-код, а сопствениците се задолжени 24 часа пред летањето да пријават со електронско писмо каде планираат да летаат со својот дрон и во кој временски период. Од следната седмица тоа ќе се прави директно на веб-страницата на Агенцијата, каде корисниците ќе се логираат и ќе ги оставаат своите податоци.

– Проверуваме и со МВР и со Министерството за одбрана, оти, на пример, иако за некој објект го знаеме ограничувањето, министерствата може во некои случаи, односно во некои денови, да наложат многу поголема оддалеченост од објектите. Од почетокот на месецот до 15 август имавме 63 пријавени настани и сите можеа да се следат на картата на нашата веб-страница – објаснува Момироски.

Од 63-те лета, по околу една четвртина отпаѓа на Скопје и Охрид, а потоа следуваат Куманово со 17 отсто од летовите, Тетово со 7 отсто, како и Струмица и Македонски Брод со по 5%.

Од Агенцијата апелираат сите сопственици на дронови со долет поголем од 15 метри и максимална височина над 15 метри или тежина при полетување од половина килограм да ги регистрираат овие летала, за да избегнат проблеми со законот.


Отворена бесплатна линија за пријавување здравствени ризици и проблеми со лекувањето


Скопје, 13 април, 2018 - 10:42 (META) 

Државниот санитарен и здравствен инспекторат (ДЗСИ) отвори  бесплатна телефонска линија 0800-25-555, на која во текот на вообичаеното работно време граѓаните ќе може да пријават најразлични неправилности во сферата на надлежности на инспекторатот.

Тоа се однесува на опасност од заразни болести во објекти во објекти кои подлежат на надзор од ДСЗИ, потоа проблеми во објектите за производство и промет на храна. Граѓаните може да пријавуваат и сомневања за безбедноста на детски играчки, средства за одржување на чистота, козметички производи, како и сомневања за санитарно-хигиенски проблеми во институции и јавни објекти, како и во јавниот превоз и во угостителските објекти.

Покрај тоа, на бројот 0800-25-555 може да се пријават проблеми со остварувањето на правата од здравствената заштита, остварувањето на правата од здравственото осигурување, примената на прописите од областа на здравството, како и остварување на правата на пациентите и начинот на постапување со медицинскиот отпад во здравствените установи.


Во Македонија перцепцијата за корупција е висока, ама ретко се гони


Скопје, 30 март, 2018 - 16:17 (META) 

Граѓаните на Македонија сметаат дека живеат во една од најкорумпираните држави во Европа.

И покрај тоа, податоците покажуваат дека кога станува збор за активна борба против ова општествено зло, напорите на органите на прогонот се незначителни.

Споредено со трендовите во борбата со корупцијата во земјите од регионот, резултатите во Македонија се поразителни.

data-viz-korupcija-MK1

Ако се споредат, на пример, позициите на Македонија и Албанија на Индексот за перцепција на корупцијата на „Транспаренси интернешнал“ во последните 5 години, точно се забележува овој тренд. Во Македонија има драстично зголемување на перцепцијата за нивото на корупција, додека во Албанија има намалување. Од 2012 до 2017 година, Македонија паѓа од 69 на 107 место на листата, што е пад 38 места. Албанија, пак, во истиот период, се качува за 22 места. „Транспаренси интернешнал“ го објавува Индексот за перцепција на корупцијата еднаш годишно, од 1995 година наваму.

data-viz-korupcija-MK2

https://www.facebook.com/dataunitmk/

При споредба на податоците за институционалната борба со корупцијата, Македонија е исто така на пониско ниво во однос на западниот сосед. Така на пример, бројот на  случаи за примање поткуп, според податоците што ги објави Министерството за внатрешни работи, изнесува во просек 10 случаи годишно во последните седум години. За истиот период во Албанија, според годишните извештаи на албанското Јавно обвинителство, се откриени во просек по 68 случаи на примање поткуп од страна на јавни функционери.

Според податоците на македонското МВР за минатата година, бројката на откриени случаи на примање поткуп во 2017 година изнесува само 2.

Објавените визуелизации се дел од проектот D.A.T.A. – Data Analytics for Transparency and Accountability имплементиран од Фондацијата за интернет и општество „Метаморфозис“.

Овој проект е делумно поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/авторите, и не ги одразуваат оние на Владaта на САД.


Општина Карпош отвори телефонска линија за пријавување несовесни граѓани што загадуваат


Скопје, 24 ноември, 2017 - 11:54 (META) 

Општина Карпош отвори телефонска линија за пријавување несовесно палење смет, гуми, кабли, пластика и друг токсичен материјал кој ја загадува животната средина.

„За да дејствуваме превентивно против загадувањето на животната средина, ве молиме да ги пријавите несовесните граѓани кои палат смет, гуми, кабли, пластика и друг токсичен отпад“, велат од Општина Карпош.

Граѓаните може да пријавуваат нерегуларности секој ден, во текот на 24 часа, на телефонскиот број 078 257 640 или на 192.


Рокот за пријавување за бесплатен одмор, продолжен до 20 ноември


Скопје, 26 октомври, 2017 - 16:30 (META) 

Министерството за економија денеска го продолжи рокот за аплицирање за владината мерка за бесплатен одмор за работници со ниски приходи до 20 ноември годинава, информираат од таму.

Досега повеќе од 650 граѓани изразиле интерес за користење на владината мерка, а според средствата што се обезбедени за оваа намена, во износ од 60 милиони денари, се проценува дека бесплатен одмор ќе може да користат 4.000 семејства, во вредност од 15.000 денари, во еден од 60-те категоризирани угостителски објекти за сместување во Македонија кои се пријавија во Министерството за економија.

Јавниот повик е објавен на 1 септември годинава, а право за добивање бесплатен одмор имаат сите физички лица кои се вработени и нивните месечни примања во семејството не надминуваат нето-износ од 22.000 денари.

Целта на овој проект е да им се овозможи на лицата со ниски приходи да искористат годишен одмор и во исто време да им се помогне на туристичките центри во зголемување на обемот на работа надвор од туристичката сезона.


Објавен огласот за нов јавен обвинител, почнуваат да течат роковите за пријавување


Скопје, 14 септември, 2017 - 9:48 (META) 

Собранието на Република Македонија денеска го објави огласот за именување нов државен јавен обвинител, по разрешувањето на Марко Зврлевски од оваа функција.

Со ова и официјално почнува да тече рокот од 15 дена за пријавување на заинтересираните кандидати за оваа функција.

„Заинтересираните кандидати кои ги исполнуваат условите предвидени со членот 44, ставови 1 и 2 од Законот за јавно обвинителство (да е државјанин на Република Македонија, активно да го владее македонскиот јазик, да е работоспособен и да има општа здравствена способност, да има стекнато универзитетска диплома за дипломиран правник во Република Македонија или нострифицирана диплома од странство, да има положено правосуден испит во Република Македонија и да има работно искуство од најмалку осум години со потврдени резултати на правни работи по положениот правосуден испит, или редовен или вонреден универзитетски професор кој предавал повеќе од десет години правен предмет од правосудната практика), пријавите со потребните документи треба да ги поднесат до Собранието на Република Македонија, во рок од 15 дена од денот на обајвувањето на одлуката во ’Службен весник’“, пишува во огласот, потпишан од претседателот на Собранието, Талат Џафери.

oglas za imenuvanje na javen obvinitel 2

Рокот за пријавување на заинтересираните кандидати е 15 дена, пишува во огласот потпишан од претседателот на Собранието, Талат Џафери

Инаку, Собранието го изгласа распишувањето на огласот за именување нов државен јавен обвинител пред точно една недела.

Според Законот, по пријавувањето на кандидатите, Владата мора да поднесе барање за мислење до Советот на јавни обвинители, кое има обврзувачка улога.

Советот има рок од 15 дена од денот на приемот на барањето од Владата да даде позитивно или негативно мислење за сите пријавени кандидати. По тоа, до Собранието доставува предлог за именување јавен обвинител со кандидатите за кои Советот дал позитивно мислење.

Доколку Советот на јавни обвинители од оправдани причини во рок од 15 дена не достави мислење, добива дополнителен рок од 15 дена, а ако и во овој рок Советот не достави мислење, се смета дека мислењето е позитивно.

Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот.

За именувањето, како и за разрешување државен јавен обвинител, Собранието одлучува со просто мнозинство, односно со 61 глас.

Засега во јавноста своите кандидатури ги најавија адвокатите Александар Тортевски, Звонко Давидовиќ, Александар Наков, Сејфула Османи и нотарката Лорија Ваневска.


Пријавувањето за упис на Универзитетот „Св. Кирил и Методиј“ ќе биде на 17 и 18 август


Скопје, 14 август, 2017 - 10:25 (META) 

Пријавувањето за упис во прва година во академската 2017/2018 година на Универзитетот „Св. Кирил и Методиј“, Скопје ќе биде в четврток и петок на 17 и 18 август.

Според објавениот конкурс за запишување студенти на прв циклус студии за претстојната студиска година, слободни се вкупно 10.818 места.

Од нив, 5.865 се за редовни студенти за кои годишната партиципација е 200 евра, 3.793 места се за редовни со кофинансирање на студиите со 400 евра годишно и 1.160 за вонредни студенти кои, исто така, плаќаат 400 евра.

Кандидатите кои ќе го пропуштат првиот рок за пријавување оваа недела, може да се пријават во вториот рок на 4 септември, а на факултетите на кои ќе има слободни места третиот рок за пријавување за упис е на 15 септември.

Новина во конкурсот е укинувањето на дисперзираните студии.