Од денеска па сè до 8 јули, немоќните и болните лица, како и пациентите заболени со ковид-19 и лицата што се во самоизолација, ќе мора да се пријават до општинските изборни комисии за да го остварат своето право на глас на претстојните парламентарни избори. За нив, објавено е упатство за начинот на кој ќе се одвива пријавувањето и гласањето. 

Лицата што се во карантин или во самоизолација поради ковид-19 ќе гласаат на 13 јули (понеделник). За да можат да гласаат, овие граѓани известувањето дека им е пропишана мерка да не излегуваат од дома ќе треба да го достават до општинската изборна комисија преку полномошник или по електронски пат. ДИК ќе формира избирачки одбори по општините, кои ќе го спроведат гласањето на овие лица во домашни услови.

Посебно упатство за начинот на пријавување и гласање е подготвено и за немоќните и болните лица, во кои спаѓаат и хронично болните лица. Сепак, и за нив планирано е гласањето да се одржи на 14 јули (вторник), додека пријавувањето за остварување на правото на глас ќе биде до 8 јули. Најдоцна до 11 јули ќе можат да се пријават за гласање единствено лицата кои се во домашен притвор, а заедно со затворениците, овие лица ќе можат да гласаат на 14 јули.

За претстојните парламентарни избори што ќе се одржат на 15 јули денеска беше заклучен Избирачкиот список со 1.814.263 граѓани со право на глас, објави денеска ДИК.