!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Каталонците стапуваат во генерален штрајк


Барселона, 3 октомври, 2017 - 10:48 (META) 

Каталонците денеска стапуваат во генерален штрајк, кој ќе го блокира функционирањето на најголем дел од регионот кој бара независност, односно од одвојување од Шпанија, пренесува „Би-би-си“.

Штрајкот го организираат каталонските синдикати и трговските здруженија, поради, како што се наведува, тешко кршење на правата и на слободите, за време на обидот за одржување на референдумот во неделата.

Шпанските централни власти, врз основа на пресудата на Уставниот суд, го прогласија референдумот за незаконски, но, како што тврдат каталонските власти, 2,2 милиони граѓани гласале и покрај забраната. Неколку стотини лица беа повредени за време на полициската интервенција и претресите во неделата на неколку од избирачките места.

За време на денешниот штрајк, ќе биде прекинат јавниот транспорт и работата на училиштата и на болниците. Се очекува и познатиот фудбалски клуб „Барселона“ да учествува во штрајкот, иако денеска нема закажани натпревари. Како што е најавено, ќе штрајкуваат и универзитетските професрои и другите јавни службеници во Каталонија.


Искршен месниот штаб на СДСМ во Бутел


Скопје, 27 септември, 2017 - 9:49 (META) 

Синоќа во населбата Расадник, во општина Бутел, бил искршен месниот штаб на СДСМ Бутел, информираат од партијата.

„Непознати сторители ги искршиле прозорците и влезната врата на штабот, ги искинале постерите и ја оштетиле светлечката реклама. Утрово повикана е полиција и во моментов се прави увид од местото на настанот“, се додава во соопштението на СДСМ.


Апелација со признавањето на „бомбите“ го крши законот, реагира ВМРО-ДПМНЕ


Скопје, 22 септември, 2017 - 20:15 (META) 

Апелацискиот суд не смее да донесува одлуки спротивни на законот, се вели во реакцијата на опозициската ВМРО-ДПМНЕ на одлуката на судот прислушуваните разговори да може да се користат како докази во судската постапка за случајот „Триста“ на СЈО.

„Апелацискиот суд, со одлуката со која ја уважува жалбата на СЈО за признавање на нелегално стекнатите разговори како доказ во кривична постапка, директно го крши членот 12 став 2 од Законот за кривична постапка, кој вели дека докази прибавени на нелегален начин не можат да бидат користени како доказ во постапка. Апелацискиот суд, како и сите други судови во државата и претставници на државниот апарат мора да работат во согласност со законот, и никако поинаку“, стои во соопштението на ВМРО-ДПМНЕ.

Од партијата ги предупредуваат сите функционери кои извршуваат јавна власт дека мора да работат согласно законот, а секое поинакво работење, додаваат од ВМРО-ДПМНЕ, ќе биде санкционирано и сторителите на криминал ќе треба да се соочат со кривична одговорност „со враќањето на демократијата и правната држава во Македонија“.

„Граѓаните ја гледаат сета деструктивност и правен хаос во кој СДС ја втурнува државата, а казната за тоа ќе им ја испорачаат на претстојните локални избори на 15 октомври“, порачуваат од опозициската партија.


СДСМ најави пријава против Јакимовски поради кршење на Изборниот законик


Скопје, 13 септември, 2017 - 18:00 (META) 

Социјалдемократскиот сојуз на Македонија денеска најави дека ќе поднесе „соодветна пријава“ против градоначалникот на општина Карпош, Стевчо Јакимовски, поради кршење на Изборниот законик со поставувањето камен-темелник за нова градинка во општината.

„Откако СДСМ вчера ги обелодени лошите услови во градинката „Мајски цвет“ и беше обелоденето дека Стевчо Јакимовски со години ги лажеше граѓаните и им ветуваше изградба на нова градинка во населбата Бардовци, продолжената рака на Никола Груевски и градоначалник во заминување, денеска побрза да удри камен-темелник на новата градинка „Аврам Писевски“ во оваа населба“, велат од СДСМ.

Според партијата, ваквите активности на Јакимовски се спротивни на членот 8-а од Изборниот законик.

„Јакимовски нема да успее да ги прикрие штетите што им ги нанесе на граѓаните со неговото неодговорно, расипничко и коруптивно владеење со општина Карпош“, порачуваат од СДСМ.


ДС бара широк демократски фронт за мирен трансфер на власта


Скопје, 5 април, 2017 - 14:32 (META) 

Демократскиот сојуз денеска соопшти оти смета дека треба да профункционира широк народен демократски фронт, кој ќе овозможи мирен трансфер на власта и ќе се „справи со новопечените богаташи, нарко-босови и олигарси, кои ја срушија државата и надежта на младите генерации“.

Од партијата на поранешниот пратеник во Собранието на Република Македонија, Павле Трајанов, велат дека високиот степен на криминализација ги разори сите институции, кои „станаа зависни од криминалните структури во партиско-државниот врв“, поради што државата и понатаму тоне во сè подлабока криза и неизвесност.

„Криминалот стана вредносна категорија, а не зло со кое треба да се справиме на ефикасен начин. Со овој „октопод“ не можеме да се справиме, ако не го „удриме“ со чекан по главата. Најдобра слика за криминалот во кој западна државата ни испраќа Собранието, каде под стегите на организираниот криминал, се блокира изборот на претседател на парламентот и избор на нова влада на Република Македонија, без да има механизам за одговорност на опструкторите на демократските процеси“, стои во соопштението на ДС.

Од партијата нагласуваат дека со недавањето на мандат за составување влада, претседателот Ѓорге Иванов и понатаму го крши Уставот и ја злоупотребува службената положба, а со образложението зошто не го дава мандатот, директно поттикнува на меѓунационален раздор и нетрпеливост.


Британија ги укинува истрагите за кршење на човековите права во Ирак


Лондон, 11 февруари, 2017 - 16:35 (META) 

Британската влада донела одлука да го укине државниот орган задолжен за истраги во врска со обвинувањата против британски војници за кршење на човековите права во Ирак, соопшти минитерството за одбрана на Обединетото кралство.

Државниот орган (ИХАТ), кој беше основан во 2010 година од поранешната лабуристичка влада, во моментов истражува 675 предмети, меѓу кои има и обвинувања за убиства. Само 20 предмети ќе бидат префрлени во полицијата на британската морнарица.

„Тоа ќе биде олесување за нашите војници кои предолго се товареа со обвинувањата“, изјавил британскиот министер за одбрана, Мајкл Фалон.

Организацијата Амнести интернешенл веднаш ја искритикува одлуката и оцени дека насилствата сторени во Ирак не треба да бидат ставени под тепих. Организацијата ја критикува и одлуката за префрлање на 20 предмети во британската морнарица.


Шилегов: Иванов го крши Уставот, работиме на решение за брзо и ефикасно формирање на влада


Скопје, 2 февруари, 2017 - 15:40 (META) 

Ѓорге Иванов ги крши Уставот и законите и јасно се става во одбрана на криминалот на Никола Груевски, изјави денеска на прес-конференција, портпаролот на СДСМ, Петре Шилегов.

– Ѓорге Иванов нема право политички да дискриминира. Иванов го додели мандатот на Никола Груевски без да му бара потпис од 61 пратеник и да поставува услови за програмата. Оттука нема право тоа да го бара од претседателот на СДСМ, Заев. Ова е недозволиво кршење на Уставот од страна на Иванов, за што се одговара и според Уставот и според Кривичниот законик. Со своето однесување, Иванов и во овој случај, како и претходно со аболициите, јасно се става во одбрана на криминалот на Никола Груевски. Со тоа Ѓорге Иванов ги доведува во опасност и граѓаните и државата – рече Шилегов.

Прашан за коментар на условите што треба да бидат содржани во програмата според Иванов, Шилегов истакна дека ниту во Уставот, ниту во Законот за влада не постои обврска на мандатар да презентира каква било програма пред претседателот, во случајов Ѓорѓе Иванов.

– Програмата се презентира пред пратениците и таа е предмет на усвојување од страна на Собранието, не од страна на Иванов – нагласи портпаролот на СДСМ.

На прашањето дали СДСМ почнал да собира потписи за состав на влада, тој рече дека СДСМ работи на наоѓање решение што ќе доведе до брзо и ефикасно формирање на нова влада.

За тоа дали СДСМ ќе побара одговорност од претседателот Иванов за последната одлука, Шилегов изјави дека актуелниот претседател на државата заминува во политичката историја во истиот момент кога тоа ќе се случи со Никола Груевски, со формирањето на новата влада.


До „Цивил“ има пријави за кршење на изборниот молк и притисоци врз гласачите


Скопје, 10 декември, 2016 - 16:11 (META) 

Граѓанската организација „Цивил“ информира дека од почетокот на изборниот молк до 14 часот, до нив стигнале околу триесет извештаи од изборните набљудувачи, како и десетина пријави од граѓани, за кршење на изборниот молк и за притисоци врз гласачите.

– Вработени во една скопска општина во моментов организирано се јавуваат кај гласачите и вршат агитација и притисок. Истото го нотира и набљудувачот од село Матејче, општина Липково, кој јавува за кршење на изборниот молк од страна на две политички партии во ова село. Во текот на изборниот молк, во населбата Маџари, Скопско, се појавил печатен материјал со црна кампања против опозицискиот лидер Зоран Заев, во кој пишува дека тој ќе ја кантонизира Македонија – се вели во соопштението на „Цивил“.

Оттаму информираат дека во село Подареш, општина Радовиш, во тек е изградба на пат, што претставува кршење на изборниот молк. Иста ситуација е нотирана и во село Миравци, општина Гевгелија. Во Ново Лисиче, пак, осамнале знамиња на ВМРО-ДПМНЕ на бандерите во екот на изборниот молк.

Од „Цивил“ повторно ги повикуваа сите актери во изборниот процес да престанат со притисоци врз гласачите, а граѓаните да пријавуваат нерегуларности, притисоци и поткуп.


СДСМ: Иванов ја продлабочи кризата, само целосно поништување на аболицијата е решение


Скопје, 27 мај, 2016 - 16:38 (META) 

Денешната одлука на лицето Ѓорге Иванов е уште едно, ново кршење на Уставот, што дополнително ја продлабочува и онака длабоката политичка криза во земјава, реагираат од СДСМ на денешната одлука на претседателот за повлекување на аболицијата за 22 лица.

„Аболицијата мора целосно да се поништи и законот да важи подеднакво за сите. Тоа единствено е возможно преку гласање за автентичното толкување на Законот за помилување во Парламентот, со поддршка на сите партии. Само така и Иванов и Груевски ќе покажат дека се за владеење на правото, почитување на Уставот и законите и само на тој начин може да дадат придонес кон разрешување на кризата. Денеска, Ѓорге Иванов повторно реши да ја следи нарачаната, добро осмислена тактика на криминалната власт, предводена од Никола Груевски. Иако можеше да ги поништи сите аболиции, што по нарачка на Груевски ги донесе, тој смислено не го направи тоа“, пишува во соопштението на СДСМ.

Од партијата додаваат дека Иванов им направил услуга на политичарите од ВМРО-ДПМНЕ кои не сакаат да се поништи аболицијата за нив.

„Само целосно поништување на аболицијата е решение. Само целосното поништување на аболицијата ќе значи дека законот е еднаков за сите“, се вели во соопштението.


Бугарските камионџии ги блокираа сите гранични премини со Грција


Софија, 19 февруари, 2016 - 15:39 (META) 

Бугарските камионџии ги блокираа сите шест контролни пунктови долж границата со Грција, во знак на протест поради повеќенеделните повремени блокади на грчките земјоделци.

На граничните премини има долги редици камиони и автомобили, а само на пешаците им е дозволено да ја преминат границата, пренесува АФП.

Тие порачаа дека ќе продолжат со блокадата додека грчките земјоделци не ги отстранат сите камиони и не ги ослободат сите патишта кон Бугарија.

Бугарскиот парламент издаде специјална декларација во која се апелира Европската унија да покрене прекршочна постапка против Грција заради прекршување на европските закони за слобода на движење на стоката.