Тодоров и ВМРО-ДПМНЕ го урнисаа здравствениот систем, велат од СДСМ


Скопје, 28 јули, 2017 - 12:48 (META) 

ВМРО-ДПМНЕ преку нејзиниот министер Никола Тодоров го урниса здравствениот систем и газеше врз достоинството на лекарите и на пациентите, се вели во реакцијата на СДСМ на соопштението на ВМРО-ДПМНЕ.

Од владејачката партија велат дека водејќи се исклучиво „од коруптивни и од бизнис-интереси и за криминални тендери“, ВМРО-ДПМНЕ и Тодоров здравствениот систем на Македонија го направиле еден од најлошите и најсмртоносните во Европа.

„Надлежните институции се вложија во справување со болеста, се преземаат неопходните мерки за спречување на повторна појава и на понатамошно ширење на вирусот. Криминалните политики на ВМРО-ДПМНЕ зад себе оставија урнисан здравствен систем, недостиг од современа опрема и од медицински кадар, распаднати болници и здравствени домови, а тоа се покажа и во овој случај кога поради долгови и блокирани сметки, Институтот за јавно здравје останал без реагенси и тие мораа да се позајмуваат од соседни земји“, се вели во соопштението на СДСМ.


СДСМ: Потребно е да се одблокира работата на Собранието, наместо да се штити криминал


Скопје, 2 април, 2017 - 10:03 (META) 

„Maкедонија ќе биде правна држава. Ќе има темелни реформи во судството и во обвинителството и ќе има правда за сите. Пратениците на ВМРО-ДПМНЕ затоа ги кочат демократските процеси во парламентот. Тие мислат дека така можат да го заштитат раководството на ВМРО-ДПМНЕ од одговорност за криминалот на штета на граѓаните, изминатите 10 години“, се вели во соопштението на СДСМ.

Во него се додава дека ниту Никола Груевски, ниту пратениците од ВМРО-ДПМНЕ кои си реплицираат сами на себе во Собранието, погазувајќи го сопственото достоинство, нема да ги спречат промените и правдата.

„Мнозинството граѓани во Македонија се изјаснија против партиски судови во кои нарачани пресуди пишуваат судии од тефтерчето на Јанкулоска и на фамилијата. Граѓаните не сакаат недостижна правда, зашто таа им следува по Устав и по закон. Судството и јавното обвинителство во голем дел ја штитеа корупцијата на највисоките нивоа во досегашната власт. Потребна е влада која ќе ги ослободи судството и обвинителството чија основна обврска е заштитата на основните човекови права“, се додава во соопштението.

Од СДСМ велат дека во програмата, новата реформска влада на унитарна Македонија се обврзува дека ќе спроведе темелни реформи во оваа област и ќе обезбеди независно судство.

„Затоа, пратениците на ВМРО-ДПМНЕ да ја одблокираат работата на Собранието, наместо да штитат криминал. Ќе биде избран нов претседател на Собранието и тој потоа веднаш ќе го извести Ѓорге Иванов дека има парламентарно мнозинство од 67 пратеници, за да му го даде мандатот на претседателот Зоран Заев, кој ќе ја формира новата реформска влада на граѓаните на Македонија“, се вели во соопштението на СДСМ.