Бродот „Мис Стон“ кој во неделата делумно потона во каналот Студенчишта во Охрид и од него се излеа нафта, денеска бил изваден од водите на Охридското Езеро, информираат од Општина Охрид.
„Со помош на брод од Хидробиолошкиот завод и со дигалка, бродот „Мис Стон“ беше исправен и прицврстен во близина на хангарот од Хидробиолошкиот завод. Се очекува во наредните денови бродот да се дислоцира од каналот. Во целиот зафат учествуваше и екипа на ЈП „Нискоградба“, која со пумпи претходно ја отстрани водата од внатрешноста на бродот“, велат од општинската администрација.
Во текот на вчерашниот ден, екипа од Капетанијата од Охрид, со специјални абразивни средства, успеала да неутрализира голем дел од излеаната нафта.
