Европската банка за обнова и развој (ЕБОР) одобри зголемување на постојниот кредит за 21 милион евра за поддршка на понатамошните подобрувања на мрежата на македонските државни патишта, во делот помеѓу Штип – Кочани и Раец – Дреново.
Со новопредложениот проект, двете ленти од патот ќе се задржат, должината на патот ќе се зголеми за 28 километри, а износот на вкупното финансирање ќе се зголеми за 21 милион евра.
Првичниот заем од 74 милиони евра кон Јавното претпријатие за државни патишта (ЈПДП), беше потпишан во ноември 2014 година. Клучен елемент во инвестицијата е подобрување на безбедноста на патот.
– Ние ја гледаме потребата за развој на инфраструктурата во земјата како еден од клучните приоритети за ЕБОР во Македонија. Добро развиени и современи регионални транспортни конекции ќе го зајакнат регионот и ќе го подобрат пристапот на оддалечените области до поголемите пазари. Во прилог на ова, подобрениот дизајн на продолжувањето на патот ќе резултира во значајно зголемување на безбедоста – изјави првиот потпретседател на банката, Фил Бенет, на церемонијата за потпишување што се одржа во Лондон.
Министерот за финансии, Зоран Ставрески, се заблагодари за поддршката на ЕБОР за овој важен државен проект.
– Поврзувањето на македонските региони, преку националните патишта и меѓународните конекции, го гледаме како економски приоритет. Овој проект е од корист за сите ѓраѓани на Македонија и носи одржлив економски развој – изјави Ставрески.
ЕБОР почна да инвестира во македонската економија во 1993 година. До денес, во земјата има потпишано повеќе од 90 проекти со кумулативен нето-износ од повеќе од 1,5 милијарда евра.
