Демократскиот сојуз (ДС) смета дека во интерес на внатрешната стабилност и мир е неопходно да се формира реформска влада од партиите што имаат парламентарно мнозинство, велат од партијата.
Според ДС, четирите елементи што ја карактеризираат државата (народ, јазик, теториторија и суверено владеење со територијата), со ништо не се загрозени однатре, ниту, пак, постои надворешна закана по нив, а за промена на државните симболи, односно знамето, грбот и химната, додаваат од партијата, потребна е согласност од најмалку 81 пратеник или повеќе од 50 отсто од граѓаните да се изјаснат на референдум за промени.
Од Демократскиот сојуз предлагаат наместо Собранието, за сите прашања од национален и државен интерес на референдум да одлучуваат граѓаните, вклучително и за промени поврзани со симболите на државата.
„На овој начин, силната манипулативна партиско- медиумска кампања ќе се распадне и кај граѓаните ќе зајакне определбата дека само со мирна промена на власта ќе се обезбеди владеење на правото, како основна гаранција за индивидуалните и колективните права и слободи“, стои во соопштението на Демократскиот сојуз.
Од партијата оценуваат дека не е загрозен унитарниот карактер на државата, дека нема никаков заговор за поделба и за уривање на државата, ниту идеи или поддршка за промена на уставното име на Република Македонија.