Министерството за здравство денеска регистрирало 205 случаи на новозаболени лица од ковид-19 во земјата, 336 оздравени пациенти, како и шестмина починати лица. Она што може да се забележи е дека бројот на оздравени пациенти е најголем во едно деноноќие (336) од почетокот на епидемијата, а во исто време, овој број за првпат е и значително поголем од бројот на новозаразени пациенти во период од 24 часа.

Епидемиологот и в.д. директор на Центарот за јавно здравје од Скопје, д-р Александар Стојанов за „Мета.мк“ вели дека бројот на новозаразени пациенти е висок, затоа што е висок и бројот на направени тестови, вкупно 1.728.

– Сме имале и по 1.800 тестови во еден ден, така што оваа бројка од 1.728 тестирања не е најголемата досега. Но, не е толку важно колку тестови се направени, поважен е процентот на позитивни од направените тестови. Со овие бројки од денес, тој процент изнесува 12, а сме имале денови кога овој процент бил и 15. Сепак, во еден ден досега не се случило да имаме 205 новозаразени пациенти. Во однос на прогнозите за тоа што нѐ очекува, сѐ е релативно. Што и да ви кажам сега, може утре да се промени. Овој вирус, ако нешто нѐ научи, тоа е дека не можеме да дадеме никакви финални прогнози и очекувања – вели д-р Стојанов.

Од новозаразените пациенти најголем број се во Скопје – 60. И најголем број од оздравените исто така се од Скопје – 113.

Во последното деноноќие починале и шест лица, четворица пациенти од Скопје и двајца од Гостивар. Биле на возраст од 62, 68, 94, 65, 70 и 80 години.

Вкупната бројка на ковид дијагностицирани случаи во нашата земја од почетокот на епидемијата е 7.777, бројката на оздравени пациенти е 3.960, на починати е 368, а во моментов бројот на активни случаи во земјата изнесува 3.449.

На Инфективната клиника во изминативе 24 часа примени се 5 пациенти. Вкупно се хоспитализирани 92 пациенти. На кислородна поддршка се 59 пациенти, а нема пациенти на респираторна машина.

Во болницата во Козле се хоспитализирани 19 возрасни пациенти позитивни на ковид-19, 2 деца позитивни и 1 суспектно на вирусот. Во ГОБ „8 Септември“ примени се 11 нови, вкупно хоспитализирани се 96 пациенти. На респираторна машина се 4 пациенти.

Во болницата во Битола се хоспитализирани 41, а во болницата во Штип се хоспитализирани 46 пациенти. На инфективните одделенија во Тетово, Охрид, Велес, Куманово, Прилеп, Гостивар и Струмица се хоспитализирани 112 пациенти – позитивни и сомнителни на ковид-19.