Në Tetovë shënohet dita e mësuesit

Me rastin e 7 Marsit­ Ditës së Mësuesit, Ministri i arsimit dhe shkencës, Abdilaqim Ademi, sot ka vizituar Shkollën Fillore “Përparimi” në lagjen Reçicë të Vogël të Tetovës ku për së afërmi ka parë se si rrjedhin punimet për ndërtimin e sallës së sportit në këtë shkollë. Më pas, ministri Ademi ka vizituar Shkollën e Mesme “Mosha Pijade” në Tetovë. Edhe në këtë shkollë, së bashku me udhëheqësin e saj ka vëzhguar punimet që zhvillohen në ndërtimin e sallës së sportit për nevojat e nxënësve të kësaj shkolle. Ministri Ademi tha se punimet për ndërtimin e këtyre dy sallave sportive po zhvillohet sipas dinamikës së paraparë. Ai mes të tjerash theksoi se Ministria e Arsimit dhe Shkencës do të vazhdojë investimet për krijimin e kushteve më të mira për mësim për të gjithë nxënësit, dhe se kjo mbetet prioritet i ministrisë dhe Qeverisë së Republikës së Maqedonisë. Gjithashtu, ministri Ademi gjatë ditës së sotme ka bërë shpalosjen e pllakës së objektit të ri të Gjimnazit “7 Marsi” në lagjen Drenovec të Tetovës. Ai në fjalën e tij para të pranishmëve theksoi se MASH do të vazhdojë investimet në ndërtimin e shkollave. “Sot, pikërisht në Ditën e e Mësuesit jemi këtu për të hapur një gjimnaz të ri në Tetovë, përkatësisht në lagjen Drenovec që do të mban emrin 7 Marsi. MASH nuk do të ndalet këtu, do të vazhdojmë edhe në të ardhmen investimet në ndërtimin e shkollave të reja për krijimin e kushteve më të mira për zhvillimin e procesit edukativo arsimor”, theksoi ministri i arsimit dhe shkencës.