Kontesti me emrin mes Maqedonisë dhe Greqisë kanë qenë dy temat kryesore të bisedimeve mes kreut të BDI-së Ali Ahmetit dhe shefit të diplomacisë greke Nikos Kozias në takimin e sotëm në ministrinë e jashtme greke.
Ahmeti i shoqëruar nga dy zv/kryeministrat Fatmir Besimi dhe Musa Xhaferi dhe deputeti Artan Grubi theksoi se ka vërejtur vullnet të mirë dhe gatishmëri nga pala greke për zgjidhjen e kontestit me emrin, qëndrim të cilin planifikon ta bart tek partnerët e koalicionit në Maqedoni.
“Unë jam i hapur dhe të gjitha mendimet dhe qëndrimet do t’i bart tek partnerët e koalicionit. Vërejta gatishmëri dhe vullnet të mirë tek ministri i jashtëm grek për gjetjen e kompromisit. Këtë vullnet të mirë do ta bart në Shkup me shpresë që ky vullnet do të jetë i dyanshëm” theksoi Ahmeti pas takimit.
Në pyetjen e televizionit “Kanal 5” nëse janë biseduar propozime konkrete, Ahmeti theksoi se vet kohëzgjatja e bisedimeve prej 1 orë e gjysmë tregon se për temat është biseduar hollësisht. Ai shtoi se është diskutuar rreth ideve dhe qëndrimeve për tejkalimin e kontestit të emrit.